زەكەت ءسوزى اراب تىلىندە ءوسۋ، كوبەيۋ، تازارۋ دەگەن ماعىنالاردى بىلدىرەدى. دەمەك، زەكەت بەرۋ ارقىلى مۇسىلمان ادامنىڭ مال-مۇلكىنە اللا تاعالا بەرەكە بەرىپ، كوبەيتە تۇسەدى دەگەن ءسوز. سونداي-اق، زەكەت بەرۋ ارقىلى مۇسىلمان ادام قولىنداعى بايلىعىن ءتۇرلى رۋحاني لاستىقتان تازارتادى. ادامداردىڭ كوكەيىندەگى ساراڭدىق قاسيەتتەرىن ازايتىپ، باسقالارعا قول ۇشىن بەرۋدى ۇيرەتەدى. وزگەلەرگە جاردەم ەتۋدىڭ راحاتىن سەزىندىرەدى. ادامنىڭ كوكىرەگىندە پايدا بولاتىن اشكوزدىك پەن دۇنيەقۇمارلىق سەكىلدى سەزىمدەردەن تازالاپ، تاكاپپارلىق پەن ساراڭدىقتان تىيادى. وسىلايشا زەكەت، ادامدى رۋحاني ساۋىقتىرىپ، جۇرەگىن تازالايدى. قۇران زەكەتتىڭ ادامداردى رۋحاني تازالايتىندىعىن مىنا اياتتا ايتىپ وتەدى: "ولاردىڭ مالدارىنان زەكەت ال. زەكەت ارقىلى ولاردى تازالاپ، ناپسىلەرىن تاربيەلەيسىڭ" (تاۋبە، 103 ايات). سونداي-اق، اللا تاعالا قۇران كارىمدە «ولاردىڭ مال-مۇلكىندە سۇراپ كەلەتىن جانە ماقرۇم قالعان ادامنىڭ اقىسى بار» - دەيدى ء(زاريات، 19 ايات). بۇل اياتتاردىڭ نەگىزىندە زەكەتى بەرىلمەگەن بايلىق، وزگەلەردىڭ اقىسى ارالاسقان بايلىق بولىپ ەسەپتەلەدى. ال، ونىڭ يەسى اللا قۇزىرىندا وزگەنىڭ اقىسىن جەپ وتىرعان ارامزامەن تەڭ بولادى. زەكەتتى مويىنداماي ونى بەرمەگەندەردى جازعىرىپ اللا تاعالا قۇراندا: «مۇشرىكتەرگە وت ازابى بولادى، سەبەبى ولار زەكەت بەرمەيدى جانە اقيرەتتى دە مويىندامايدى.» - دەيدى (فۋسسيلات، 6,7 اياتتار). نيسابى (كۇندەلىكتى قاجەتتىلىكتەن ارتىق مولشەر) جەتكەن مال-مۇلىكتىڭ زەكەتىن بەرۋ، ونى وسى حارامنان تازالايدى. سول سەكىلدى زەكەت ارقىلى قوعامدا جاسالاتىن ۇرلىق-قارلىق، زورلىق-زومبىلىق قىلمىستار ازايادى. بايلار مەن كەدەيلەر اراسىنداعى الاۋىزدىقتىڭ الدى الىنادى. مىنە وسىلاي اللا تاعالا تەك زەكەت بەرۋشىنى عانا ەمەس، جاپپاي قوعامدى دا رۋحاني كەمەلدىلىككە جەتەلەيدى.

زەكەت بەرۋ يسلام ءدىنىنىڭ بەس دىڭگەگىنىڭ ءبىرى. قۇران كارىمدە نامازدى ورىنداڭدار دەپ كەلگەن امىرمەن بىرگە زەكەتتى بەرىڭدەر دەگەن راحمان بۇيرىعى ءاردايىم قاتار جۇرەدى. اللا تاعالا ءوزىنىڭ قاسيەتتى كىتابىندا 32 جەردە مۇمىندەردەن زەكەت بەرۋدى تالاپ ەتكەن. سوندا دا، ادامنىڭ شاماسىنان تىس مىندەتتى وعان جۇكتەمەيتىن مەيىرىمدى راببىمىز نيسابى جەتكەن مال-مۇلىكتىڭ 2,5 پايىزىن عانا زەكەت ەتىپ بەرۋدى تالاپ ەتەدى. سانسىز نىعىمەتتى بەرىپ، ادام بالاسىن قۇرمەتتەپ كوتەرگەن جاراتۋشىنىڭ جولىنا بايلىعىنىڭ 2,5 عانا پايىزىن ارناۋ، ساراڭدىق اۋرۋىنا ۇشىراماعان جاپپار حاقتىڭ قۇلدارىنا ءسىرا قيىن بولماسا كەرەك.

يسلامنىڭ ەڭ ماڭىزدى ەرەكەشەلىكتەرىنىڭ ءبىرى، ماتەريا مەن رۋحتىڭ، دۇنيە مەن اقيرەتتىڭ اراسىندا قۇرعان تەپە-تەڭدىگى. ءاربىر ماسەلەگە تەك قانا ماتەريالدىق تۇرعىدان قاراماي، احىرەتتىك رۋحاني جاعىنان دا قاراپ قورتىندىلاۋى. زەكەت وسى تۇرعىدان ماڭىزدى. ويتكەنى زەكەت، رۋح پەن ماتەريا اراسىندا قۇرىلعان بايلانىس جانە تەپە-تەڭدىك نەگىزدەرىنىڭ ءبىرى.

يسلام، بايلىقتىڭ بەلگىلى ءبىر ادامداردىڭ عانا قولىندا بولۋىنىڭ قاتە ەكەندىگىن ايقىن بىلدىرەدى. حاشر سۇرەسىندە، ءفاي رەتىندە دۇشپاننان الىنعان مالدىڭ تاراتىلۋ ءتارتىبىن كورسەتكەن اياتتا بىلاي دەلىنەدى "بايلىقتىڭ، تەك بايلاردىڭ اراسىندا عانا اينالىپ جۇرمەۋى ءۇشىن دەپ..." (حاشر، 7 ايات). سونداي-اق زەكەت، بايلىق پەن نىعمەتتەردى بەرگەن ۇلى جاراتۋشىعا شۇكىر بولىپ تابىلادى. ونىڭ امىرىنە باس ءيىپ، وعان قۇل ەكەندىگىن ءبىلدىرۋدىڭ بىردەن ءبىر جولى. ادام زەكەت بەرۋ ارقىلى ءپاني جانە وتكىنشى بولعان مال دۇنيەسىن، ماڭگىلىك بولعان باقيعا اۋىستىرادى. بەرگەن از مولشەردەگى مالىنىڭ ەسەسىنە اقيرەتتە تاۋسىلمايتىن ەسەلەنگەن ساۋاپقا قول جەتكىزەدى. بارشامىزعا اسىل ءدىنىمىزدىڭ بەس پارىزىنىڭ ءبىرى - زەكەتتى ءوز شارتتارى مەن قاعيدالارىنا سايكەس، جۇيەلى تۇردە اللانىڭ رازى بولاتىنىنداي بەرۋىمىزدى جانە ەكى دۇنيەدە دە ءجۇزىمىز جارىق ءجۇرۋىمىزدى جازسىن!

ءاۋمين!

قمدب زەكەت قورىنىڭ

استانا قالاسى بويىنشا وكىلى - اتاشەۆ ايبەك

«اباي-اقپارات»