تاعى دا قازاقستان رەسپۋبليكاسىنىڭ
پرەزيدەنتى ق.ك. توقاەۆتىڭ نازارىنا

اسا مارتەبەلى قاسىم-جومارت كەمەلۇلى!

مەن ءسىزدىڭ «يگىلىك بارشاعا! ساباقتاستىق. ادىلدىك. ورلەۋ» اتتى سايلاۋالدى باعدارلاماڭىزدان باستاپ، ءسىز جولعا قويعان جالپى ساياسات پەن بارلىق رەفورمالاردى بار ىنتا-پەيىلىممەن قولداپ كەلە جاتقان اداممىن. اسىرەسە، «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاڭىز بەن «حالىق ۇنىنە قۇلاق اساتىن مەملەكەت» تۇجىرىمداماڭىزعا يمانداي سەنگەن ازاماتپىن. سەنىپ، قولداپ قانا قويماستان، سىزگە كومەكتەسۋدى دە ءوزىمنىڭ باستى پارىزىم دەپ ءبىلدىم جانە وسى باعىتتا شامام كەلگەنشە ارەكەت ەتۋدەمىن.

سوڭعى ون جىلدىڭ كولەمىندە ەلباسى ەرتە جولعا قويىپ، ءسىز جالعاستىرىپ وتىرعان كوشى-قون ساياساتىمەن تىنباي اينالاسىپ كەلە جاتىرمىن. اتالعان سالاعا قاتىستى زاڭدار مەن نورماتيۆتىك قۇجاتتارداعى كەمشىلىكتەردى تۇزەتۋگە ەلەۋلى ىقپال ەتتىم.

«ورالمان» اتاۋىنىڭ «قانداس» دەپ وزگەرتىلۋى، ۇكىمەت ايقىنداعان وڭىرلەرگە قونىستانعان قانداستارىمىز بەن قونىس اۋدارۋشىلارعا بەرىلەتىن كۆوتا سوماسىنىڭ ەكى ەسەگە كوبەيتىلۋى سەكىلدى ءبىراز ماڭىزدى ماسەلە ءوزىڭىزدىڭ تىكەلەي ىقپالىڭىزبەن شەشىم تاپتى. الىستان ورالعان قانداستارىمىز قازىر ونىڭ يگىلىگىن كورىپ وتىر.

ارينە، بۇل – قازاق كوشىنە قاتىستى بارلىق ماسەلە تولىق شەشىلىپ كەتتى دەگەن ءسوز ەمەس. زاڭنامالارداعى ءبىر-بىرىنە سايكەس كەلمەيتىن جانە قازاقستان رەسپۋبليكاسىنىڭ كونستيتۋتسياسىنا قايشى نورمالار، ۋاقىت تالابىنا ساي رەفورمالايتىن تۇستار ءالى دە بار.

سوعان بايلانىستى، «دات» گازەتى (№951-ءشى سان، 11 ماۋسىم، 2021 جىل) ارقىلى ءسىزدىڭ اتىڭىزعا «اشىق حات» جازىپ، پرەزيدەنت اكىمشىلىگىنىڭ ارالاسۋىمەن ادەيى  قابىلدانعان زاڭنىڭ كەسىرىنەن 1982 قانداس وتباسىنىڭ تۇرعىن ءۇي كەزەگىنەن شىعارىلىپ تاستالعانىن جانە «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنىڭ 13 - بابىنىڭ 18 - تارماعى قازاقستان رەسپۋبليكاسىنىڭ كونستيتۋتسياسىنىڭ 14-بابىنىڭ 2-بولىگىنە قايشى ەكەنىن، قاتىستى زاڭناماداعى بۇل قاتەلىكتەردى پرەزيدەنت اكىمشىلىگىنىڭ بىلە تۇرىپ، ادەيى وتكىزىپ جىبەرگەنىن بايانداعام.

مىنە، سودان بەرى ەكى اپتا ءوتتى،  پرەزيدەنت اكىمشىلىگىنەن ەش جاۋاپ الا الماي وتىرمىن.

الەۋمەتتىك جەلى ارقىلى ءوزىم سىيلايتىن پرەزيدەنت اكىمشىلىگىنىڭ باسشىلارىنىڭ اتىنا دا جەكە-جەكە حات جازىپ، سۇراۋ سالىپ كوردىم.

ەشكىم ءۇن قاتقان جوق!

نەگىزى، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوش-قون ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ جوباسى 2020 جىلى ماجىلىستە تالقىلانىپ جاتقان كەزدە بۇل قاتەلىكتى تۇزەتۋ تۋرالى ۇسىنىس بەرىپ، زاڭداستىرا المادىم.

ءبىر تاڭ قالارلىعى، سول كەزدە دە وسى ماسەلە تۋرالى ءسىزدىڭ اتىڭىزعا جازعان «اشىق حاتىم» جاۋاپسىز قالعان بولاتىن.

شاماسى، بۇل جولعى «اشىق حاتىم» دا سىزگە جەتپەگەن ۇقسايدى.

اسا مارتەبەلى قاسىم-جومارت كەمەلۇلى!

ءسىز كەزەكتى جولداۋىڭىزدا ««حالىق ۇنىنە قۇلاق اساتىن مەملەكەت» – بۇل، شىن مانىسىندە، «ادىلەتتى مەملەكەت» قۇرۋ تۇجىرىمداماسى. ازاماتتاردىڭ ماسەلەلەرىن تىڭداپ، كورىپ قانا قويۋ جەتكىلىكسىز. ەڭ باستىسى – دۇرىس جانە ءادىل شەشىم شىعارۋ قاجەت.» دەگەن بولاتىنسىز.

ءوزىم يمانداي سەنگەن سول «حالىق ۇنىنە قۇلاق اساتىن مەملەكەتتىڭ» پرەزيدەنت اكىمشىلىگىنىڭ قانداستارىمىزدىڭ ماسەلەسىنە كەلگەندە ۇنەمى ءۇنسىز قالاتىنى، ەستىمەسكە سالا بەرەتىنى مەنى قايران قالدىرادى. بۇل جاعداي مەنى عانا ەمەس، الىستان ورالعان قانداستارىڭىزدى دا،  ءتىپتى جالپى قاۋىمدى قاتتى تاڭىرقاتۋدا ءارى الاڭداتۋدا.

پرەزيدەنت اكىمشىلىگىنىڭ وسىنداي «كەرەڭدىگىنىڭ» كەسىرىنەن قانداستارىمىزدىڭ وسىعان دەيىن كورگەن بەينەتى، تارتقان ازابى از بولعان جوق. كوز جاستارى كول بولىپ ەڭىرەگەن، قۇجاتتانا الماي سەرگەلدەڭگە تۇسكەن سول قانداستارىمدى ويلاسام، ءالى كۇنگە دەيىن جۇرەگىم سىزداپ، ۇيقىمنان شوشىپ ايانامىن. جانە ول قاتەلىكتەردىڭ مۇرالدىق،  ساياسي جاۋاپكەرشىلىگىن  ەشكىم موينىنا الىپ، زاڭدىق باعاسى بەرىلگەن ەمەس.

ەگەر، «دات» گازەتى ارقىلى مەن كوتەرگەن ەكى ماسەلە ءسىز تاراپىنان ەسكەرىلۋسىز قالسا، وندا ءسىزدىڭ «شەتەلدەگى قانداستارىمىزدى ەلگە قايتارۋ ءىسى ەشقاشان نازاردان تىس قالعان ەمەس، قالمايدى دا. دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز!» - دەپ، قازاقستان رەسپۋبليكاسىنىڭ پرەزيدەنتى رەتىندە قازاق كوشى تۋرالى تۇڭعىش رەت ايتقان كەرەمەت ءسوزىڭىزدىڭ نە قادىرى قالماق؟!

سونداي - اق، الەمەگى بارشا قازاقتىڭ قامقورى بولعان  ەلباسىمىزدىڭ دا ابىرويىنا نۇقسان جەتپەي مە؟!

سەبەبى، كەلگەن قازاقتىڭ ماسەلەسى دۇرىس شەشىم تاپپاي جاتىپ، شەتەلدەگى قانداستارىمىزدى ەلگە قايتارۋ تۋرالى اڭگىمە ايتۋ تىپتەن ورىنسىز ەكەنى بەلگىلى.

ءسىزدىڭ بىرەگەي قولداۋشىڭىز رەتىندە مەنىڭ شىر-پىر بولىپ جانىمنىڭ كۇيەتىن جەرى – وسى.

ۇلتتىڭ تاعدىرى، مەملەكەتتىڭ بولاشاعى دەمەي-اق قويايىن، «تۇرعىن ءۇي قاتىناستارى تۋرالى» زاڭىنىڭ 68-بابىنا «ەگەر، قانداس ساناتىمەن باسپانا كەزەگىنە تۇرعان ازامات قازاقستان رەسپۋبليكاسىنىڭ ازاماتتىعىن العان جاعدايدا، ونىڭ كەزەگى ساقتالادى» دەگەن ەسكەرتپە كىرگىزۋ تۋرالى مەنىڭ بەرگەن ۇسىنىسىمدى قۇشىرلانا سىزعان كەزدە پرەزيدەنت اكىمشىلىگى جاسى سەكسەننەن اسقان ەلباسىنىڭ بەت-بەدەلى مەن ءسىزدىڭ جوعارىداعى تاريحى ءسوزىڭىزدىڭ قادىرىن ويلادى ما ەكەن دەشى؟!

ا، مەن ويلاعام.

مىنە، سول ءۇشىن جانىمدى شۇپەرەككە ءتۇيىپ الىپ، تاعى شىرىلداپ ءجۇرمىن!

مەن ون مىڭعا جۋىق قانداسىمىزدى باسپانا كەزەگىنەن لاقتىرتىپ تاستاپ،  ەلباسىم مەن پرەزيدەنتىمدى ولاردىڭ قارعىس - سىلەسىنە قالدىرۋدى، كىم كورىنگەنگە اششى ءسوز ايتتىرىپ قويىپ، قاراپ وتىرۋدى ەشقاشان، ەشقاشان قالامايمىن!!

مەن جاقسى بىلەم، ءسىز وتە ادىلەتتى، مەيىرىمدى جانە تازا ادامسىز. الدىمەن ءوزىڭىز سەكىلدى ينتەللەكتۋالدى ەليتا قالىپتاستىرىپ، ادىلەتتى مەملەكەت قۇرۋعا بار كۇشىڭىزدى سالۋداسىز. بۇل – بارشا قازاقتىڭ ارمانى-تۇعىن. سوندىقتان، مەن ءۇشىن ءسىزدىڭ ءار ءسوزىڭىز – زاڭ، اسا مارتەبەلى قاسىم-جومارت كەمەلۇلى، ول مۇلتىكسىز اتقارىلۋى كەرەك دەپ ەسەپتەيمىن!!!

وزىڭىزگە دەگەن زور قۇرمەت،
شىنايى دوستىق جۇرەكپەن،

اۋىت مۇقيبەك،

قر پرەزيدەنتى جانىنداعى
ۇلتتىق قوعامدىق سەنىم كەڭەسىنىڭ مۇشەسى.

ەسكەرتۋ: اتالعان ماتەريال «دات» گازەتىنىڭ №953-ءشى سانىندا جاريالانعان.

Abai.kz