قازاقستان ەكونوميكاسى بەلسەندى تۇردە قالپىنا كەلىپ جاتىر. بۇل تۋرالى قازاقستان پرەمەر-ءمينيسترى اسقار مامين قر پارلامەنتى پالاتالارىنىڭ بىرلەسكەن وتىرىسىندا مالىمدەدى، - دەپ حابارلايدى Tengrinews.kz. 

پرەمەر-ءمينيستردىڭ سوزىنشە، بەس ايدا ىشكى ءونىم 1,6 پايىزعا وسكەن.

"بيىل قازاقستان ەكونوميكاسى بەلسەندى تۇردە قالپىنا كەلىپ جاتىر. بەس ايدىڭ قورىتىندىسى بويىنشا، جالپى ىشكى ءونىمنىڭ ءوسىمى - 1,6 پايىز. ەكونوميكانىڭ بارلىق سالاسىندا ءوسىم بايقالادى. ماشينا جاساۋ، حيميا ونەركاسىبى، فارماتسەۆتيكا جانە جەڭىل ونەركاسىپ جوعارى ءوسىمدى كورسەتتى. قۇرىلىس سالاسى جانە تۇرعىن ءۇيدى پايدالانۋعا بەرۋ بويىنشا ءوسۋ قارقىنى جوعارى. اۋىل شارۋاشىلىعىندا دا تۇراقتى ءوسۋ قارقىنى بايقالىپ وتىر. قىزمەت كورسەتۋ سالاسىندا دا كورسەتكىشتەر وڭ", - دەدى مامين.

سونىمەن قاتار، پرەمەر-مينيستر وندىرىستىك ەمەس سالالاردا جوعارى ينۆەستيتسيالىق بەلسەندىلىك بايقالاتىنىن اتاپ ءوتتى.

"بيىل مامىردا ازىق-تۇلىك تاۋارلارىنىڭ باعاسى الەم بويىنشا جىلدىق ماندە شامامەن 40 پايىزعا ءوستى. ال قازاقستاندا قابىلدانعان شارالاردىڭ ارقاسىندا ازىق-تۇلىك ينفلياتسياسى 9,3 پايىز بولدى جانە وسى باعىتتا جۇمىس ودان ءارى جالعاسادى", - دەدى ول.

اسقار ءماميننىڭ ايتۋىنشا، ۇكىمەت الدىندا 2021 جىلدىڭ قورىتىندىسى بويىنشا ەكونوميكالىق ءوسىمدى 3,5-4 پايىز دەڭگەيىندە قامتاماسىز ەتۋ جانە 1,2 ميلليون ادامدى جۇمىسپەن قامتۋ مىندەتى تۇر.

Abai.kz