قازاقستاننىڭ جامبىل وبلىسىنداعى «ماتىبۇلاق» پوليگونىندا «قالقان-2021» وزبەك-قازاق بىرلەسكەن وقۋ-جاتتىعۋلارى ءوتتى دەپ حابارلادى وزبەكستان قورعانىس مينيسترلىگىنىڭ ءباسپاسوز قىزمەتى.

«ەكى حالىق اراسىنداعى قارىم-قاتىناستىڭ تاريحى تەرەڭدە جاتىر. بىرلەسكەن جاتتىعۋلار بۇل ءداستۇردىڭ اجىراماس بولىگى بولىپ تابىلادى. ەلىمىزدە وتكەن «قالقان-2019» وقۋ-جاتتىعۋلارى وسى باعىتتاعى ماڭىزدى قادامداردىڭ بىرىنە اينالدى. ءبىزدىڭ ىنتىماقتاستىعىمىز وزبەكستاندا دا جالعاسادى»، - دەدى وزبەكستان رەسپۋبليكاسى قورعانىس مينيسترلىگىنىڭ پودپولكوۆنيگى مۋرودجون سافاروۆ.

ەكى ەلدىڭ اسكەريلەرى اۆياتسيا مەن ارتيللەريانىڭ كومەگىمەن شارتتى تۇردەگى جاۋعا قارسى تاكتيكالىق وپەراتسيالار جۇرگىزدى. بۇل قاتىسۋشىلارعا پراكتيكالىق بىلىمدەرىن كەڭەيتىپ، تاجىريبە الماسۋعا مۇمكىندىك بەردى.

جابىلۋ سالتاناتىندا وقۋ-جاتتىعۋلارعا بەلسەندى قاتىسقاندار ەكى ەلدىڭ قورعانىس مينيسترلەرىنىڭ بۇيرىعىمەن قۇرمەت گراموتالارىمەن ماراپاتتالدى.

Abai.kz