سارسەنبى, 19 قاڭتار 2022
بيلىك 1585 5 پىكىر 7 جەلتوقسان, 2021 ساعات 15:21

قازاقستان مەن وزبەكستان: قانداي كەلىسىم جاسالدى؟

توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق جونىندە قازاقستان ۇكىمەتى مەن وزبەكستان ۇكىمەتى اراسىندا كەلىسىم جاسالدى. كەلىسىمگە وزبەكستان پرەزيدەنتى شاۆكات ميرزياەۆتىڭ نۇر-سۇلتانعا رەسمي ساپارى كەزىندە قول قويىلعان. بۇل جونىندە akorda.kz حابارلادى.

بيىل 1 مامىردا ماقتارال اۋدانىنا جاقىن وزبەكستاندا ساردوبا سۋ قويماسى جارىلىپ، توتەنشە جاعداي جاريالانعان. سونىڭ سالدارىنان تۇركىستان وبلىسىنىڭ ماقتارال اۋدانىندا 845 ءۇي، 3 مەكتەپ، 5 بالاباقشا، 4 مەديتسينا عيماراتى مەن مادەنيەت ءۇيى جانە 54,7 كم كوپىر مەن جولدى سۋ العان. مۇنان وزگە 7639 گا ەگىستىك سۋ استىندا قالعان.

وسىعان بايلانىستى قازاقستان وزبەكستانعا نارازىلىق نوتا جولداپ، تۇركىستان وبلىسىنىڭ 10 اۋىلىن سۋعا كەتىرگەن ساردوبا سۋ قويماسىنداعى اپات جايلى تولىق اقپارات بەرۋدى تالاپ ەتپەك بولعان. قازاقستان اقپارات قۇرالدارى ەكولوگيا، گەولوگيا جانە تابيعي رەسۋرستار ۆيتسە-ءمينيسترى سەرگەي گروموۆتىڭ سوزىنشە، حالىقارالىق نورما بويىنشا، شەكارا بويىنداعى سۋعا سالىناتىن گيدروتەحنيكالىق قۇرىلىس جايلى شەكتەس مەملەكەتتەرگە حابار الىسىپ، ءوزارا كەلىسىلۋى ءتيىس. ال ساردوبا سۋ قويماسى قازاقستاننىڭ كەلىسىمىنسىز سالىنعان.

وزبەكستان ساردوبا سۋ قويماسىنان زارداپ شەككەن قازاقستان ەلدىمەكەندەرىنە تەحنيكا جىبەرىپ، زاردابىن جويۋعا كومەكتەسكەن ەدى. سۋ قويماسىنىڭ جارىلۋىنان وزبەكستاننىڭ ءوز جەرى دە زارداپ شەگىپ، ونداعان مىڭ ادام ءۇي-جايىن تاستاپ كەتۋگە ءماجبۇر بولعان.

اقوردا حابارىنا قاراعاندا، بۇگىن 6 جەلتوقساندا قازاقستان پرەزيدەنتى قاسىم-جومارت توقاەۆ نۇر-سۇلتاندا وزبەكستان پرەزيدەنتى شاۆكات ميرزياەۆپەن كەڭەيتىلگەن قۇرامدا كەلىسسوز جۇرگىزگەن.

قازاقستان پرەزيدەنتى قاسىم-جومارت توقاەۆ ەكى مەملەكەتتىڭ ارا قاتىناسىنا "قازاق-وزبەك ىنتىماقتاستىعى بارلىق سالادا بۇرىن-سوڭدى بولماعان شىڭدارعا كوتەرىلدى" دەپ باعالاعان.

قاسىم-جومارت توقاەۆ پەن شاۆكات ميرزياەۆ كەلىسسوزدەر قورىتىندىسى بويىنشا قازاقستان مەن وزبەكستان اراسىنداعى وداقتىق بايلانىستار تۋرالى دەكلاراتسياعا قول قويعان.

بۇگىن قازاقستانعا رەسمي ساپارمەن كەلگەن شاۆكات ميرزياەۆ بيىل ەكىنشى مەرزىمگە پرەزيدەنت بولىپ سايلانىپ، 6-قاراشادا انت قابىلداعان ەدى. باتىس باقىلاۋشىلارى وزبەكستانداعى پرەزيدەنت سايلاۋى سايلاۋدىڭ باسەكەسىز وتكەنىن ايتتى.

شاۆكات ميرزياەۆ 2016 جىلى اۆتوريتار باسشى يسلام كاريموۆ قازاسىنان كەيىن پرەزيدەنت بولعان. يسلام كاريموۆكە قاراعاندا جۇمساق ساياسات جۇرگىزە باستاعان ميرزياەۆ ساياسي جانە ەكونوميكالىق رەفورما جۇرگىزگە ۋادە بەرگەن، بىراق باسىم بولىگى ورىندالماعان.

Abai.kz

5 پىكىر