دۇيسەنبى, 1 ماۋسىم 2020
COVID-19 قازاقستاندا. جۇقتىرعاندار — 10858. جازىلعاندار — 5404. قايتىس بولعاندار — 41
جاڭالىقتار 2496 0 پىكىر 28 قىركۇيەك, 2012 ساعات 12:58

كۇز. ءۇمىت. ۇكىمەت

 

 

جۇرت جاڭالىققا تولى كۇز ماۋسىمىن ۇزاق كۇتتى. مۇنىڭ سىرى دا بار. بۇعان دەيىن قوعامدا «كارىم ءماسىموۆ كەتەدى ەكەن» دەگەن اڭگىمەلەردىڭ گۋىلدەگەنى راس. ءشوپتىڭ باسى بەكەر قيمىلداماپتى. ءبىر ورنىندا بەس جىل وتىرعان كارىم ءماسىموۆ ءوز ەركىمەن وتستاۆكاعا كەتەتىندىگىن مالىمدەدى.
ءدال قازىر شەنەۋنىكتەر اراسىندا «كىم قايدا بارادى ەكەن؟» دەگەن ساۋال باسەڭسىگەن سياقتى. اۋىس-كۇيىسپەن باستالعان اپتادا قازاقستان تاريحىندا ەڭ ۇزاق، ياعني، 5 جىل 9 اي پرەمەرلىك قىزمەت اتقارعان كارىم ءماسىموۆ ەلدىڭ ىشكى يدەولوگياسىنا جاۋاپتى پرەزيدەنت اكىمشىلىگىنىڭ جەتەكشىسى قىزمەتىنە اۋىستى. ال پرەزيدەنت اكىمشىلىگىنىڭ بۇرىنعى جەتەكشىسى اسلان مۋسين ەسەپ كوميتەتىنە كەلسە، اتالمىش كوميتەتتىڭ بۇرىنعى توراعاسى ومارحان وكسىكباەۆ، سونداي-اق پرەزيدەنتتىڭ ءىس باسقارۋشى قىزمەتىنەن بوساعان سەرىك ۇمبەتوۆ ماجىلىستەن ورىن الدى. ۇمبەتوۆتىڭ ورنىنا اباي بيسەمباەۆ جايعاستى.
ۇكىمەتتى باسقارۋعا ونىڭ بۇعان دەيىنگى ورىنباسارى بولعان، ءوندىرىستىڭ قىر-سىرىن جاقسى بىلەتىن، مەملەكەت باسقارۋ ساتىلارىنان ابىرويمەن ءوتىپ جۇرگەن سەرىك احمەتوۆ كەلدى. ەلباسى احمەتوۆتىڭ كانديداتۋراسىن «نۇر وتان» حدپ فراكتسيا­سىنا ۇسىنعانى سول-اق ەدى، تومەنگى پالاتانىڭ 107 دەپۋتاتى قولداپ، داۋىس بەردى. ءسويتىپ، ەلباسى ن.نازارباەۆ ءوزىنىڭ العاشقى جارلىعىمەن ك.ءماسىموۆتى ۇكىمەتتى باسقارۋدان بوساتتى. «ۇكىمەت باسشىسىنىڭ اۋى­سۋى شۇعىل وزگەرىستەرگە الىپ كەلمەيدى. يندۋستريالدىق، تۇرعىن-ءۇي، بالاباقشا، دەنساۋلىق ساقتاۋعا قاتىستى باعدارلامالار دا جالعاسىن تابادى»، - دەدى ەلباسى. ال ۇكىمەت باسشىلارىنىڭ الدىندا ءسوز العان كارىم ءماسىموۆ ەلباسىعا: «مەن قازاقستان باسشىسىنا وسى جىلدار بويى بيىك سەنىم ارتىپ كەلە جاتقانى ءۇشىن العىسىمدى بىلدىرەمىن. ەلباسىنا، ەلگە ادالدىق جايىن وسى جىلدار بويى ەستەن شىعارعان ەمەسپىن»، - دەدى.
ۇكىمەت باسىنا كەلگەن جاڭا باسشى سەرىك احمەتوۆ ءوزىنىڭ العاشقى ەڭبەك جولىن ينجەنەر-مەتاللۋرگ بولىپ باستاعان. 2009 جىلدان باستاپ قاراعاندى وبلىسىنىڭ اكىمى بولىپ قىزمەت جاسادى. بيىلعى جىلدىڭ قاڭتارىنان بەرى ۇكىمەت باسشىسىنىڭ ءبىرىنشى ورىنباسارى قىزمەتىنە كىرىسكەن بولاتىن. بۇگىندە پرەمەر-مينيسترلىك دارەجەگە كوتەرىلگەن سەرىك احمەتوۆ تە وزىنە بەرىلگەن سەنىمدى اقتاپ، ەلدىڭ وركەندەۋىنە بار كۇشىن سالاتىنىن جەتكىزدى. «اسا كۇرمەتتى، نۇرسۇلتان ءابىشۇلى! قازاقستان ۇكىمەتىن باسقارۋدى ماعان سەنىپ تاپسىرىپ وتىرعانىڭىز ءۇشىن ۇلكەن راحمەتىمدى بىلدىرەمىن! بۇل مەن ءۇشىن ابىروي عانا ەمەس، اسا جوعارى جاۋاپكەرشىلىك»، - دەدى. بۇدان سوڭ كونستيتۋتسياعا سايكەس، پرەمەر ۇكىمەت قۇرامىن ۇسىنۋعا كىرىسىپ كەتتى.
سونىمەن، ەلباسى نۇرسۇلتان نازارباەۆتىڭ قازاقستان رەسپۋبليكاسى ۇكىمەتىنىڭ قۇرامى تۋرالى جارلىعىنا سايكەس، قىرىمبەك كوشەرباەۆ پرەمەر-ءمينيستردىڭ ورىنباسارى، بۇرىنعى ەڭبەك جانە حالىقتى الەۋمەتتىك قورعاۋ ءمينيسترى گۇلشارا ابدىحالىقوۆا پرەزيدەنت كەڭەسشىسى، باقىتجان ساعىنتاەۆ «نۇر وتان» حدپ توراعاسىنىڭ ءبىرىنشى ورىنباسارلىعىنا تاعايىندالسا، ەكونوميكالىق دامۋ جانە ساۋدا ءمينيسترى بولىپ ەربولات دوساەۆ كەلدى. ال ەڭبەك جانە حالىقتى الەۋمەتتىك قورعاۋ ءمينيسترى رەتىندە سەرىك ابدەنوۆ تانىستىرىلدى. سونداي-اق، كونستيتۋتسيانىڭ 44-بابىنا سايكەس، قايرات كەلىمبەتوۆ قازاقستان رەسپۋبليكاسى پرەمەر-مي­نيسترىنىڭ ورىنباسارى;
ەربول ورىنباەۆ - قازاقستان رەسپۋبليكاسى پرەمەر-ءمينيسترىنىڭ ورىنباسارى; اسەت يسەكەشەۆ - قازاقستان رەسپۋبليكاسى پرەمەر-ءمينيسترىنىڭ ورىنباسارى - قازاقستان رەسپۋبليكاسىنىڭ يندۋستريا جانە جاڭا تەحنولوگيالار ءمينيسترى; اسىلجان مامىتبەكوۆ - قازاقستان رەسپۋبليكاسىنىڭ اۋىل شارۋاشىلىعى ءمينيسترى; بەرىك يماشەۆ - قازاقستان رەسپۋبليكاسىنىڭ ادىلەت ءمينيسترى; باقىتجان جۇماعۇلوۆ - قازاقستان رەسپۋبليكاسىنىڭ ءبىلىم جانە عىلىم ءمينيسترى; ساليدات قايىربەكوۆا - قازاقستان رەسپۋبليكاسىنىڭ دەنساۋلىق ساقتاۋ ءمينيسترى; اسقار جۇماعاليەۆ - قازاقستان رەسپۋبليكاسىنىڭ كولىك جانە كوممۋنيكاتسيا ءمينيسترى; بولات جامىشەۆ - قازاقستان رەسپۋبليكاسىنىڭ قارجى ءمينيسترى; ادىلبەك جاقسىبەكوۆ - قازاقستان رەسپۋبليكاسىنىڭ قورعانىس ءمينيسترى; نۇرلان قاپپاروۆ - قازاقستان رەسپۋبليكاسىنىڭ قورشاعان ورتانى قورعاۋ ءمينيسترى; دارحان مىڭباي - قازاقستان رەسپۋبليكاسىنىڭ مادەنيەت جانە اقپارات ءمينيسترى; ساۋات مىڭباەۆ - قازاقستان رەسپۋبليكاسىنىڭ مۇناي جانە گاز ءمينيسترى; ۆلاديمير بوجكو - قازاقستان رەسپۋبليكاسىنىڭ توتەنشە جاعدايلار ءمينيسترى; قالمۇحانبەت نۇرمۇحانبەتۇلى قاسىموۆ - قازاقستان رەسپۋبليكاسىنىڭ ىشكى ىستەر ءمينيسترى; جانار سەيداحمەتقىزى ايتجانوۆا - قازاقستان رەسپۋبليكاسىنىڭ ەكونوميكالىق ينتەگراتسيا ىستەرى ءمينيسترى بولىپ قايتا تاعايىندالدى.
كۇز ماۋسىمى ەلىمىزدە جيىن-تەرىننىڭ اياقتالىپ، جۇرت ىرزىعى التىن قامبالارعا قۇيىلاتىن مەزگىل. وسى ۋاقىتقا دەيىن ۇمىتپەن كۇن كەشكەن ءدۇيىم قاۋىم قولدا بارىن سانامالاپ، كەلەر كۇنگە جاڭا جوسپارلار قۇراتىن ايرىقشا كەز. كەلەر كۇننەن جاڭالىق پەن جاقسىلىق كۇتىپ، بولاشاعىن پايىمدايتىن، بەزبەنگە سالاتىن، تارازىلايتىن شاق. قازاقستان دا وسىناۋ التىن كۇزدە ۇكىمەتىن اۋىستىرىپ، الداعى كۇندەگى قيىندىقتارعا وسى باستان قام جاساۋعا مۇددەلى. الەم جاھاندىق داعدارىستىڭ ەكىنشى تولقىنىن كۇتىپ الاڭداۋلى، كوڭىلى كۇپتى. ءبىزدىڭ ەلىمىز دە بەيقام بولۋعا ءتيىس ەمەس.

دينارا مىڭجاسارقىزى

"تۇركىستان" گازەتى

 

0 پىكىر