ەلورداداعى اۋىل شارۋاشىلىعى مينيسترلىگىنىڭ عيماراتىن لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ فيليالىنا تارتۋ ەتۋ تۋرالى شەشىمدى مەملەكەتتىك حاتشى ق.كوشەرباەۆ جاريا ەتتى. بىلاي قاراعاندا ەكى ەل اراسىنداعى دوستىقتىڭ كورىنىسى رەتىندە پاش ەتىلگەن بۇل جاڭالىق بايبالام سالاتىنداي، نازار اۋدارارلىقتاي كورىنبەۋى مۇمكىن.

ال ءىس جۇزىندە وسى مالىمدەمەنى ەلدەگى ەڭ جوعارعى لاۋازىمنىڭ ءبىرى، تىكەلەي پرەزيدەنتكە عانا باعىناتىن، پرەزيدەنتكە ىشكى جانە سىرتقى ساياساتتاعى ءىس-قيمىل جونىندە اقىل-كەڭەس بەرەتىن تۇلعا - مەملەكەتتىك حاتشىنىڭ جاساۋى ءىس جۇزىندە قازاقستان بارلىق جاعىنان رەسەيگە باعىنىشتى ەكەنىن انىق كورسەتتى.

قازاقستان اگرارلى-يندۋستريالىق ەل ەكەنىن ەسكەرسەك، اگرارلىق سالانىڭ ەڭ جوعارعى ورگانى - اشم عيماراتىن، اتاعى قانداي دارداي بولسا دا بوتەن مەملەكەتتىڭ ۋنيۆەرسيتەتىنىڭ فيليالىنا بەرۋدى باسقاشا قالاي تۇسىنۋگە بولادى؟ حالقىنىڭ 43 پايىزى اۋىلدا تۇراتىن، باتىس وڭىرىندەگى جۇرت جۇتتىڭ از اق الدىندا تۇرعان ەلدەگى بيلىكتىڭ اۋىل شارۋاشىلىعىنا دەگەن كوزقاراسىنىڭ سيقى وسى!

بۇل جاعداي 1905 جىلى باستالعان، ءىس جۇزىندە قازاقتى ءوز جەرىنەن تۇبەگەيلى كوشىرىپ، ءتىپتى ۇلت رەتىندە جويىپ جىبەرۋگە باعىتتالعان ستولىپين رەفورماسىن ەرىكسىز ەسكە تۇسىرەدى. سول رەفورما ورىس-كازاكتارعا ميلليونداعان گەكتار قازاق جەرىن تەگىن تارتۋ ەتتى. جەرگىلىكتى ۇلتتى جەرىنەن ايىردى، قازاق ءوز ەلىندە تۋعان جەرىنەن ۇلتاراقتاي جەردى كەلىمسەكتەردەن ساتىپ الۋعا، جالعا الۋعا، ال وعان شاماسى جەتپەگەندەر ۇندىستەر سەكىلدى ءشول، شولەيت جەرلەرگە بوسىپ كەتۋگە ءماجبۇر بولدى. مەشىتتەر، تاريحي ورىندار وتارشىلار اسكەرىنىڭ كازارماسىنا، اتقوراسىنا اينالدى.

بىزدەگى بيلىكتىڭ بار قىزمەتى قازاقتىڭ قانى مەن جانىنىڭ سيمۆولى - جەرمەن تىعىز بايلانىستى اۋىل شارۋاشىلىعى مينيسترلىگىن وسىنداي بەيشارا حالگە ءتۇسىرۋى وسىنداي تاريحي پاراللەل جۇرگىزۋگە ماجبۇرلەيدى.

دانەش بايبولاتوۆ

Abai.kz