«ديزەل ەكسپورتى وسى جىلدىڭ ناۋرىزىنان باستاپ توقتادى. ال بەنزيندى ەكسپورتتاۋ قاڭتاردان بەرى توقتاعان. ىشكى سۇرانىس جوعارى بولعاندىقتان، وسىنداي قادامعا بارۋعا ءماجبۇر بولدىق»، - دەدى ۆيتسە-مينيستر.

ەنەرگەتيكا مينيسترلىگى دەرەگىنشە، سۇرانىستىڭ وسۋىنە ىشكى نارىقتاعى باعانىڭ تومەن بولۋى اسەر ەتكەن.

«قازىر ءىرى جانارماي قۇيۋ بەكەتتەرىندە باعا 207-208 تەڭگەنىڭ ارالىعىندا. ال كەيبىر جەلىلەر ديزەلدىڭ ءليترىن 230-240 تەڭگەمەن ساتىپ جاتىر. شىنىن ايتۋ كەرەك، ءبىراز ۋاقىت جانارماي قۇنىن 200 تەڭگەدەن اسىرمادىق. سول كەزدە رەسەيمەن ايىرماشىلىق ليترىنە 100 تەڭگەگە جەتتى. وزبەكستان 70-80 تەڭگە، ال قىرعىزستاندا ديزەل وتىنى 61 تەڭگەگە قىمبات ساتىلدى. باعا ارزان بولعاندىقتان، ترانزيتتىك كولىكتەر قازاقستانعا كىرەر جولدا جانارماي قۇيىپ الۋعا تىرىساتىن. وسىدان كەيىن شەكاراداعى ايماقتاردا سۇرانىس كۇرت ءوسىپ كەتتى»، - دەدى ماعاۋوۆ.

ۆيتسە-مينيستر بىلتىرعى جىلمەن سالىستىرعاندا، بيىل ديزەل وتىنىن تۇتىنۋ 480 مىڭ تونناعا وسكەنىن ايتادى.

«ەلىمىزدە تامىز ايىندا 508 مىڭ توننا ديزەل ءوندىرىلدى. ال سول ايداعى سۇرانىس 519 مىڭ توننانى قۇراعان. بۇل - بۇرىن-سوڭدى بولماعان كورسەتكىش».

مينيسترلىك دەرەگىنشە، قازىر قوردا 210 مىڭ توننا جانارماي قالعان. بۇل كەمى 11-12 كۇنگە جەتەدى. اسەت ماعاۋوۆ ەلدە ديزەل تاپشىلىعىن بولدىرماس ءۇشىن رەسەيمەن كەلىسسوزدەر جۇرگىزىلگەنىن، 100 مىڭ توننا ساتىپ الىناتىنىن مالىمدەدى.

بۇعان دەيىن 1 قازاننان پاۆلودار مۇناي ءوندىرۋ زاۋىتى كۇردەلى جوندەۋگە توقتايتىنى حابارلانعان ەدى.

قازاقستاندا كەيىنگى كۇندەرى جۇرگىزۋشىلەردىڭ نارازىلىققا شىعىپ، جانار-جاعار ماي باعاسىن قىمباتتاتپاۋدى تالاپ ەتەتىنى جايلى اقپارات تاراعان. وسى اپتادا شىمكەنتتە جۇرگىزۋشىلەر بەلسەندىسى ۇستالىپ, ولاردى قولداعانداردان پوليتسيا تۇسىنىكتەمە العان.

Abai.kz