ءبىر قىزىق مالىمەت ايتايىن با؟ تۇركيا بيلىعى قاڭتار مەن قاراشا ارالىعىندا 2 ملرد 793 ملن 974 مىڭ دوللاردىڭ قورعانىس جانە اۆياتسيا ونەركاسىبى ونىمدەرىن ەكسپورتقا شىعارىپتى. كەلەسى جىلى بۇل مولشەر 3 ملرد دوللاردان ءسوزسىز اسىپ تۇسەدى دەپ بولجايمىن ءوز باسىم. ال وسى ونىمدەردىڭ كوبىن قاي ەل ساتىپ العانىنا توقتالساق، كوش باسىندا اقش تۇر. 1 ملرد 32 ملن 615 مىڭ دولاردىڭ زاتىن ساتىپ السا كەرەك. ودان سوڭ ازەربايجان 192 ملن 126 مىڭ دوللارعا قارۋ-جاراق پەن اۆياتسيا سالاسىنا قاجەت جابدىقتار ساتىپ الىپتى.

ءۇشىنشى ورىندا 180 ملن 544 مىڭ دوللاردىڭ ءونىمىن ساتىپ العان كاتار تۇر.
ءتورتىنشى ورىن ءباا-ءنىڭ ەنشىسىندە. تۇرىكتەردەن قورعانىسقا قاجەت 161 ملن 373 دوللاردىڭ ءونىمىن يمپورتتاپتى. گەرمانيا 142 ملن 816 مىڭ دوللاردىڭ ءونىمىن العان. ءبىر سوزبەن ايتقاندا تۇرىكتەر قارۋ-جاراق پەن اۆياتسيا نارىعىندا ورنىعا باستادى دەگەن ءسوز. ويتكەنى تۇرىك ونىمدەرىن يمپورتتايتىن توپ-20 مەملەكەتتىڭ ىشىندە ۋكراينا، فرانتسيا، ۇلىبريتانيا، قىتاي، كانادا، نيدەرلاندى، ءۇندىستان قاتارلى ەلدەر دە بار. ءتىپتى جيىرمالىققا تۇركىمەنستان مەن وزبەكستان دا ەنگەن. اشحاباد 37 ملن 683 مىڭ دوللاردىڭ، تاشكەنت 29 ملن 193 مىڭ دوللاردىڭ ءونىمىن ساتىپ الىپتى. ال قازاقستان توپ-20 تىزىمىندە جوق. دەمەك ءبىز تۇركيانىڭ قورعانىس ونەركاسىبى ونىمدەرىنە ءالى دە قىزىقپاي وتىرعان سياقتىمىز.

راس، Anka-S دروندارىن قازاقستان قارۋلى كۇشتەرى الاتىن بولىپتى دەگەن اڭگىمە شىققان. ءتىپتى ول ءۇشىن 80 ملن دوللار جۇمساماق دەيتىن دە قاۋەسەت تاراعان. بىراق درونداردى 2023 جىلعا قاراي الاتىن سياقتىمىز. وندا دا بۇل اڭگىمە ازىرگە قاۋەسەت. ادەتتەگىدەي اسكەريلەر جۇماعان اۋزىن اشپايدى. الايدا قازاقستان نارىعىنا تۇرىكتىڭ قورعانىس ونەركاسىبىنە ماشىقتانعان كومپانيالارىنىڭ كىرگەنى راس. Aselsan ءبىرازدان بەرى جۇمىس ىستەيدى. «قازاقستان ينجينيرينگ» حولدينگىنىڭ قۇرامىندا بىرلەسكەن كاسىپورىن قۇرعانبىز. بىلتىردان بەرى Otokar وكىلدەرى ءجۇر ءبىزدىڭ ەلدە. 6 اي بويى Arma 8x8 بروندى كولىگىن سىناقتان وتكىزدى. بىلەتىندەر ونىڭ سىناقتان جاقسى وتكەنىن ايتىپ ءجۇر.

سىناق دەمەكشى Arma 8×8 كونۆەيەردەن باياعىدا شىعىپ قويعان. قاتەلەسپەسەم 700 دەن استام داناسى جاسالىپ، تاپسىرىس بەرگەن ەلدەرگە جىبەرىلدى. ءسويتىپ تۇركيانىڭ قورعانىس ونەركاسىبىنىڭ بەدەلىن كوتەرىپ تاستادى.

نەگىزى قازىر قورعانىس ونەركاسىبى سالاسىندا الەمدىك دەڭگەيدەگى TOP-100 كومپانيا بار. كوبى اقش، قىتاي، يزرايل، ەۋروپا ەلدەرىنىڭ، كورەيانىڭ، كومپانياسى. ءبىرلى-جارىم رەسەي كومپانياسى دا بار تىزىمدە. 2021 جىلدىڭ العاشقى التى ايىندا وسى 100 كومپانيا قاتارىندا رەسەيدەن ءبىر، تۇركيادپن ەكى كومپانيا بولدى. جىل سوڭىنا دەيىن وزگەرۋى مۇمكىن. ءبىر ەسكەرىلەتىن دۇنيە، تۇرىك كومپانيالارىنىڭ بەدەلى ءوسىپ كەلە جاتسا، ورىستاردىكى كەرى كەتىپ بارادى. سونىمەن بىرگە ءبىز «وتاندىق ونەركاسىپ» ءونىمى رەتىندە ايتىپ جۇرگەن Mbobme8-«بارىس 8×8» كولىگىنىڭ ءتۇپ يەسى وڭتۇستىك افريكا رەسپۋبليكاسىنان بىردە-ءبىر كومپانيا ۇزدىك جۇزدىكتە جوق. دەمەك اسكەري-تەحنيكالىق ىنتىماقتاستىق سالاسىندا تۇركياعا بەت بۇرساق ۇتىلا قويماسپىز. ارينە مۇنداي ماسەلە جان-جاقتى زەرتتەلۋى كەرەك. دەگەنمەن ءبىر عانا Aselsan تۇرىكتەرمەن بىرلەسكەن كاسىپورىن قۇرۋدىڭ ناتيجەسى جامان بولمايتىنىن كورسەتتى.

جالپى ساپالى اسكەري تەحنيكا جاۋىنگەر ءومىرىن ساقتايدى. ال ءار جاۋىنگەر قۇنى ەشتەڭەمەن ولشەنبەيتىن قىمبات قازىنا. سوندىقتان تۇركى مەملەكەتتەرى ۇيىمى اياسىندا اسكەري ىنتىماقتاستىققا دا كوبىرەك كوڭىل بولگەن ءجون-اۋ.

امانگەلدى قۇرمەتۇلى

Abai.kz