ورتالىق كوممۋنيكاتسيالار قىزمەتىندە وتكەن ءباسپاسوز جيىنىندا قازاقستاننىڭ مادەنيەت جانە سپورت ءمينيسترى اقتوتى رايىمقۇلوۆا ءوزىنىڭ ورىنباسارى ساكەن مۇسايبەكوۆتىڭ پارا الۋ فاكتىسى بويىنشا قاماۋعا الىنۋىنا بايلانىستى سۇراققا جاۋاپ بەرىپ، ەگەر مۇسايبەكوۆتىڭ كىناسى دالەلدەنسە وتستاۆكاعا كەتۋگە دايىن ەكەنىن مالىمدەپتى.

«مەن كونستيتۋتسياعا سايكەس كىناسىزدىك پرەزۋمپتسياسى بار ەكەنىن ايتقىم كەلەدى. ەڭ الدىمەن، كىنا دالەلدەنۋى كەرەك. ەگەر كىناسى دالەلدەنسە، وندا، ارينە، زاڭعا سايكەس مەن جۇمىستان كەتۋ تۋرالى ءوتىنىش بەرەمىن. بىراق بۇل كىنا دالەلدەنگەن جاعدايدا بولادى»، - دەپتى مينيستر رايىمقۇلوۆا.

مادەنيەت جانە سپورت ۆيتسە-ءمينيسترى ساكەن مۇسايبەكوۆتىڭ قاماۋعا الىنعانى تۋرالى اقپارات 2021 جىلدىڭ 22 اقپاندا پايدا بولدى. شەنەۋنىك «بۋكمەكەرلىك كەڭسە مەن جالپى پاترونات سالاسىنداعى مۇددەلەردى لوببيلەۋ ءۇشىن پارا الدى» دەگەن كۇدىككە ىلىنگەن. قازىر مۇسايبەكوۆكە قاتىستى سوتقا دەيىنگى تەرگەۋ جۇرگىزىلىپ جاتىر ەكەن.

Abai.kz: ۆيتسە-مينيستر پارامەن ۇستالدى. مينيستر نە ىستەيدى؟

ال ساۋىردەگى اباي اتىنداعى وپەرا جانە بالەت تەاترىنىڭ اينالاسىنداعى داۋلى جاعدايعا قاتىستى جاريالاعان جازباسىندا بەلگىلى كينورەجيسسەر ەرمەك تۇرسىنوۆ ۆيتسە-مينيستر مۇسايبەكوۆتىڭ ماسەلەسىن تاعى ءبىر مارتە جۇرت تالقىسىنا شىعارعان ەدى.

«جالپى حالىققا تانىمال مۋزىكانتتاردىڭ پرەزيدەنتكە  حات جازۋىنا نە سەبەپ بولدى؟ سول باياعى... داۋدىڭ ورتاسىنداعى تاعى دا مادەنيەت ءمينيسترى اقتوتى رايىمقۇلوۆا. جۇرت ونىڭ قىزمەتىنە كوڭىلدەرى تولمايدى. پرەزيدەنتتەن وسى ىسكە ارالاسىپ، شەشىم قابىلداۋىن سۇراۋدا.

بۇل ونەر يەلەرىنىڭ مەملەكەتتىڭ ءبىرىنشى تۇلعاسىنا قايرىلىپ، حات جازعان ءبىرىنشى جاعدايى ەمەس. وسىعان دەيىن توقاەۆقا ەسىمى ەلگى بىلگىلى كينوگەرلەر حات جازدى. ونىڭ الدىندا تەاتر قايراتكەرلەرى دە جازعان. ەندى كىتاپحاناشىلار مەن مۋزەي قىزمەتكەرلەرى جازۋى كەرەك شىعار. بالكىم، سوندا ەستىر؟

تاعى كىمدەر وسى مينيسترلىكتىڭ قول استىندا؟ سپورتشىلار؟ اناۋ ۆيتسە-ءمينيستردى ءبىر سومكەمەن اۋەجايدى ۇستاعان جوق پا؟ نە بولدى؟ ەشتەڭە دە بولعان جوق. وتىرعان ورنىندا وتىر»، - دەپ جازعان ەدى تۇرسىنوۆ.

مۇسايبەكوۆ 2020 جىلدىڭ مامىر ايىنان باستاپ مادەنيەت جانە سپورت مينيسترلىگى باسشىسىنىڭ ورىنباسارى قىزمەتىن اتقارعان.

ايتا كەتەيىك، 2020 جىلدىڭ ناۋرىز ايىندا مەملەكەتتىك قىزمەتكەر جەمقورلىقپەن ۇستالسا، باسشىسى ءوز ەركىمەن قىزمەتتەن كەتۋى ءتيىس دەگەن زاڭ كۇشىنە ەندى. جاڭا ەرەجەگە ساي قاراماعىنداعى قىزمەتكەرى پارا العان باسشى سوت ۇكىمىنەن سوڭ 10 كۇننىڭ ىشىندە قىزمەتىن بوساتۋى كەرەك.

وسىعان بايلانىستى ۆيتسە-مينيستر مۇسايبەكوۆتىڭ كىناسى سوتتا دالەلدەنسە، مينيستر رايىمقۇلوۆا وتستاۆكاعا كەتە مە دەگەن ساۋال قوعام ىشىندە ءبىراز تالقى بولعان.

Abai.kz