كەشە Facebook جەلىسىندە جاننا پاپينا دەيتىن ادام ءوزىنىڭ «پەرسيك» اتتى سارى كۇشىگىن (كاندەن يت) يت اتقىشتار اتىپ كەتكەنى جايلى بەينەجازبا جاريالادى. ۇزاقتىعى 45 سەكۋند. وندا الگى ايەل، «پەرسيگىن» جوقتاپ، جىلاپ-سىقتاپ تۇرادى. وعان 40-تان اسا پىكىر ءتۇسىپتى. ءبىرى جاننا حانىمعا سارى كۇشىگىنىڭ يت اتقىشتاردىڭ وعىنان اجال قۇشقانىنا قايعىرىپ، كوڭىل ايتسا، ەندى بىرەۋلەرى سەبەپ-سالدارىن سۇراپ، وڭىردەگى جابايى يتتەردى بايلاپ ۇستايتىن ارنايى ورىن سالۋ ماسەلەسىن ءسوز ەتكەن.

ونان سوڭ جاننا حانىم 6 مينۋتقا جۋىقتايتىن تاعى ءبىر بەينەجازبا جاريالادى. وندا جاننا حانىم ءيتىنىڭ ولەكسەسىن سۇيرەپ، وبلىستىق اكىمدىكتىڭ الدىنا بارىپتى. وبلىس اكىمى بەردىبەك ساراپباەۆتى شاقىرىپ، جالعىز ادامدىق پيكەت وتكىزىپ تۇرعانى باياندالعان.

«مەنىڭ اتىم جاننا. مەن تاراز قالاسىندا تۇرامىن. بۇگىن مەنىڭ ءيتىمدى ءولتىرىپ كەتتى. مەن وبلىستىق اكىمدىكتىڭ الدىندا تۇرمىن. اكىم ساپارباەۆتى كۇتەمىن. ءبىزدىڭ پلاكاتتاعى (جانۋارلاردى قورعاۋ تۋرالى پلاكات – رەد.) جوبامىزدىڭ قۇنى 3 ميلليون تۇراتىن. ءبىز وسىعان دەيىن 500-دەي ءيتتى قۇتقارىپ قالدىق. ال مەنىڭ ءيتىمدى «37 ميلليونعا اتىپ ءولتىردى».

بەردىبەك ماشبەكۇلى، ءسىز كەلگەنشە كۇتەمىن. بۇلاي ىستەۋگە بولمايدى. بۇل يت – اقىلدى يت ەدى. ول ءتىپتى، داۋن بالالارمەن دە ءتىل تابىساتىن...

بۇل بيۋدجەت اقشاسىنا جاسالاتىن زاڭسىز اۋلاۋ. ول ء(يتتىڭ ولەكسەسى – رەد.) وبلىس اكىمى كەلمەيىنشە، وسىندا جاتاتىن بولادى. بۇلاي جالعاسۋى مۇمكىن ەمەس. ەگەر بۇل ماسەلە شەشىلمەيتىن بولسا، مەن ەرتەڭ ادامداردى ميتينگكە شاقىرامىن. ويتكەنى سىزدەر مۇلدە ەستىمەيسىزدەر. يتتەردى اتۋدىڭ ارنايى گرافيگى بار. بۇل دۇرىس ەمەس. الەمنىڭ ەشبىر قالاسىندا بۇلاي جاسامايدى. كەشە عانا گرۋزيادان ۆيدەولار جولداپ جاتىر. وندا يتتەر ادامداردىڭ اراسىندا ءجۇر، بازارلاردا. ال مەنىڭ ءيتىمدى اتىپ كەتتى. بۇل ءيتتى اۋلانىڭ (قالانىڭ) بارلىق بالاسى جاقسى كورەتىن. Instagram-نان كورسەڭىزدەر بولادى. ەندى ولارعا نە ايتامىن؟ اكىمدىكتىڭ ءىسى دەيىن بە؟ وڭباعاندار!

سىزدەر وتىرعان (تۇرمەدە-رەد.), پرەزيدەتكە قارسى شىققان ادامدارعا اقشا اۋدارىپ جاتىرسىزدار. ال ءتىپتى، ادامدى قاۋىپ الۋدىڭ نە ەكەنىن بىلمەيتىن ءيتتى ولتىرە سالدىڭىزدار. بۇل جالعىز كىسىلىك پيكەت. ماعان ەشتەڭە ىستەي المايسىڭدار. بۇل بيۋدجەتتىڭ اقشاسىنا ىستەلىپ وتىر. بۇگىن وعان ءتىپتى، سيستەما قۇيا المادىق. مەن يتتەردى اتۋعا قارسىمىن. بىلتىر ءوز قىزمەتكەرلەرىڭىزدى (يت اتقىشتاردى – رەد.) وقىتۋ ءۇشىن قانشا اقشا جۇمسادىڭىزدار؟.. ساپارباەۆ كەلمەيىنشە، بۇل باسسىزدىق جويىلمايىنشا كەتپەيمىن. ەگەر زاڭ – اۋلاۋ كەرەك دەسە، سىزدەر زاڭعا باعىنىپ، اۋلاۋلارىڭىز كەرەك. سىزدەردىڭ اتۋعا قۇقىقتارىڭىز جوق. يت ءارتۇرلى سەبەپپەن كوشەدە ءجۇرۋى مۇمكىن. اداسىپ كەتۋى نەمەسە ونى قۋىپ جىبەرۋى مۇمكىن. ۆەتەرەناريا باسقارماسىنا كىمدى تاعايىنداساڭىزدار دا، ءبىرى ەكىنشىسىنەن سوراقى....»، - دەپ ەڭكىلدەپ جىلايدى.

جاننا پاپينا ونان سوڭ دا بىرنەشە جازبا جاريالاپتى. ءار جازباسىنا وبلىس اكىمى بەردىبەك ساپارباەۆتى, پرەزيدەنتتىڭ ءبسپاسوز حاتشىسى بەرىك ءۋاليدى, مادەنيەت ءمينيسترى داۋرەن اباەۆتى, بۇرىنعى مينيستر اقتوتى رايىمقۇلوۆانى, وبلىستىق پوليتسيا دەپارتامەنتىن بەلگىلەگەن ەكەن. ءتىپتى، ءيتتىڭ ولەكسەسىن الماتىعا، ارنايى ساراپتاما جاساتۋعا اكەلگەنىن دە جازعان.

ال بۇگىن تارازدىق جۋرناليست جاسۇلان ابدىحالىق بەينەجازبا مەن اتالعان وقيعاعا قاتىستى ءوز پىكىرىن جازىپتى. ول جاريالاعان بەينەجازبادان «پەرسيك» دەيتىن ءيتىنىڭ قۇنىن پۇلداپ، پيكەت وتكىزگەن جاننا حانىمنىڭ ءۇنىن ساپارباەۆ مىرزانىڭ ەستىگەنى، جاننا حانىممەن كەزدەسۋگە كەلگەنى بەينەلەنگەن.

«ءتۇسىندىرۋ جۇمىستارىن جۇرگىزدىك. قالا اكىمىنىڭ ورىنباسارى ەسەناليەۆپەن، ۆەتستانتسيانىڭ ديرەكتورىمەن ول وكرۋگتاردىڭ بارلىعىن ارالادى. سوسىن بىلاي، سەن ەكەۋىڭ دە كىنالىسىڭدەر. سەندەر شاش ال دەسە، باس الاسىڭدار عوي. سەندەرگە: «اتىڭدار، قىرىڭدار»، - دەپ ەشكىم ايتقان جوق قوي. سەندەر اۋەلى سونىڭ بارلىعىن انىقتاۋلارىڭ كەرەك ەدى. ادامعا زيانى بار ما، جوق پا؟ بالالاردى قابا ما، قاپپاي ما؟ اۋرۋ ما، سوداە كەيىن عانا جاڭا ايتقانداي ىزدەۋ كەرەك ەدى. يەسى بار ما، جوق پا؟ سودان كەيىن بارىپ... ال سەندەر بىردەن...»، - دەپ قاراماعىنداعى لاۋازىمدى ازاماتتاردى سوگە سويلەيدى اكىم.

ال تارازدىق جۋرناليست جاسۇلان ابدىحالىق ءوزىنىڭ Facebook-تەگى پاراقشاسىندا:

«كەشە تاراز قالاسىندا تاپا-تال تۇستە بەلگىلى قوعام بەلسەندىسى جاننا پاپينانىڭ «پەرسيك» اتتى كۇشىگىن يت اتقىشتار ءولتىرىپ كەتتى. ەش ەسكەرتۋسىز، اياۋسىز اتىپ كەتتى. ماقۇلىقتىڭ مەزگىلسىز ءولىمىن زور كۇيزەلىسپەن قابىلدادىم. جاننا حانىمعا قايعىسىنا ورتاقتاسىپ كوڭىل ايتامىن! بىرەۋگە وقتان، بىرەۋگە بوقتان كەلەتىن كەساپات ءولىم عوي. سابىر ەتىڭىز. فب، ينستادان تىكەلەي ەفيردەن كورىپ وتىردىق. كوپ جىلادىڭىز. پەرسيكتى كوتەرىپ اكىمدىكتىڭ الدىنا اكەلدىڭىز. اكىمنىڭ شىعۋىن تالاپ ەتتىڭىز.

ءسىز مىقتىسىز! مويىندادىم! كەلدى اكىم!

ەسىگىنىڭ الدىندا ساعاتتاپ كوپ بالالى انالار كەلگەندە شىقپاعان اكىم، اكىمدىكتى بۇلىكشىلەر ورتەپ جاتقاندا شىقپاعان اكىم، جۋرناليستەردى تەرگەپ تەكسەرىپ، تەپكىلەپ جاتقاندا كەلمەگەن اكىم، كەلدى!

ءوزى عانا ەمەس، قاسىندا قالا اكىمى جىلقىباەۆ، اۋىلشارۋاشىلىعى ورىنباسارى نۇرجىگىتوۆ، ۆەتەريناريا باسشىسى، «پرەسسەگى»، ءبارى كەلدى، پەرسيككە!

اينالا قورشاپ تۇرىپ ءسوز سويلەدى. پەرسيكتىڭ ارمانى جوق، اكپە! ارمانى جوق!

كۇنى كەشە قاڭتار قىرعىنىندا قازا تاپقان، ابايسىزدا وققا ۇشقان بوزداقتارعا بۇل باسشىلار بارماعان، كوڭىل ايتپاعان.

ساپارباەۆ ولگەن ءيتتىڭ باسىندا تۇرىپ جاۋاپتىلارعا ۇرىستى:

«ەكەۋىڭ دە كىنالىسىڭدەر. شاش ال دەسە باس الاسىڭدار. سەندەرگە ەشكىم ايتقان جوق قوي، ءبارىن اتىڭدار قىرىڭدار دەپ. سەندەر اۋەلى الدىمەن انىقتاۋلارىڭ كەرەك ەدى، مىنانىڭ ادامعا زيانى بار ما، جوق پا؟ بالداردى قابا ما قاپپاي ما؟ اۋرۋ ما، ساۋ ما؟ قاۋىپتى ما؟ سودان كەيىن عانا ارەكەت ەتۋ كەرەك ەدى»، - دەدى.

اينالايىن اكىمىم-اي. استارلاپ نەنى ايتقىڭ كەلگەنىن ءتۇسىندىم. الدە مەن الەمدەگى ەڭ «تۋپوي» اداممىن. بىراق، ماعان ءبارى باسقاشا ەستىلدى. مىنا سوزدەردىڭ بارلىعى قاڭتار قىرعىنىنا ارناپ ايتىلىپ جاتقان سياقتى.

«شاش ال دەسە باس الاسىڭدار». پرەزيدەنت سەندەرگە ءبارىن اتىڭدار، قىرىڭدار دەگەن جوق قوي. بارلىعى تەرروريستەر ەمەس قوي، اراسىندا بەيبىت شەرۋشىلەر، كەزدەيسوق جۇرگەندەر بار. الدىمەن انىقتامايسىڭدار ما؟ قوعامعا زيانى بار ما، جوق پا؟ قاۋىپتى مە؟ سودان كەيىن عانا ارەكەت ەتۋ كەرەك»، - دەپ ەستىدىم، سولاي ءتۇسىندىم!

پەرسيك سەن كەشىرشى ءبىزدى. ءبىز سەنى قورعاي المادىق. بەيبىت كۇندە وققا ۇشىرىپ الدىق. بۇل ارينە ۇلكەن قاسىرەت. سەن قاھارمان ءيتسىڭ! سەنىڭ، كۇن سايىن كارىس كۋحنيالارىندا سويىلىپ، تاباقپەن تارتىلىپ جاتقان جۇزدەگەن يتتەردىڭ ارۋاقتارىنىڭ الدىندا ارىڭ تازا! سەن، ەشكىم تۇسىندىرە الماعان ۇلتتىق تراگەديانى - يتتىك تراگەديامەن ءتۇسىندىرىپ كەتتىڭ.

باقۇل بول، پەرسيك!»، - دەپ جازعان.

Abai.kz