جارىلقاسىن داۋلەت، سازگەر-ساتيريك:

- كەزىندە ينتەرمەديالارىڭىزبەن «تاماشا» ويىن-ساۋىق وتاۋىنان كورىنىپ ءجۇردىڭىز. جەكە تەاتر اشسام دەگەن ويىڭىز بولعان جوق پا؟

جارىلقاسىن داۋلەت، سازگەر-ساتيريك:

- كەزىندە ينتەرمەديالارىڭىزبەن «تاماشا» ويىن-ساۋىق وتاۋىنان كورىنىپ ءجۇردىڭىز. جەكە تەاتر اشسام دەگەن ويىڭىز بولعان جوق پا؟

- 1989 جىلى رەسپۋبليكالىق «جىگەر» فەستيۆالىنە قاتىستىم. مەنى لاۋرەاتتىققا ۇسىنعان بولاتىن. بىراق ول كەزدە نەگە ەكەنى بەلگىسىز،  ساتيريكتەردى ونشا-مۇنشا جاقتىرمايتىن. باسقا توپتان بالاپان بازار ءتۇستى. ساتيراعا دەگەن كوزقاراستىڭ تومەندىگى سونداي، ەكەۋمىز ءتىپتى ديپلومانت تا اتانا المادىق. سوڭىندا «جالىن» جۋرنالىندا كەزدەسۋ ءوتتى. سول جۋرنالدىڭ قىزمەتكەرلەرى: «سىزدەر اۋىلدارىڭىزعا بارىپ، جۇمىستارىڭىزدى ىستەي بەرىڭىزدەر، «الماس قىلىش قىن تۇبىندە جاتپاس» دەگەندەي، الماتى سىزدەردى ءتۇبى وزىنە تارتادى» دەدى. شىنىندا دا، «جالىن» جۋرنالىنان جۇمىسقا شاقىرتۋ كەلدى. ءسويتىپ مۇحتار شاحانوۆتىڭ قاراماعىندا جۇمىس ىستەدىم. ءوزىم ساتيريكپىن، قاراپ جۇرمەي «تاماشاعا» ينتەرمەديامدى اپارىپ بەردىم. اۋىلدا توي-تومالاقتاردا اسابا بولاتىنمىن. ولار قۋانىپ جاتا جابىسسىن. جازىپ تا ءجۇردىم. «تاماشاعا» شىعىپ تا ءجۇردىم. الايدا ماعان تاڭداۋ ءتۇستى: نە «تاماشادا»، نە جۋرنالدا ىستەۋ كەرەك بولدى. ءسويتىپ مەن جۋرنالدا ىستەمەسەم، جۇمىسسىز قالاتىنداي، باسىلىمدا قالۋدى ءجون كوردىم. «تاماشاعا» اندا-ساندا عانا قاتىسىپ ءجۇردىم. تۇبەگەيلى كەتە المادىم. سول كەزدەرى پسيحولوگيامىز سولاي بولدى ما؟ كىم بىلگەن؟ ءسويتىپ جۇرگەندە بارىنەن اجىراپ قالدىم. توقىراۋ جىلدارى نە ىستەرىمىزدى بىلمەي داعداردىق. جۇرتتىڭ ءبارى بيزنەسپەن اينالىسا باستادى. سول كەزدە ويعا قالدىم: «ولجاس سۇلەيمەنوۆ، ول - بيزنەسمەن. سودان كەيىن باي تۇرادى. مۇحتار شاحانوۆ بيزنەسمەن بولماسا دا جاعدايى جاقسى، تۇرمىسى ءتۇزۋ. ەكەۋى دە مىقتى جازادى. بايلىق دەگەن جازۋعا كەدەرگى كەلتىرمەيدى ەكەن عوي. اۋەلى بايىپ الايىن، سوسىن جازامىن»، - دەپ ويلادىم. العاشىندا التى ايدىڭ ىشىندە بايىپ كەتەتىندەي بولدىم. سودان ون ءتورت جىل بويى بيزنەستىڭ سوڭىنان ەلەس قۋالاپ ءجۇردىم عوي. اقىرىندا جەۋگە نان تاپپاي قالدىم. جاسىرىپ قايتەم؟ ايەلىمنىڭ تۋعان كۇنىنە سەيىتحان زەبەرحانۇلى دەگەن دوسىم گۇل اكەلگەن. ەرتەسىنە سول گۇلدى ساتىپ، اقشاسىنا نان العان كۇندەرىمىز بولعان. مەن بيزنەستى تۇك تۇسىنبەيدى ەكەنمىن.

- بيزنەستى مۇلدە تۇسىنبەسەڭىز، باسپانى قالاي قۇرىپ، تاپسىرىستاردى قالاي ورىنداپ ءجۇرسىز؟

- مەن ءجۋرناليستپىن، ساتيريكپىن عوي. ال بيزنەس دەگەن مۇلدە بولەك الەم ەكەن. ودان بىردەڭە وندىرمەي قايتۋ - نامىس. «ماتاي» قورى دەگەن بولدى. سولارمەن ارى ءجۇرىپ، بەرى ءجۇرىپ، اقىرىندا ماعان جامان «جيگۋلي» دە بۇيىرمادى. سودان ولارمەن ات قۇيرىعىن كەسىسىپ كەتتىم. مەن ولارعا ميلليوندارىن شاشىپ ىستەي المايتىن تىرلىكتەرىن تىندىرىپ بەرگەنمىن. «ەگەمەن قازاقستان»، «جاس الاش»، «قازاق ادەبيەتى» گازەتتەرىنىڭ قىزمەتكەرلەرى مەنى تانيدى، سىيلايدى. الگى قوردىڭ جارناماسىن بەت-بەت قىلىپ شىعارتتىم. ولار دۇرىس تۇسىنبەدى مەنى... ارادا قانشا جىل ءوتتى. بارىنەن قول ءۇزىپ كەتكەم. ەشتەڭە جازا الماي قالىپپىن. «تاماشاعا» شاقىردى. وندا بارعاندا دا مەن ەشتەڭە جازا المادىم. سودان ءبىر كۇنى ءان جازا باستادىم. مەنىڭ اندەرىمدى ەڭ مىقتى جۇلدىزدار ايتا باستادى. سودان ءان جازۋعا كىرىستىم. «ەگەر شىعارعان ءانىڭدى جۇلدىزدار ورىنداماسا، وندا قويا قويۋ كەرەك»، - دەدىم. سويتسەم، ول ويىم قاتە ەكەن. ونى كەيىننەن ءبىلدىم. مەنى تۇڭىلۋدەن دە، مۇجىلۋدەن دە قۇتقارىپ قالعان وسى اندەرىم بولدى. تۇڭعىشباي اعامىز، ەركىن نۇرجانوۆ، ماقسات بازارباەۆ اندەرىمدى ورىنداپ ءجۇر بۇگىندە...

- اندەرىڭىزدى قانشاعا باعالايسىز؟

- جوق، وسى كۇنگە دەيىن ءانىمدى ساتقان ەمەسپىن. بىراق كوڭىلىمە جاقپاعان انشىلەرگە ۋادە بەرىپ قويىپ، ولار قايتا-قايتا سۇراعىشتاپ، قىتىعىما تيسە عانا ساتامىن. ال جالپى، ساتپايمىن. ءان ساتپايتىن سەبەبىم، ءوزىمنىڭ باسپانام بار، باسپاحانام بار. ءبىراز كومپوزيتورلار ماعان: «اقشاعا الماعاسىن قادىرى بولمايدى. ارانجيروۆكا جاساپ جاتسا دا، قالتاسىنان اقشاسى شىقپاعاسىن كەرەمەت ەتىپ جاساۋعا قۇلشىنبايدى. سەن ولاردىڭ پسيحولوگياسىن تۇسىنبەيسىڭ. سوندىقتان اقشاسىنا سات»، - دەپ اقىل ايتتى. دەگەنمەن ولاردىڭ ايتقانىن ورىنداۋ قولىمنان كەلمەي جاتىر. بۇگىندە بىزدە ونەر باعالانبايدى. ءان تۇرماق، ءسىزدىڭ پوۆەسىڭىزدى دە، رومانىڭىزدى دا ەشكىم باعالامايدى. ءوز اقشاڭىزبەن شىعارىپ الاسىز. قايتا انشىلەر حالىقتىڭ ارقاسىندا 3-5 مىڭ دوللارعا ءان ساتىپ الۋعا شامالارى كەلەدى. سونىڭ ارقاسىندا ءان جازۋ پايدالى بيزنەس كوزىنە اينالىپ جاتىر. كەيبىرەۋلەر ءانىن ساتىپ كۇنىن كورىپ ءجۇر. ال ادەبي كوركەم شىعارمالارعا وبال-اق بولىپ تۇر. مەملەكەت ساتىپ المايدى. باسپالار دا اقشاسىن شىعىنداعىسى جوق. ويتكەنى 16-اق ميلليون حالىق بار ەلىمىزدە. سونىڭ 8 ميلليونى عانا قازاق، ونىڭ جارتىسى ورىستىلدىلەر. كىتاپ وقيتىنى 1 ميلليونعا جەتەر-جەتپەس. ال وسى كىتاپسۇيەر قاۋىمعا سونشاما تەر توگىپ جازعان ەڭبەكتىڭ كەرەگى بار ما، جوق پا؟ مىنە، ماسەلە وسىندا. ويتكەنى ءار وقىرماننىڭ تالعامى ءار باسقا. وسىنداي ماسەلەلەردەن كەيىن كىتاپقا دەگەن سۇرانىس ازايادى. ال شوۋ بيزنەس كوتەرىلىپ كەلەدى. جاقسى اندەر 1-1,5 مىڭ دوللار تۇرادى. ءاننىڭ دەڭگەيىنە قاراي 200, 400 دوللار تۇراتىندارى دا بار. ءار نارسەنىڭ ءوز باعاسى بار. كومپوزيتورلار: «انشىلەر ءبىزدىڭ ءانىمىزدى ايتىپ ءار تويدا 3-5 مىڭ دوللار تابادى. نەگە ءبىز اندەرىمىزدى قىمباتقا ساتپايمىز؟»، - دەيدى. بۇل تەك شوۋ بيزنەستىڭ اينالاسىندا بولىپ جاتقان ماسەلەلەر. باسقا ونەردىڭ اينالاسى «ءولى ايماق» سياقتى.

- ءسىز اقىن، سازگەر، ساتيريكسىز. جانىڭىزعا جاقىنى قايسى؟

- مەن ەڭ اۋەلى ساتيريكپىن. ودان كەيىن عانا اقىنمىن. بىراق  اقىن بولىپ جەكە ولەڭ كىتابىن شىعارعان ەمەسپىن. ايتسە دە، ولەڭ جازامىن. مەنىڭ انىمە كەيبىر اقىندار ولەڭ جازىپ بەرسە ناشار شىعادى دا، سودان سوڭ ونى وزىمە قايتا جازۋعا تۋرا كەلەدى. سازگەرلىككە كەلسەك، اللا جۇرەگىمە نۇر قۇيىپ تۇرعان كەزدە، قالاي دا ءان جازامىن. كەيدە ەكى ونەر ءبىر-بىرىنە كەدەرگى كەلتىرەدى، ارينە. ساتيرا جازۋ ءۇشىن بولەك پسيحولوگيا كەرەك. ماسەلەن، ءبىر جاپىراق ۇزىلگەلى تۇرسا اقىن بىلاي دەپ جازادى: «و، جاپىراق سەن ءىلىنىپ تۇر ەدىڭ، دىرىلدەپ، دىرىلدەپ جەرگە ءتۇستىڭ. سەنىڭ تاعدىرىڭ مەنىڭ تاعدىرىما ۇقساس. تابانىمنىڭ استىنا ءتۇسىپ قالدىڭ-اۋ»، - دەيدى. ال ساتيريك بولسا: «بايعۇس جاپىراق، سەلتەڭدەپ تۇرىسىڭ جامان ەدى، ساۋاپ بولدى. ساعان سول كەرەك»، - دەيدى. ويتكەنى ەكەۋىندە ەكى ءتۇرلى پسيحولوگيا. ەكى ءتۇرلى وي-ءورىس. ساتيريك بولۋ ءۇشىن كەز كەلگەن نارسەدەن ۇنەمى كۇلكى تۋدىرۋ كەرەك. ال اقىن بولۋ ءۇشىن كەز كەلگەن نارسەدەن فيلوسوفيالىق وي ءتۇيۋىڭ كەرەك.

- قازىرگى تاڭدا ساتيرا سالاسى كەنجەلەپ قالدى دەپ سىن ايتۋشىلار كوپ. ماسەلەن، رەسەيدە ءبىر ساتيريكتىڭ ءوزى - ءبىر تەاتر. بىزدە نەگە ولاي ەمەس؟

- رەسەيدە حالىق تەرەڭ دۇنيەنى قابىلدامايدى. كوز الدىنداعى كورىنىسكە كۇلە بەرەدى. ولاردىڭ ىشەگى ءتۇيىلىپ قالاتىن ءازىلىن قازاقشاعا اۋدارساڭ، قازاقتار وعان كۇلمەك تۇگىلى، تىڭدامايدى دا. مىسالى، زادورنوۆقا مىڭداعان حات كەلەدى. ءبىر شىعارماسىن سول مىڭداعان حاتتىڭ جيىنتىعىنان قۇراستىرا سالادى. بىزدە ءويتىپ حات جازاتىندار جوق. ال قازاقتىكى فيلوسوفيالىق كۇلكى. قازاقتى كۇلدىرۋ قيىن. قازاقتار استارلاپ سويلەگەن. سونى تۇسىنە بىلگەن. سونىڭ استارىنا كۇلىپ ۇيرەنگەن حالىق. مىسالى، كوپەن امىربەك كەزىندە ورىستىڭ ساتيراسىن سول كۇيىندە الىپ قازاققا ۇسىندى. كۇلدىرەم دەپ ويلادى. 1 مامىردا «امەريكادان وزايىق، العا..» دەگەن سياقتى ۇران تۋرالى. بىرەۋ «العا وزباي-اق قوي، شالبارىڭنىڭ جىرتىعى كورىنىپ قالادى دەپ ايتادى» دەيدى. قازاق وعان ەزۋ دە تارتقان جوق. تۇككە كەرەگى بولمادى. سوسىن قانداستارىمىزعا قيمىل-قوزعالىستىڭ كۇلكىسى كەرەك. قيمىل-قوزعالىستىڭ دا استارى بار. سونى ءتۇسىنىپ كۇلەدى. وسىنداي استارلى تەرەڭ دۇنيەگە ساتيريكتەرىمىز بارا الماي جاتىر. تەرەڭدەپ بارىپ جاتقان تەك «شانشار» تەاترى عانا. ولار قيمىلمەن دە ادامعا وي تاستايدى. قيمىلمەن ءسوز ايتادى. قيمىلدىڭ استارىندا كۇلكىلى سوزدەر تۇر. سونى  قازاقتار ءتۇسىنىپ قويادى. قيمىلمەن استارلى وي ايتقان «باۋىرجان-شوۋ» بولدى كەزىندە. استارلى كۇلكى جاسادى.

- ءسىز بۇگىندە باسپاگەرسىز عوي. باسپا ىسىمەن اينالىسۋ قانشالىقتى قيىن؟ قانشالىقتى ءتيىمدى؟

- باسپا ۇستاۋ - باسپاحانا ۇستاۋ دەگەن ءسوز ەمەس. كەيبىرەۋلەر كۇلدىبادام دۇنيەسىن باسپاحاناعا اپارادى دا، باستىرا سالادى. ارزان ەتىپ شىعارىپ بەرەدى. ال باسپادا اكەلىنگەن دۇنيەنىڭ ءبارىن باستان-اياق ءسۇزىپ شىعادى. رەداكتور وقيدى. رەداكتسيالايدى. كوررەكتور تۇزەيدى. تەك سودان كەيىن عانا باسپاحاناعا جىبەرەدى. ال اۆتور وزىنىكىن «التىن» دەيدى دە، ارزان جاعىنا جۇگىرەدى. كاپيتاليستىك پسيحولوگيا - ارزانعا شىعارىپ، قىمباتقا ساتۋ. باسپاحانامىز دا بار. نارىقتىڭ سىناعىنا توتەپ بەرە الامىز. كىتابىن شىعارعىسى كەلەتىندەرگە: «شىعارماڭىزدى دۇرىستاپ شىعارعىڭىز كەلسە، رەداكتسيالاتىڭىز. ارزان كەرەك پە، ونى دا ىستەيمىز. كۇلدىبادام دۇنيە شىعارعىڭىز كەلسە، ول دا ەركىڭىزدە»، - دەيمىز. مەن ءبىلىپ وتىرمىن. ءسىز قازىر ماعان: «كۇلدىبادام دۇنيەنى نەگە باسىپ شىعاراسىز؟» دەپ سۇراق قويعالى وتىرسىز. ويتكەنى مەن اۆتورعا ەڭ اۋەلى ادام دەپ قارايمىن. ماسەلەن، ءبىر ادام كىشكەنتاي نارسەدەن اقشا تاۋىپ، قىزىنا التىن جۇزىك اپەرىپ،ول  باقىتتى بولدى دەپ قۋانادى. «اكەلىك پارىزىمدى ورىندادىم»، - دەيدى. ادام دا سونداي. كىتاپ جازسا، ۇرپاعىنا بىردەڭە قالدىرعىسى كەلگەنى. ول دا پەندە. كۇلدىبادام بولسا دا و دۇنيەگە كەتكەندە كىتاپ جازىپ كەتتىم دەيدى. مۇمكىن جەتىنشى ۇرپاعى سول كىتاپتان ءبىر ونەگە الىپ قالسا، ول دا دۇرىس. ول وقىرمان ءۇشىن ەمەس، ءوزىنىڭ ۇرپاقتارى ءۇشىن جازدى. ال دۋلات يسەبەكوۆ، عابباس قابىشەۆ حالتۋرا جازسا، مەن ونى باسىپ شىعارسام، كەشىرىلمەيتىن كۇنا سول. ويتكەنى ادەبيەت ايدىنىنىڭ الدىندا جۇرگەن مۇحتار شاحانوۆتى، دۋلات يسابەكوۆتى ادەبيەتتى وقيتىن ادام «ءبىزدى العا سۇيرەۋشىلەر» دەپ تۇسىنەدى. سول ءۇشىن وقيدى. وسى ەكەۋىنىڭ ارا-جىگىن اجىراتىپ الۋىمىز كەرەك.

- ال وسىدان كەلىپ وقىرمان تالعامىن تومەندەتۋگە ۇلەس قوسىپ جاتىرمىز دەپ ويلامايسىز با؟

- مىسالى، حالتۋرششيك انشىلەر بۇرىن دا بولعان. بۇگىن دە جوق ەمەس. سونىڭ ىشىنەن سارالانىپ تەك تابيعي تالانتتارى عانا ەكشەلىپ شىعادى. كىتاپ تا سولاي. ءاۋ باستا باسپاعا كەلگەندە مەن ونى جازۋشى دەپ ەمەس، ادام دەپ قابىلدايمىن. ال كىتابىن وقىپ شىققان سوڭ بىرەۋىن جازۋشى، بىرەۋىن ادام دەپ شىعارىپ سالامىن. جازۋشىلارعا: «كوررەكتورعا قوسىمشا اقشا تولەڭىز، تىنىس بەلگىسى قالىپ كەتسە سويلەمنىڭ ماعىناسى وزگەرىپ كەتەدى. تۇسىنەسىز عوي. رەداكتور قابىلداساڭىز قايتەدى؟ ءسىزدىڭ ستيلىڭىزبەن اقىلداسىپ وتىرادى»، - دەپ تۇسىندىرۋگە تىرىسامىن. جازۋشىلاردىڭ كوبىسى: «كوررەكتوردىڭ قاجەتى جوق، ءوزىم وقيمىن. ءۇتىر، نۇكتەنى ءوزىم دە بىلەم عوي»، - دەيدى. وعان دا كەلىسەمىز. كۇلدىبادام دۇنيەنىڭ كۇنى ءوتىپ بارا جاتىر. ونى وقىمايمىن. تالعامى جوعارى وقىرمان دا سولاي ەتەدى دەپ ويلايمىن.

- مەملەكەتتىك تاپسىرىسپەن كىتاپ شىعاراسىزدار ما؟

- وبلىستارداعى تەندەرلەرگە كوپ قاتىسامىز. ال مينيسترلىكتىڭ تەندەرىنە ءالى قاتىسقان جوقپىز. شىنىمدى ايتايىن، تەندەردەن جەڭىپ شىعۋ ءۇشىن تانىسىڭ بولۋى كەرەك. پروتسەنتىن الدىن-الا بەرۋىڭ كەرەك. بۇكىل باسپا سوعان قاتىسۋعا جۇگىرەدى. شىبىنشا ۇيمەلەيدى. جوعارىدان بولىنگەن اقشانى ورتاداعى ءبىر پىسىقتار تۋ-تالاقايىن شىعارادى ءوستىپ.

- كىتابىن باستىرام دەپ بارعان جازۋشىلاردىڭ كوڭىلىنەن شىعاتىنداي رەداكتورلارىڭىز، ماماندارىڭىز قانشالىقتى ساۋاتتى؟

- كوپ جىل جۇمىس ىستەگەن ماماندارىمىز بار. ماسەلەن، ءبىر ساتيريك كىتابىن الىپ كەلسە، عابباس قابىشەۆ، قاجىتاي ءىلياسوۆ سياقتى اعالارىما: «مىنا جاس جەتكىنشەك ءوسىپ كەلەدى ەكەن. سونىڭ دۇنيەسىن رەداكتسيالاپ بەرسەڭىز قايتەدى؟ مىنانشا قالاماقىسى»، - دەيمىن. ءبىز كەلىسىمشارتپەن جۇمىس ىستەيمىز. وتى بار جاس اقىندار كەلسە، مىقتى اقىندارىمىزعا قولقا سالامىز. كەيدە ولار «مىناعان اقشا تولەمەي-اق قوي. تەگىن قاراپ بەرەيىن»، - دەيدى. وسىنداي جاناشىرلىقپەن قارايتىندار دا كوپ. اۆتوردى شاقىرتىپ الىپ: «سەنى مىقتى اقىن ەتىپ شىعارام، شاكىرتىم بولاسىڭ»، - دەپ قولتىعىنان دەمەيتىندەرى دە بار.

-  بۇگىنگى شوۋ بيزنەس تۋرالى نە ايتاسىز؟

- بىردە قىتايدا بولدىم. سوندا بايقاعانىم، كومپوزيتورلار قىتاي انشىلەرىنە اندەرىن بەرسە ۇيرەنە الماي، مەڭگەرە الماي، ءبىر اپتا، ءتىپتى ءبىر اي جۇرەدى. ال قىتايداعى قازاق انشىلەرى 5-6 ساعاتتا نوتانىڭ جىلىك-جىلىگىن شاعىپ، ءاندى تەز ۇيرەنىپ الادى. تەز قابىلدايدى. قىتاي كومپوزيتورلارى قازاق انشىلەرىنە ريزا بولادى. ولار قازاقتىڭ كۇيلەرىن بەرىلىپ تىڭدايدى. قازىر ول جاقتا قازاقتىڭ اندەرىنە ۇقساتىپ اندەر جازىپ ءجۇر. ال ءبىزدىڭ كەرىتاتپا كومپوزيتورلارىمىز باتىسقا ەلىكتەپ ءان جازادى. بىردە تاكسيگە وتىرسام، ماگنيتوفوندا مەنىڭ اندەرىمدى ويناتىپ جاتىر. سويتسەم مەنىڭ اندەرىمە ول جاقتا كليپ تە ءتۇسىرىپتى، البومدار دا شىعارعان. رەنجىگەن جوقپىن. ءبىراز قىتايدىڭ كومپوزيتورلارىمەن تانىستىم. سويتسەم، قىتايلار قازاقتىڭ كۇيلەرىن جينايدى ەكەن.  قازاقتىڭ اندەرىنىڭ ءبارى ۇرلانىپ جاتىر. قازىر كوپتەگەن شەت مەملەكەتتەردە قازاقتىڭ ۇلتتىق اندەرىنە ەلىكتەپ جازۋ جاڭادان باستالىپ كەلە جاتىر. سونداي ءۇردىس پايدا بولدى. كومپوزيتوردىڭ پوەزياعا دەگەن ساۋاتى وتە مىقتى بولۋى كەرەك. ال ءبىزدىڭ كومپوزيتورلارىمىزدىڭ كوپشىلىگى ساۋاتسىز. ولارعا ولەڭنىڭ داۋىستى دىبىستارى كوپ بولسا، بولدى. كەيبىرەۋلەر: «ءاننىڭ تەكسى جەڭىل بولۋى كەرەك، حالىق تەز تۇسىنەدى»، - دەيدى. ماسەلەن، ەكى ساعاتتىق ايتىس بولسا، حالىق سونىڭ ىشىندەگى سۇبەلى سوزدەردى عانا جاتتاپ الادى. ءۇش-اق مينۋتتىق اندە حالىق تۇسىنبەيتىندەي نە بار؟ كۇن سايىن 30 رەت تىڭدايدى سول ءاندى. ال ءدۇبارا اقىندار مەن تالانتسىز كومپوزيتورلار الگىندەي قاعيدانى ويلاپ تاپتى... ءاننىڭ ءسوزى تەرەڭ بولۋى كەرەك. «سىرعاڭدى قايىق قىلىپ وتكىز مەنى...»، عاجايىپ ءسوز عوي. وسىنداي ولەڭگە ءان جازعان حالىقپىز عوي. ءبىزدىڭ اسىل-جاقۇتتارىمىز تۇرعان كەزدە بىرەۋدىڭ مىسىنا ەلىكتەيتىندەرگە نامىسىڭ كەلەدى. ءشامشى قالداياقوۆ ولەڭ جازعان ەمەس. بىراق پوەزيانى تەرەڭ باعالايتىن، كەرەمەت تالعايتىن. تالعامىنا ساي كەلەتىن كەرەمەت ولەڭدەرگە عانا ءان شىعاردى. تالعامىنىڭ دارالىعىنان، عاجايىپ تالانتىنىڭ ارقاسىندا تاريحتا اتى قالدى.

- سۇحباتىڭىزعا راحمەت!

سۇحباتتاسقان - جاننۇر جۇماش

«حالىق ءسوزى» گازەتى