سەمەيدە پەداگوگتەردى كوشە سىپىرۋعا جىبەرگەن لاۋازىمدى تۇلعالار اقىرى اكىمشىلىك جاۋاپكەرشىلىككە تارتىلدى. بۇل تۋرالى قر ءبىلىم جانە عىلىم مينيسترلىگى ەندى اكىمنىڭ ورىنباسارىن جاۋاپقا تارتۋدى سۇراپ وتىر. 

«اڭگىمە سەمەي قالاسى اكىمىنىڭ ورىنباسارى د.ا. گاريكوۆ تۋرالى بولىپ وتىر. سونىمەن بىرگە اكىم ورىنباسارىنا قاتىستى تارتىپتىك شارالار قولدانۋ تۋرالى حات جولداندى. سەمەي قالاسى ءبىلىم ءبولىمىنىڭ باسشىسى ن.ا. فەسەنكوعا قاتىستى سوگىس تۇرىندە تارتىپتىك جازا قولدانىلدى. سونداي-اق ول اكىمشىلىك جازاعا تارتىلدى»، – دەپ حابارلايدى ءبىلىم جانە عىلىم مينيسترلىگىنىڭ ءباسپاسوز قىزمەتى.

مالىمدەمەدە سونىمەن بىرگە №9 مەكتەپ ديرەكتورى ن.ۆ. تەگاي جانە №43 مەكتەپ ديرەكتورىنىڭ مىندەتىن اتقارۋشى ا.ۆ. يسكرينا اكىمشىلىك جاۋاپكەرشىلىككە تارتىلعانى ايتىلعان.

تەكسەرىس بارىسىندا سەنبىلىككە №43 مەكتەبىنىڭ پەداگوگتەرىنەن باسقا №9 مەكتەبىنىڭ دە مۇعالىمدەرى جىبەرىلگەنى انىقتالعان.

ەستەرىڭىزگە سالا وتىرايىق، 16 قازان كۇنى ءبىلىم ءمينيسترى اسحات ايماعامبەتوۆ مەكتەپتەگى ساباقتاردى توقتاتىپ، كوشە سىپىرۋعا جىبەرىلگەن مۇعالىمدەر تۋرالى جازدى.

«سەمەي قالاسىنداعى وقيعاعا بايلانىستى ءبىلىم بەرۋ سالاسىنداعى ساپانى قامتاماسىز ەتۋ باسقارماسى اكىمشىلىك ءىس باستادى، تەكسەرۋ جۇرگىزىلۋدە. قالا اكىمىنىڭ ورىنباسارىنىڭ قاتىسى راستالسا، بۇل لاۋازىمدى تۇلعا جانە باسقا ادامدار اكىمشىلىك جاۋاپكەرشىلىككە تارتىلادى»، – دەگەن ەدى مينيستر.

كەيىن مينيسترگە سەمەي قالاسى اكىمىنىڭ ورىنباسارى دميتري گاريكوۆ جاۋاپ بەردى.

«بۇل جەردە ەشقانداي ارتىق ماسەلەنى كورىپ تۇرعان جوقپىن. بۇل ءبىزدىڭ قالامىز، ءبىز ءوز قالامىزدى تازا ۇستاعىمىز كەلەدى ءارى وسى ۇستانىمدى ۇستاناتىن كەز كەلگەن جان بۇدان ءارى دە سەنبىلىككە قالماي قاتىسادى دەپ ويلايمىن»، – دەپ تۇسىندىرگەن گاريكوۆ.

Abai.kz