وسىدان ءبىر ايدان استام ۋاقىت بۇرىن اشتىق جاريالاعان ميحايل سااكاشۆيلي اۋرۋحاناعا جاتقىزىلدى. ونى تۇرمەدەن تىكۇشاقپەن الىپ شىققان.

گرۋزيانىڭ بۇرىنعى پرەزيدەنتى ميحايل سااكاشۆيلي رۋستاۆي تۇرمەسىنەن تبيليسيدەگى تۇتقىندارعا ارنالعان اۋرۋحاناعا اۋىستىرىلدى. بۇل تۋرالى گرۋزيانىڭ ارنايى قىلمىستىق اتقارۋ قىزمەتىنىڭ مالىمدەمەسىنە سىلتەمە جاساپ «رۋستاۆي 2» تەلەارناسى حابارلادى.

«تۇتقىن ميحايل سااكاشۆيلي دەنساۋلىعىنىڭ ناشارلاۋىنا جول بەرمەۋ ءۇشىن ايىپتالۋشىلار مەن سوتتالعاندارعا ارنالعان 12-ءشى تۇزەۋ مەكەمەسىنەن №18 ەمدەۋ مەكەمەسىنە اۋىستىرىلدى»، - دەپ حابارلايدى قىزمەت تەلەارناسىنا سىلتەمە جاساپ.

ميحايل سااكاشۆيليدىڭ رۋستاۆي تۇرمەسىنەن شىعارىلعانى تۋرالى ونىڭ اناسى دجۋلي الاسانيا بۇعان دەيىن حابارلاعان ەدى. سااكاشۆيلي 1 قازاندا گرۋزيادا ۇستالدى. ول سەگىز جىلدان كەيىن العاش رەت مۋنيتسيپالدىق سايلاۋ قارساڭىندا تۋعان ەلىنە ورالدى. گرۋزيادا ەكس-پرەزيدەنتكە قاتىستى بىرنەشە قىلمىستىق ءىس قوزعالعان. ساياساتكەر قاماۋعا الىنعاننان كەيىن بىردەن اشتىق جاريالادى، ال جاقتاستارى ونى بوساتۋ ءۇشىن ميتينگتەر وتكىزۋدە.

Abai.kz