كەشە ءبىزدىڭ ەلگە رەسمي ساپارمەن رەسەي پرەمەرى ميحايل ميشۋستين كەلدى. ول قازاقستاننىڭ ۇكىمەت باسشىسى اسقار مامينمەن كەلىسسوز جۇرگىزىپ، بىرقاتار قۇجاتتارعا قول قويدى.

ول بويىنشا، قازاقستان مەن رەسەي جالپى سوماسى 5,3 ميللارد دوللاردى قۇرايتىن 30 بىرلەسكەن ءىرى جوبانى ىسكە اسىراتىن بولىپ كەلىسىپتى.

سونىمەن مامين مەن ميشۋستين نە كەلىستى؟ 30 بىرلەسكەن جوبا قانداي سالالاردى قامتىماق؟ قاراڭىز:

اتالعان جوبالار ونەركاسىپتىك كووپەراتسيا، ساۋدا، قۇرىلىس يندۋسترياسى، فارماتسەۆتيكا، مۇناي-حيميا جانە جەڭىل ونەركاسىپ سالالارىندا جۇزەگە اسپاق كورىنەدى.

ەكى ەلدىڭ ۇكىمەت باسشىلارى مىناداي قۇجاتتارعا قول قويعان:

- شىعىس تارۋتين (قازاقستان رەسپۋبليكاسى), تارۋتين (رەسەي فەدەراتسياسى) كەن ورىندارىندا مىس (مىس-التىن) كەندەرىن ءوندىرۋ كەزىندە شەكارا ماڭىنداعى اۋماقتا شارۋاشىلىق قىزمەتتى جۇزەگە اسىرۋ ەرەكشەلىكتەرى تۋرالى ۇكىمەتارالىق كەلىسىم;

- احفو مەن تاتارستان رەسپۋبليكاسى اراسىنداعى ىنتىماقتاستىق جونىندەگى ءىس-شارالار جوسپارى;

- قر ستراتەگيالىق جوسپارلاۋ جانە رەفورمالار جونىندەگى اگەنتتىگى، احقو، «سكولكوۆو» ماسكەۋ باسقارۋ مەكتەبى اراسىنداعى تۇراقتى دامۋ ستراتەگيالارى جونىندەگى ىنتىماقتاستىق تۋرالى مەموراندۋم;

- «باشقۇرت سودا كومپانياسى» اق مەن «كاۋستيك» اق اراسىنداعى ىنتىماقتاستىق تۋرالى باس كەلىسىم;

- قاعازسىز تەحنولوگيا بويىنشا «رتج» ااق جانە «قتج» ۇك» اق/ «قتج-جت» جشس قاتىسۋىمەن جۇكتەر مەن ۆاگونداردى تاسىمالداۋعا كوشۋدى جانداندىرۋ جونىندەگى جول كارتاسى;

- «قتج» ۇك» اق مەن «رتج» ااق اراسىنداعى تەمىر جول كولىگىمەن اگروونەركاسىپتىك ونىمدەردى تاسىمالداۋدى ۇيىمداستىرۋ سالاسىنداعى ىنتىماقتاستىق تۋرالى مەموراندۋم.

سونداي-اق، تاراپتار ساۋدا-ەكونوميكا، ونەركاسىپتىك كووپەراتسيا، كولىك-لوگيستيكا، ەنەرگەتيكا جانە باسقا دا سالالارداعى ىنتىماقتاستىقتى ودان ءارى ارتتىرۋ ماسەلەلەرىن تالقىلادى.

رەسم اقپارات: بۇگىندە قازاقستاندا رەسەيدىڭ قاتىسى بار 7791 كاسىپورىن جانە قازاقستان مەن رەسەيدىڭ بىرلەسىپ اشقان 3325 كاسىپورىن جۇمىس ىستەپ جاتىر ەكەن. رەسەي ءھام رەسەيلىك كومپانيالار قازاقستان ەكونوميكاسىنا سالىنعان قاراجات كولەمى بويىنشا باستى ينۆەستورلاردىڭ بەستىگىنە كىرەدى. سوڭعى 10 جىلدا رەسەي قازاقستانعا شامامەن 12,6 ملرد دوللار ينۆەستيتسيا سالىپتى.

بيىلعى قاڭتار-ماۋسىم ايلارىندا ەكىجاقتى تاۋار اينالىمى 10,7 ملرد دوللاردى قۇراپ، 2020 جىلدىڭ وسى ۋاقىتتاعى كورسەتكىشىنەن 27 پايىزعا ارتىق بولعان ەكەن.

Abai.kz