اۋعان ۇكىمەتىمەن كابۋلدا كەزدەسكەن سۇلتانوۆ "قازاقستان ازىق-تۇلىك، مۇنايحيميا، مەتاللۋرگيا، جەڭىل ونەركاسىپ پەن ماشينە جاساۋ، اعاش وڭدەۋ سالالارى بويىنشا اۋعانستانعا قۇنى 360 ميلليون دوللارعا جەتەتىن 45 تاۋار ەكسپورتتايتىنىن" ايتقان.
ساۋدا جانە ينتەگراتسيا مينيسترلىگىنىڭ ءباسپاسوز قىزمەتى تاراتقان اقپاراتقا قاراعاندا، قازاقستان اۋعانستاننان جەمىس-جيدەك ساتىپ الۋعا ءازىر.
قازاقستان اۋعانستانعا ۇن مەن بيداي جەتكىزەتىن نەگىزگى ەل. قازاقستان ۇنىنىڭ جارتىسىنان استامى جانە بيدايىنىڭ 10 پايىزدان استامى اۋعان بازارىنا باعىتتالعان.
سۇلتانوۆ قازاقستان-اۋعانستان بيزنەس-فورۋمىنا قاتىسىپ، اۋعانستانعا ۇن ونىمدەرى مەن وزگە دە ازىق-تۇلىك جەتكىزۋ جونىندە مەموراندۋمعا قول قويعان.
ءباسپاسوز قىزمەتىنىڭ مالىمەتىنە قاراعاندا، 2021 جىلدىڭ قاڭتار-قازان ايلارى اراسىندا قازاقستان مەن اۋعانستان اراسىنداعى تاۋار اينالىمى 345,9 ملن دوللارعا جەتكەن، بىراق بۇل ءبىر جىل بۇرىنعى وسى كەزەڭدەگى كورسەتكىشتەن ($477,1 ملن) 27,5 پايىزعا از.
قازاقستان ۇكىمەتى وكىلدەرىنىڭ 2021 جىلى تامىزدا بيلىككە كۇشپەن كەلگەن "تاليبان" وكىلدەرىمەن كەزدەسىپ وتىرعانى ءبىرىنشى رەت ەمەس.
بۇل جولى مينيستر باقىت سۇلتانوۆ پرەمەر-ءمينيستردىڭ ورىنباسارى ابدوللا سالام حانافيمەن، سىرتقى ىستەر ءمينيسترى ءامىر حان مۇتتاقيمەن، ساۋدا جانە ونەركاسىپ ءمينيسترى مىندەتىن اتقارۋشى نۇريددين ازيزيمەن كەزدەسكەن.
سۇلتانوۆتىڭ سوزىنشە، قازاقستان اۋعانستانعا قۇنى 1,9 ميلليون دوللارعا باعالاناتىن ءدارى-دارمەك، بەس مىڭ توننا ۇن مەن ازىق- تۇلىكتى گۋمانيتارلىق كومەك رەتىندە بەرگەن.
بىرەر كۇن بۇرىن ازاتتىق تىلشىسىمەن سويلەسكەن اۋعان قازاقتارى تالىپتەر بيلىككە كەلگەلى كوپتەگەن دۇكەندەر جابىلىپ، 1200 اۋعاني تۇراتىن ءبىر قاپ ۇن (شامامەن 5100 تەڭگە) 3200 اۋعانيعا قىمباتتاعانىن (13700 تەڭگە) ايتقان.
اۋعانستاننىڭ سىرتقى ىستەر ءمينيسترى ءامىر حان مۇتتاقيمەن 26 قىركۇيەكتە قازاقستاننىڭ اۋعانستانداعى ەلشىسى ءالىمحان ەسەنگەلديەۆ كەزدەسكەن. جەرگىلىكتى باق مۇنى قازاقستان وكىلىنىڭ "تاليبان" قوزعالىسىنىڭ مۇشەسىمەن جوعارى دەڭگەيدە العاش كەزدەسۋى دەپ سيپاتتاعان. الايدا قازاقستان سىرتقى ىستەر ءمينيسترى تاراتقان حاباردا تەررور ۇيىمنىڭ اتى اتالماعان، مۇتتاقيدى "اۋعانستان ۋاقىتشا ۇكىمەتى سىرتقى ىستەر ءمينيسترىنىڭ مىندەتىن اتقارۋشى" دەپ جازعان.
حالىقارالىق قاۋىمداستىق "تاليبان" قوزعالىسى اۋعانستان بيلىگىن قولعا العان سوڭ اۋعان ۇكىمەتىن مويىنداۋ، نە مويىنداماۋ دەگەن ديلەمما الدىندا تۇر. ساراپشىلار ورتالىق ازيا ەلدەرى وزدەرىنىڭ ەكونوميكالىق مۇددەسى ءۇشىن تالىپتەرمەن ىنتىماقتاسادى دەپ توپشىلايدى.
9 قىركۇيەكتە قازاقستان پرەزيدەنتى "قازاقستاننىڭ اۋعانستانمەن ىسكەرلىك قاتىناستارعا دايىن" ەكەنىن ايتقان. شانحاي ىنتىماقتاستىق ۇيىمىنىڭ 17 قىركۇيەكتە دۋشانبەدە وتكەن سامميتىندە توقاەۆ "اۋعانستاننىڭ جاڭا بيلىگىمەن بەيفورمالدى ديالوگتى" قولدايتىنىن بىلدىرگەن.
Abai.kz
