بەيسەنبى, 2 جەلتوقسان 2021
2450 38 پىكىر 1 قازان, 2021 ساعات 15:06

اباەۆ اەس سالۋ كەرەك دەيدى

قر پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ ەنەرگيا تاپشىلىعىنىڭ قاۋپىنە بايلانىستى قازاقستاندا اەس سالۋ يدەياسىن قولدايتىنىن ايتتى. بۇل تۋرالى kznews.kz مالىمدەدى.

«بىزدە قازىردىڭ وزىندە سولتۇستىك پەن وڭتۇستىك اراسىنداعى ەنەرگيا تەڭگەرىمسىزدىگىنىڭ كۇردەلى ماسەلەسى تۇر. اەس – ءسان-سالتانات ەمەس، ومىر سۇرۋگە قاجەتتىلىك. وكىنىشكە قاراي، كۇن دە، جەل دە ءالى كۇنگە دەيىن مۇنداي ارزان ەنەرگيانى بەرە المايدى. بۇل جولدى قولداساق ەنەرگيا تاپشىلىعى جويىلىپ، ەكونوميكانىڭ ەڭسەسى كوتەرىلەدى»، – دەدى داۋرەن اباەۆ “اشىق ديالوگ” باعدارلاماسىندا.

ول چەرنوبىل اتوم ەلەكتر ستانتسياسى مەن فۋكۋسيما-1 اپاتىنا بايلانىستى حالىقتىڭ تۋىنداعان الاڭداۋشىلىعىن تۇسىنۋگە بولاتىنىن قوسىپ ءوتتى. بۇدان بولەك، قازاقستاندىقتار سەمەي يادرولىق پوليگونىنان العان زارداپتارىنان تولىق ارىلعان جوق دەپ ەسەپتەدى ول.

«قورقىنىش ارقاشان بولادى. بىراق بۇگىندە ەنەرگەتيك مامانداردىڭ كوپشىلىگى اتوم ەلەكتر ستانتسياسىن قۇرۋ قاجەتتى قادام ەكەنىنە ءبىراۋىزدان كەلىسەدى. باسقا جولمەن ۇلتتىق ەنەرگەتيكالىق قاۋىپسىزدىكتى قامتاماسىز ەتۋ بىزگە قيىنعا سوعادى. بارلىق كومىرمەن جۇمىس ىستەيتىن جەو قوندىرعىلارىنىڭ جارتىسىنا جۋىعى اۋىستىرۋدى نەمەسە قايتا جوندەۋدى قاجەت ەتەدى. كومىردى پايدالانۋدىڭ ءوزى كومىرتەگى قالدىقتارى دەپ اتالاتىن تولەمدەردىڭ ەنگىزىلۋىمەن قىمباتقا ءتۇسۋى مۇمكىن», – دەدى اباەۆ.

پرەزيدەنت اكىمشىلىگىنىڭ ءبىرىنشى ورىنباسارى بۇگىنگى كۇنى رەاكتورلاردىڭ قۇرىلىسى مەن قاۋىپسىزدىگىنىڭ ناقتى ستاندارتتارى بار ەكەنىن جانە اپات ىقتيمالدىلىعى وتە تومەن ەكەنىن اتاپ ءوتتى. دەگەنمەن دە، سوڭعى شەشىم بارلىق تالقىلاۋلاردىڭ ناتيجەسىندە قابىلداناتىن بولادى.

ەستەرىڭىزگە سالا كەتەيىك، XVII وڭىرارالىق ىنتىماقتاستىق فورۋمىندا رەسەي پرەزيدەنتى ۆلاديمير پۋتين قازاقستان اەس سالاتىن بولسا، رەسەي تاراپى كومەكتەسۋگە دايىن ەكەندىگىن ايتقان بولاتىن.

Abai.kz

38 پىكىر