قازاقستان بيلىگى ەلدىڭ سولتۇستىگى مەن شىعىسىنداعى قالالاردى گازداندىرۋدىڭ ەكى نۇسقاسىن قاراستىرۋدا. سونىڭ ءبىرى رەسەيدەن كەلەتىن گاز ماگيسترالدارىنىڭ قۇرىلىسىن قامتيدى. بۇل تۋرالى بەيسەنبى كۇنى ۇكىمەت وتىرىسىندا قر ەنەرگەتيكا ءمينيسترى ماعزۇم مىرزاعاليەۆ ءمالىم ەتتى. 

"بۇگىندە پەتروپاۆل، كوكشەتاۋ، وسكەمەن، سەمەي، پاۆلودار قالالارى گازبەن قامتاماسىز ەتىلمەگەن. بۇل رەتتە بۇل قالالاردى گازداندىرۋدىڭ مىناداي نۇسقالارى بار: "سارىارقا" ماگيسترالدىق گاز قۇبىرىن جالعاستىرۋ نەمەسە رەسەي فەدەراتسياسىنان ماگيسترالدىق گاز قۇبىرلارىن تارتۋ", ​​- دەدى مىرزاعاليەۆ.

ونىڭ ايتۋىنشا، جىل سوڭىنا دەيىن "گازپروم" مەن "قازترانسگاز" سولتۇستىك جانە شىعىس ايماقتاردى گازداندىرۋ بويىنشا ەسەپ-قيساپتاردى جۇرگىزىپ، قولايلى نۇسقانى ازىرلەيدى.

"سارىارقا" گاز ماگيسترالدىق جەلىسى جوباسى اياسىندا قازىرگى تاڭدا جەرگىلىكتى اتقارۋشى ورگاندار گاز تاراتۋ جەلىلەرىن سالۋدا. قۇرىلىستىڭ اياقتالۋى نۇر-سۇلتان، قاراعاندى، تەمىرتاۋ، جەزقازعان قالالارىنداعى بۇرىن كومىرمەن جىلىتىلاتىن 70 مىڭعا جۋىق ءۇيدى گازبەن قامتاماسىز ەتۋگە مۇمكىندىك بەرەدى", - دەپ ءتۇسىندىردى مينيستر.

ول بۇگىندە ەلىمىزدە گازداندىرۋ ۇلەسى 54,3 پايىزدى قۇرايتىنىن اتاپ ءوتتى. 2025 جىلعا قاراي بۇل كورسەتكىشتى 60 پايىزعا جەتكىزۋدى كوزدەپ وتىر.

Abai.kz