«ۇلتتىق كينونى قولداۋ» مەملەكەتتىك ورتالىعىندا قازاقستاننىڭ حالىق ءارتيسى، تانىمال كينو اكتەرى نۇرجۇمان ىقتىمباەۆ مەرەيلى 80 جاسى ارنايى اتاپ ءوتىلدى.

قازاق كينوسىنىڭ ارداگەرىنە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ قۇتتىقتاۋ حاتىن جولدادى.

«قۇرمەتتى نۇرجۇمان بايجۇمانۇلى! ءسىزدى وتانداستارىمىز كينو ونەرىندە وزىندىك قولتاڭباسى بار تانىمال تۇلعا رەتىندە جاقسى بىلەدى جانە قۇرمەتتەيدى. جارتى عاسىردان استام ۋاقىت بويى ەكى جۇزدەي كينوكارتيناعا ءتۇسىپ، كۇردەلى، بولمىس-ءبىتىمى بولەك رولدەردى اسقان شەبەرلىكپەن سومداي ءبىلدىڭىز. تابيعي دارىنىڭىزدى وتاندىق جانە شەتەلدىك رەجيسسەرلەر مەن سىنشىلار قاشاندا جوعارى باعالايدى. ءاربىر كەيىپكەردىڭ جاندۇنيەسىن اشا بىلەتىن قابىلەتىڭىز بەن تالماي ىزدەنۋدىڭ ناتيجەسىندە كورەرمەندەردىڭ رياسىز قوشەمەتىنە يە بولىپ كەلەسىز. ەلىمىزدىڭ رۋحاني-مادەني بايلىعىن دامىتۋعا ءسىزدىڭ قوسقان ۇلەسىڭىز وتە مول. مەرەيتويىڭىز قۇتتى بولسىن!» دەلىنگەن مەملەكەت باسشىسىنىڭ قۇتتىقتاۋ لەبىزىندە.

مەرەيتوي يەسىن قر مادەنيەت جانە سپورت ءمينيسترى اقتوتى رايىمقۇلوۆا دا قۇتتىقتادى.

«قۇرمەتتى نۇرجۇمان بايجۇمانۇلى! ءسىز تۇسكەن فيلمدەر، ءسىز سومداعان الۋان ءتۇرلى وبرازدار كورەرمەندەردىڭ بىرنەشە بۋىنىنىڭ دۇنيەتانىمىن قالىپتاستىرىپ، ومىرلىك ۇستانىمىن ايقىنداپ، رۋحاني دامۋىنا ۇلەس قوستى. دارا دارىنىڭىز بەن ەسەلى ەڭبەگىڭىزدىڭ ارقاسىندا ءسىز قازاق ونەرىن الەمگە تانىتىپ جۇرگەن ماقتانىشىمىزعا اينالدىڭىز. سەكسەننىڭ سەڭگىرىنە شىققان مەرەيلى كۇنىڭىز قۇتتى بولسىن!» دەلىنگەن جەدەلحاتتا.

نۇرجۇمان ىقتىمباەۆپەن ءتۇسىرۋ الاڭدارىندا تالاي رەت بىرگە تەر توككەن ساحنالاس ارىپتەستەرى دە وعان دەگەن جۇرەكجاردى لەبىزدەرىن ءبىلدىردى. تامارا قوسىباەۆا ەكەۋىنىڭ بىرگە ويناعان فيلمدەرىن ەسكە السا، دوسحان جولجاقسىنوۆ نۇرەكەڭ ەكەۋىنىڭ ءبىر ۇستازدان (ابدوللا قارساقباەۆتان) ءتالىم العانىن ماقتانىش تۇتاتىنىن جەتكىزدى. رۇستەم ءابدىراشوۆ وسىدان بىرەر جىل بۇرىن چۋۆاشيادا وتكەن كينوفورۋمدا ن.ىقتىمباەۆتىڭ «ەڭ ۇزدىك ەر ادام ءرولى» اتالىمىندا جەڭىسكە جەتكەنىن، بىراق ءتۇرلى سەبەپتەرگە وراي ەستەلىك-سىيلىقتىڭ كەشىگىڭكىرەپ قولعا تيگەنىن ايتا كەلىپ، چەبوكسارىدان كەلگەن ستاتۋەتكانى اكتەرگە تابىستادى. رەجيسسەر سونداي-اق بۇگىنگى مەرەيتوي يەسىنىڭ كەزىندە «قۇراق كورپە» فيلمىندە تارتقان دومبىراسىن ارنايى شەبەرگە جوندەتىپ، جاڭارتىپ، اكتەرگە تارتۋ ەتتى.

1941 جىلدىڭ 14 مامىرىندا قازىرگى الماتى وبلىسى، كەربۇلاق اۋدانى، التىنەمەل اۋىلىندا دۇنيەگە كەلگەن ن.ىقتىمباەۆتى كورەرمەن قاۋىم «قيلى كەزەڭ»، «بالالىق شاققا ساياحات»، «مانشۇك تۋرالى اڭىز»، «اتاماننىڭ اقىرى»، «ىستىقكولدىڭ القىزىل گۇلدەرى»، «كوكسەرەك»، «ادامدار اراسىنداعى» بولتىرىك»، «كەشىككەن ماحاببات» جانە ت.ب. فيلمدەردەگى رولدەرى ارقىلى جاقسى تانيدى.

قۇرالاي مولداشقىزى 

Abai.kz