«ارون اتابەككە ەڭ اۋەلى شۇعىل تۇردە قىمبات ەم-دوم قاجەت جانە «شاڭىراق ءىسى» بويىنشا تولىق اقتالۋى ءتيىس. وعان ويدان قۇراستىرىلعان ايىپتار تاقتى، ونىمەن بىرگە ەرعانات تارانشيەۆ، رۇستەم تۇياقوۆ جانە قۇرمانعازى وتەگەنوۆ كوپ جىلعا زاڭسىز سوتتالدى. ارون شارتتى تۇردە بوساتۋدى دا، "راقىمشىلىق تا", "رەابيليتاتسيا دا" سۇراعان جوق. ول وزدەرىن («شاڭىراق ءىسى» بويىنشا سوتتالعانداردى) تولىق اقتاۋدى تالاپ ەتەدى. اروندى ءىس جۇزىندە ۇيىنە ولۋگە جىبەردى دەپ سانايتىندار كوپ، بىراق جاراتۋشى دۇعامىزدى قابىل ەتىپ، ارونعا بۇرىنعى قاۋقارىن ازداپ بولسا دا قايتارىپ بەرەر دەپ ۇمىتتەنەمىز. ازاماتتىق قوعامنان ەڭ الدىمەن، بوستاندىعىن شەكتەيتىن شەشىمنىڭ كۇشىن جويىپ، اسا ءزارۋ ەم قابىلداۋى ءۇشىن ەش كەدەرگىسىز تەزىرەك شەتەلگە اتتانۋىنا جاعداي جاساۋعا جاردەم سۇرايمىز»،- دەلىنگەن مالىمدەمەدە.
مالىمدەمە اۆتورلارى كوپشىلىكتەن ارون اتابەككە ءبىراز ۋاقىت ەس جيناۋىنا مۇمكىندىك بەرۋىن سۇراپ، مازالاماۋىن دا وتىنگەن.
حابارلامادا ارون اتابەك قاماۋدان شىققانشا ءبىر كەزدە توڭىرەگىندە بولعان جاقىن ادامدارى مەن كۇرەسكەر دوستارى، جاقتاستارى مەن ارىپتەستەرىنىڭ قاتارى سيرەپ، ومىردەن وزعانى ايتىلادى. وندا 2020 جىلى پاندەميا كەزىندە قايتىس بولعان ءىنىسى، 1990 جىلدارداعى ديسسيدەنتتىك قوزعالىسقا اتسالىسقان راشيد حابيبۋللا (نۇتىشەۆ), ارون جايلى ماقالالار جازعان ەربول قۇرمانباەۆ، بيىل دۇنيەدەن وتكەن، «شاڭىراق ءىسى» بويىنشا جۇيەلى تۇردە حابار تاراتىپ، ماقالالار جازعان جۋرناليستەر قازيس توعىزباەۆ، باقىتگۇل ماكىمباي، وپپوزيتسيالىق ساياساتكەر، رەجيسسەر بولات اتاباەۆ، كومپوزيتور باقتيار امانجول، اقىن دۇيسەنبەك ناقىپوۆتىڭ اتى-ءجونى اتالعان.
ايتا كەتەيىك، ارون اتابەك 2006 جىلى الماتىدا بولعان «شاڭىراق» وقيعاسىنا قاتىسقانى ءۇشىن 18 جىلعا سوتتالدى. وعان وقيعا بارىسىندا پوليتسيا قىزمەتكەرىن ءولتىردى دەگەن ايىپ تاعىلىپ، 15 جىلىن پاۆلودارداعى تۇرمەدە وتەدى. ال، 2021 جىلدىڭ 1 قازانىندا پاۆلوداردىڭ №2 سوتى ارون اتابەك دەنساۋلىق جاعدايىنا بايلانىستى جازاسىنىڭ قالعان بولىگىن شارتتى تۇردە وتەسىن دەگەن قاۋلى شىعارعان. سول كۇنى تۇندە ونى جولاۋشى ۇشاعىمەن الماتىعا جەتكىزىلدى. الايدا، ارون اتابەكتى قارسى الۋ ءۇشىن اۋەجايعا جينالعان جۇرتقا كورسەتپەي، ۇشاقتان بىردەن ۇيىنە اپارعان.
Abai.kz
