بەيسەنبى, 2 جەلتوقسان 2021
1423 0 پىكىر 15 قازان, 2021 ساعات 15:10

اۋعان بوسقىندارىنىڭ سانى 15 مىڭنان استى

اۋعانستاننىڭ 500-600 ازاماتى كۇندە تاجىك-اۋعان شەكاراسىنان وتۋگە تىرىسادى، دەپ مالىمدەدى تاجىكستان ۇلتتىق قاۋىپسىزدىك مەملەكەتتىك كوميتەتىنىڭ باسشىسى سايمۋمين ياتيموۆ. ول تمد ەلدەرى قاۋىپسىزدىك جانە بارلاۋ قىزمەتى باسشىلارىنىڭ جينالىسىندا بايانداما جاسادى.

تاجىكستان ۇقمك باسشىسى تاجىك-اۋعان شەكاراسىنداعى جاعدايدى "اسا كۇردەلى" دەپ اتادى. "اسىرەسە سوڭعى ەكى ايدا اۋعانستاننان تاجىكستانعا وتكىسى كەلەتىندەر كوبەيدى. بوسقىندار سانى 15 مىڭنان اسىپ كەتتى", دەدى ياتيموۆ.

ۇجىمدىق قاۋىپسىزدىك جونىندەگى شارت ۇيىمى ورتالىق ازيا ەلدەرىنە بوسقىندار اعىلۋى مۇمكىن دەپ ەسەپتەيدى. "از ۇلتتاردى اتامەكەنىنەن ىعىستىرىپ شىعارۋ، تەرروريزم قاۋپى بوسقىنداردىڭ ورتالىق ازيانىڭ اۋعانستانمەن شەكارالاس ەلدەرىنە اعىلۋىنا سەبەپ بولادى", دەدى ۇقشۇ بىرلەسكەن شتابىنىڭ باسشىسى گەنەرال-پولكوۆنيك اناتولي سيدوروۆ.

رەسەي پرەزيدەنتى ۆلاديمير پۋتين تمد ەلدەرى ارنايى قىزمەتتەرى باسشىلارىمەن كەزدەسۋىندە يراك پەن سيرياداعى سودىرلار اۋعانستانعا جينالىپ جاتىر دەپ مالىمدەدى.

پۋتين تمد ەلدەرى ارنايى قىزمەتىنىڭ ماقساتتارىنىڭ ءبىرى اۋعانستان جاقتان كەلۋى مۇمكىن قاۋىپتى بولدىرماۋ دەپ اتادى.

بيىل 15 تامىزدا "تاليبان" قوزعالىسىنىڭ سودىرلارى كابۋلعا ۇرىسسىز كىرىپ، اۋعانستاندا سوعىس اياقتالدى دەپ مالىمدەدى. قىركۇيەكتىڭ باسىندا اۋعانستاننىڭ ۋاقىتشا ۇكىمەتتىڭ قۇرامىن جاريالادى.

Abai.kz

0 پىكىر