ەل استاناسى نۇر-سۇلتاننىڭ التى شاقىرىمدىق جەردە ورنالاسقان تالاپكەر اۋىلىنىڭ تۇرعىندارى تاعى دا كوشەگە شىقتى. تەك شىققان جوق، بيلىك تىزگىنىن ۇستاعاندارعا تالاپتارىن ايتىپ، دابىل قاقتى. ولاردىڭ ايتۋىنشا، اۋىل تۇرعىندارىنىڭ باستى تالابى – جول. دالىرەك ايتساق، تەگىس جولدىڭ جوقتىعى. كوكتەم-كۇزدە جاۋىن جاۋسا، جۇرت كوشەگە شىعا المايدى. جۋىردا ونشاقتى ادام (اۋىل تۇرعىندارى) باستاعان ءىستى اياقتاپ، بارلىق جولداردى جوندەۋدەن وتكىزۋدى تالاپ ەتىپتى. Inbusiness.kz سايتى سولاي دەپ جازادى.

بۇل تۋرالى اۋىل تۇرعىندارى Instagram جەلىسىنە اقپار تاراتقان. 2018 جىلى اتالمىش ەلدىمەكەندە جول جوندەۋ جۇمىستارى باستالعان ەكەن. ارادا ءۇش جىل ۋاقىت وتكەن. سول باستالعان جوندەۋ جۇمىستارى ءالى اياقتالماعان. اعىمداعى جىلدىڭ مامىر ايىندا اۋدان اكىمى اۋىل تۇرعىندارىنا ۋادە بەرىپ، جول جوندەۋ ءۇشىن تاعى قوسىمشا 800 ملن تەڭگە بولىنەتىنىن ايتقان ەكەن.

«بۇل ءبىزدىڭ جانايقايىمىز. ءۇش جىلدان بەرى سوزىلىپ كەلە جاتىر. قارجىلاندىرۋ جاعى ءماز ەمەس. كوكتەمدە، كۇزدە مىنا جولمەن ءجۇرى مۇمكىن ەمەس. قوسىمشا 800 ملن تەڭگە بولىنەدى دەپ ۋادە بەرگەن. ەندى ءبىز رەسپۋبليكالىق  بيۋدجەتتىك كوميسسيا بۇل باستامانى ماقۇلداماپتى دەپ ەستىدىك. سودان مىنە، جوندەۋ جۇمىستارى توقتاپ قالدى. كوشەلەردىڭ جوندەۋ جۇمىستارى اياقسىز قالدى. كەلەر جىلى دا ءدال وسىلاي توقتاپ قالۋ قاۋىپى بار، ارينە. ءبىز وسى 800 ملن تەڭگەنى مەردىگەرلەرگە تولەۋدى تالاپ ەتەمىز. BI Group كومپانياسى، «اۆتودور-نس» بولىمشەسىندە وسىدان ەكى اي بۇرىن بولدىق. ولار بىزگە قارايلاسىپ، قازىر ءوز قاراجاتتارى ەسەبىنەن جۇمىستى جالعاستىرماق. بىراق، ولاردىڭ بيۋدجەتى دە تاپشى عوي»، - دەيدى اۋىل تۇرعىنى اماگەلدى مۇراتوۆ.

ال نارازىلىق اكتسياسىنا جينالعاندار: «جول جوق، قاشانعى كۇتەمىز؟ بىزگە ۋادە ەتىلگەن قاراجاتتى اۋدارىڭىزدار»، - دەپ داۋىستادى. ولار سونداي-اق، مەملەكەت قازىناسىنان اۋدانعا ءبولىنىپ جاتقان بيۋدجەتتىڭ قانداي ماقساتتارعا جۇمسالىپ جاتقانىن تەكسەرۋدى دە تالاپ ەتكەن.

«رەسپۋبليكالىق كوميسسيادان ءبىز وسىنى تەكسەرۋدى تالاپ ەتەمىز. قارجى مينيسترلىگىنەن، بدجەتتىك كوميسسيادان، ۇكىمەتتەن اقشانىڭ قايدا جۇمسالىپ جاتقانىن تەكسەرۋدى سۇرايمىز. تاپسىرىس ەرۋشى بار، ونى نەگە قۋدالاپ جاتىر؟ ال جول ساپاسى سىن كوتەرمەيدى. نەگە مۇنى ولار ەمەس، ءبىز باقىلاۋىمىز كەرەك؟ بىزگە كەرەگى قاراپايىم عانا – سۋ، جارىق پەن جول»، - دەيدى اۋىل تۇرعىندارى.

Goszakup.kz سايتىنىڭ دەرەگىنشە، جول جوندەۋ جۇمىستارى 2021 جىلدىڭ جەلتوقسان ايىندا اياقتالۋى ءتيىس ەكەن. تاپسىرىس بەرۋشى رەتىندە «تسەلينوگراد اۋداندىق اۆتوجول جانە جولاۋشىلار تاسىمالى ءبولىمى» مم كورسەتىلگەن. ال ورىنداۋشى «ابك-اۆتودور نس» جشس. تسەلينوگراد اۋدانىنىنداعى تالاپكەر اۋىلىنىڭ ىشكى جولدارىن كۇردەلى جوندەۋدەن وتكىزۋ تۋرالى نەگىزگى كەلىسىمشارت 2019 جىلدىڭ مامىر ايىندا جاسالىپتى. سوماسى – 4,17 ملرد تەڭگە. ول بويىنشا، جەرگىلىكتى بيۋدجەتتەن 2019 جىلى 99 969 تەڭگە، 2020 جىلى 2,3 ملرد تەڭگەدەن استام  جانە 2021 جىلى 1,85 ملرد تەڭگەدەن استام قاراجات بولىنەدى دەپ جوسپارلانىپتى. ال قۇجاتتارعا قاراعاندا تولەمدەر تولىقتاي جاسالماعان. اتقارىلعان جۇمىستار اكتىسىنىڭ مالىمەتىنشە، قازىرگى تاڭدا بەكىتىلگەن سوما – 314,9 ملن تەڭگەنى قۇراپتى.

ەستەرىڭىزگە سالا كەتەيىك، وسىعان دەيىن 2021 جىلدىڭ شىلدەسىندە تالاپكەر تۇرعىندارى بيلىكتىلەرگە شاعىمدارىن ايتىپ، نارازىلىق بىلدىرگەن. ول كەزدە اۋىل تۇرعىندارى اۋىز سۋدىڭ جوقتىعىنا شاعىمدانعان.

Abai.kz