الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى، باس مەملەكەتتىك سانيتارلىق دارىگەرى جانداربەك بەكشين بريفينگتە الماتىدا لوكداۋن ەنگىزىلمەيتىنىن ايتتى. بۇل تۋرالى baq.kz سايتى جازدى. 

بەكشين اتاپ وتكەندەي، اۋرۋدىڭ وسۋىنە قاراماستان، قالاداعى دەنساۋلىق ساقتاۋ جۇيەسى ونى جەڭە الادى.

- وتكەن جىلى ءبىز مەديتسينالىق ينفراقۇرىلىمدى دايىندادىق. اتاپ ايتقاندا، توسەك-ورىن جۇيەسى، ءدارى-دارمەكپەن قامتاماسىز ەتۋ. سونىمەن قاتار جەكە قورعانىس قۇرالدارىندا پروبلەمالار جوق. جۇيەنىڭ وعان قاۋقارى جەتەدى. ودان بولەك، قالادا اۋرۋحاناعا جاتقىزۋدا پروبلەمالار جوق، - دەدى قالانىڭ مەملەكەتتىك سانيتارلىق دارىگەرى.

ول بارلىق قىزمەت ءتيىمدى جۇمىس ىستەپ جاتقانىن، سونىمەن بىرگە جۇكتەمەنى جەڭە الاتىنىن ايتتى.

ال جەدەل جاردەمنىڭ نە سەبەپتى كەشىكتىرىلۋىنە قاتىستى ءجۋرناليستىڭ قويعان سۇراعىنا بىلاي دەپ جاۋاپ بەردى.

- جەدەل جاردەمنىڭ كەلۋىن كەشىكتىرۋ جاعدايلارى بولسا، call-ورتالىققا حابارلاسۋ قاجەت، - دەپ ايتتى بەكشين.

ەسكە سالا كەتەيىك، بۇعان دەيىن بەكشين ۆاكتسينا العان 178 ادام قايتا ۆيرۋس جۇقتىرعانى تۋرالى ايتتى.

Abai.kz