بەيسەنبى, 2 جەلتوقسان 2021
1023 2 پىكىر 23 قازان, 2021 ساعات 14:14

اباەۆ: تالىپتەرمەن كەلىسسوز جۇرگىزۋ اقىلعا قونىمدى

قازاقستان پرەزيدەنت اكىمشىلىگى جەتەكشىسىنىڭ ورىنباسارى داۋرەن اباەۆ قازاقستاندىق ديپلوماتتاردىڭ راديكالدى "تاليبان" قوزعالىسى (قازاقستاندا تىيىم سالىنعان) وكىلدەرىمەن كەزدەسۋىنە بايلانىستى پىكىرىن ايتتى.

اباەۆ اۋعانستان بيلىگىنە تالىپتەردىڭ ورالۋىن "ەڭ قولايلى ستسەناري" دەپ اتاي المايتىنىن، بىراق "وزگە كەيبىر توپتارمەن سالىستىرعاندا ونى ەڭ ناشار نۇسقا" دەپ تە ايتۋعا كەلمەيدى دەپ سانايدى.

"تالىپتەر كورشى مەملەكەتتەردى جاۋلاپ الۋدى جوسپارلاپ وتىرعان جوق، سونىڭ ءوزى جاقسى" دەدى اباەۆ "اشىق ديالوگ 2.0" باعدارلاماسى كەزىندە.

ونىڭ ايتۋىنشا، "اۋعانستاندا ەكونوميكالىق جاعداي ۋشىعىپ، تالىپتەر رەجيمى قۇلاسا، ونىڭ ورنىنا ودان دا راديكال توپ "يسلام مەملەكەتى" كەلمەيدى دەپ ەشكىم كەپىلدىك بەرە المايدى".

"وسى تۇرعىدان العاندا، "تاليبانمەن" كەلىسسوز جۇرگىزۋ – ونى جاساماعاننان گورى الدەقايدا اقىلعا قونىمدى شەشىم" دەدى اباەۆ.

جۋىردا قازاقستان پرەزيدەنتىنىڭ حالىقارالىق ىنتىماقتاستىق جونىندەگى ارنايى ۋاكىلى ەرجان قازىحانوۆ باستاعان قازاقستاندىق دەلەگاتسيا كابۋلعا بارعان. پرەزيدەنت اكىمشىلىگى جەتەكشىسى ورىنباسارىنىڭ پىكىرى وسى ساپاردان كەيىن جاريالانىپ وتىر. تامىز ورتاسىندا تالىپتەر كابۋلدى باسىپ العالى بەرى قازاقستاندىق دەلەگاتسيا العاش رەت اۋعانستان استاناسىنا بارىپ وتىر.

كەزدەسۋ كەزىندە ۋاكىل "تاليبان" اكىمشىلىگىنىڭ جوعارى لاۋازىمدى تۇلعالارىمەن كەزدەسىپ، اۋعانستانعا گۋمانيتارلىق كومەك كورسەتۋ جانە ساۋدا-ەكونوميكالىق قارىم-قاتىناستى قالپىنا كەلتىرۋ ماسەلەلەرىن تالقىلاعان. قازاقستاندىق ديپلوماتتاردىڭ ارەكەتى الەۋمەتتىك جەلىدە سىنعا ۇشىرادى. اتاپ ايتقاندا، كەي سىنشىلار بەس مىڭ توننا ۇندى اۋعانستانعا گۋمانيتارلىق كومەك رەتىندە جىبەرۋدى تەرروريزمدى قارجىلاندىرۋ رەتىندە باعالاعان. ودان بولەك، قازاقستان سىرتقى ىستەر مينيسترلىگىنىڭ وكىلى مەن مەملەكەتتىك تەلەارنا ءتىلشىسىنىڭ قارۋلى سودىرلارمەن بىرگە تۇسكەن سۋرەتى دە رەزونانس تۋدىردى.

"گۋمانيتارلىق اپات اۋعاننىڭ ءوز ىشىندەگى ماسەلە عانا ەمەس. ەكىنشى جاعىنان الىپ قاراعاندا، "تاليبان" قوزعالىسىنا سالىنعان تىيىمدى دا الا المايمىز. بۇل ازاماتتارىمىزعا وسى ۇيىمنىڭ مۇشەسى بولۋعا رۇقسات بەرگەندەي اسەر قالدىرادى. بۇل قازىرگى كەزدە اقىلعا قونىمسىز شارۋا" دەدى اباەۆ.

قازاقستان جوعارعى سوتى 2005 جىلى 15 ناۋرىزدا "تاليبان" قوزعالىسىن تەرروريستىك ۇيىم دەپ تانىپ، قىزمەتىنە تىيىم سالعان. اۋعانستان بيلىگىن باسىپ العان ۇيىم 7 قىركۇيەكتە جاڭا ۇكىمەت قۇرامىن جاريالاعان. مينيسترلەر كابينەتىندە بىردە ءبىر ايەل جوق، باسىم بولىگى تەررورشىلار تىزىمىنە ەنگەن "تاليبان" سودىرلارىنان قۇرالعان. اقش تالىپتەر ۇكىمەتىن ۋاقىتشا نەمەسە اۋىسپالى كابينەت دەپ اتاعان.

Abai.kz

2 پىكىر