قر قورعانىس مينيسترلىگى اۋعانستانداعى جاعدايدىڭ شيەلەنىسۋىنە بايلانىستى قارۋلى كۇشتەردىڭ قىراعىلىعىن كۇشەيتۋ بويىنشا شارالار قابىلدانعانىن مالىمدەدى. 

ەڭ الدىمەن، بۇل - ارنايى وپەراتسيالار كۇشتەرىنىڭ بولىمشەلەرىنە، مايدان جانە اسكەري-كولىك اۆياتسياسىنا، اۋە شابۋىلىنا قارسى قورعانىسقا قاتىستى قابىلدانعان.

«قورعانىس ءمينيسترى وڭىردەگى جاعدايدى قاداعالاۋ جانە تالداۋ، كۇشتەر مەن قۇرالداردىڭ تاۋلىكتىك كەزەكشىلىگىن ۇيىمداستىرۋ بويىنشا مىندەتتەر قويدى. جوعارى قىراعىلىقتى قامتاماسىز ەتۋ ماقساتىندا اسكەري قىزمەتشىلەردىڭ كەزەكشىلىك اتقارۋى بويىنشا جۇكتەمەنى بىردەي ءبولۋ قاجەتتىلىگى اتاپ ءوتىلدى»،- دەلىنگەن مينيسترلىك حابارلاماسىندا.

ال قر قورعانىس ءمينيسترى نۇرلان ەرمەكباەۆ:

- تۋىندايتىن سىن-قاتەردى ۇدايى باعالاپ، قازىرگى ۋاقىتتا ءبىز ءۇشىن اناعۇرلىم ماڭىزدى جانە نەگىزگى كۇشتى قايدا باعىتتاۋ كەرەكتىگىن ايقىنداۋ قاجەت, – دەپتى.

الداعى اپتادا ۆزۆودتاردىڭ جاۋىنگەرلىك وق اتۋى، اسكەري مىندەتتىلەرمەن جيىندار، باتالوندارمەن باقىلاۋ ساباقتارى جوسپارلانىپ وتىرعان اسكەرلەردەگى جاۋىنگەرلىك وقۋ-جاتتىعۋ بارىسى تۋرالى باياندالماق.

باس شتابتىڭ اقپاراتى:

قارۋلى كۇشتەردىڭ قىراعىلىعىن كۇشەيتۋ بويىنشا كەلەسىدەي شارالار قابىلدانعان:

- وقۋ-جاتتىعۋلاردىڭ ءتارتىبى بەكىتىلگەن. قازاقستانعا قانداي دا ءبىر قاۋىپ تونگەن جاعدايدا باقىلاۋشى ءھام كۇزەتشى اسكەري كۇشتەر مەن قۇرىلىمنىڭ ءىس-قيمىل جوسپارى بەكىتىلگەن.

- مەملەكەتتىك ورگاندارمەن، وزگە دە اسكەري ورگاندارمەن، اسكەري قۇرىلىمدارمەن بىرلەسىپ جۇمىس ىستەۋ، ءىس-قيمىل شارالارىن ۇيىمداستىرۋ تاپسىرىلعان.

- مەملەكەتتىك كۇزەت كۇشتەر مەن اۋە قورعانىسى، اۋە فرونتى مەن اۋە كەڭىستىگىن قورعاۋشى كۇشتەردىڭ، اسكەردىڭ سانىن ارتتىرۋ تۋرالى شەشىم قابىلدانعان.

- اسكەري نىسانداردىڭ قاۋىپسىزدىگىنە جاۋاپتى كۇزەتتى كۇشەيتۋ، اسكەري قويمالار مەن قارۋ-جاراق ارسەنالدارىن كۇزەتۋشىلەردىڭ سانىن ارتتىرۋ تاپسىرىلعان.

- ارنايى وپەراتسيالار مەن اسكەري-ترانسپورتتىق اۋە كۇشتەرى قۇرىلىمدارى كۇشەيتىلگەن رەجيمدە جۇمىس جاسايدى.

- مەملەكەتتىك شەكارا كۇزەتىن كۇشەيتۋ بويىنشا قارۋلى كۇشتەردىڭ جوسپارى بەكىتىلدى.

Abai.kz