رەسەي مەن ۋكراينا اراسىنداعى قاقتىعىس ۋشىعىپ، سوعىس جاعدايىنا كەلدى. ۋكراينا اۋماعىن سەپاراتيستەر كومەگىمەن 17 اقپاندا جاپپاي اتقىلاۋ باستالعان ەدى. ال 18 اقپاندا رەسەيگە دونباسستان 700 مىڭ ادامنىڭ كوشىرىلەتىنى بەلگىلى بولدى. بۇل تۋرالى لۋگانسك جانە دونەتسك سەپاراتيستىك ايماعىنىڭ باسشىلارى مالىمدەدى.

ارنايى بۇيرىق بويىنشا 18-55 جاستاعى ازاماتتاردىڭ شىعۋىنا تىيىم سالىنعان. ولاردىڭ بارلىعى اسكەري مىندەتىن وتەۋگە ءتيىس ساناتتا، سوندىقتان سەپاراتيستەر اسكەرىنە قوسىلۋى ءتيىس.

تۇندە سەپاراتيستەر تاراپىنان بىرنەشە جارىلىستار ۇيىمداستىرىلدى. ناقتىلاپ ايتساق، دونەتسكتە كولىك جارىلسا، لۋگانسك ماڭىندا گاز قۇبىرى اتىلدى. ارينە، اتالمىش جارىلىستاردى رەسەي تاراپى ۋكراينا ۇيىمداستىردى دەپ وتىر. الداعى ۋاقىتتا رەسەي بۇل وتىرىگىنە يلانعان حالقىنىڭ سەنىمىنە سۇيەنىپ، ۋكرايناعا باسىپ كىرۋى ابدەن مۇمكىن.

ۋكراينا داعدارىسىنا بايلانىستى بايدەن شۇعىل مالىمدەمە جاسادى. ول رەسەيدىڭ اگرەسسور ەكەنىن اتاپ ءوتىپ، بۇرىن-سوڭدى بولماعان سانكتسيالار سالاتىنىن ەسكەرتتى. رەسەيدى قارجىلىق جانە ەكونوميكالىق تۇرعىدان وقشاۋلاۋ ىسكە اسپاق.

رەسمي كيەۆ رەسەيدىڭ قازىرگى ارەكەتتەرىن «ارانداتۋ جانە سوعىسقا سىلتاۋ ىزدەپ، جوق جەردەن سەبەپ تابۋ» دەپ اتادى. ءوز كەزەگىندە دونباسسقا ەشقانداي اسكەري وپەراتسيانىڭ دايىندالىپ جاتپاعانىن ايتتى.

اسحات قاسەنعالي 

Abai.kz