بۇگىندە اقش پەن ەۋروپا وداعى ەلدەرىنىڭ ءبىرتالاي كومپانياسى رەسەيگە سانكتسيا قويدى.

Apple كومپانياسى رەسەيدىڭ ۋكرايناعا باسىپ كىرگەنىنە قارسىلىق رەتىندە ءوز تاۋارلارىن ەكسپورتتاۋدى توقتاتتى. Apple Pay, Apple Maps سياقتى كومپانيا قىزمەتتەرى ەندى رەسەي اۋماعىندا جۇمىس ىستەمەيدى. ۆتب، سوۆكومبانك، سوۆكومبانك، پرومسۆيازبانك جانە "وتكرىتيە" بانكتەرىنىڭ ءموبيلدى قوسىمشالارى دا Apple iOS وپەراتسيالىق جۇيەسىندە ىستەمەيتىن بولادى.
Google ترانسۇلتتىق كورپوراتسياسى رەسەي مەملەكەتى قارجىلاندىراتىن جاڭالىقتار ۇيىمدارىنا YouTube-ءتىڭ جارنامالىق جانە باسقا دا ۆيدەو حوستينگ قۇرالدارىن پايدالانۋعا تىيىم سالدى. سونىمەن قاتار، Google ءوزىنىڭ ىزدەۋ جۇيەسىنەن رەسەيدىڭ مەملەكەتتىك RT تەلەارناسىن الىپ تاستادى. سانكتسياعا ىلىنگەن بانكتەردىڭ تۇتىنۋشىلارى ءۇشىن Google Play-ءدى قولدانۋعا تيىم سالىنباقشى. دەگەنمەن، قازىرگى ۋاقىتتا رەسەيدە Google Play بۇعاتتالعان جوق. ىزدەۋ جۇيەسى، كارتالار جانە YouTube سياقتى Google قىزمەتتەرىنىڭ كوپشىلىگى جۇمىس ىستەپ تۇر.

Microsoft كومپانياسى Windows App Store دۇكەنىنەن RT تەلەارناسىنىڭ ءموبيلدى قوسىمشاسىن الىپ تاستايدى جانە رەسەيدىڭ مەملەكەتتىك باق-نىڭ جارناماسىنا تيىم سالاتىنىن مالىمدەگەن.

امەريكاندىق Nike كومپانياسى دا رەسەيدەگى ساۋداسىن توقتاتتى. كومپانيا سايتىنان رەسەيلىكتەرگە تاۋار ساتىپ الۋ مۇمكىن ەمەس. Nike رەسەيگە ءونىمىن ساتۋعا كەپىلدىك بەرمەيتىنىن ايتقان.

الەمدەگى ەڭ ءىرى تاسىمالداۋشىلار - دانيالىق Maersk جانە جەنەۆادا ورنالاسقان MSC كومپانيالارى رەسەيگە جانە رەسەيدەن كونتەينەرلىك تاسىمالداردى توقتاتتى. بۇل رەسەيگە سىرتقى ساۋدادان ەداۋىر ءبولىنىپ قالۋ قاۋپىن تۋدىرادى.

American Express قارجى كومپانياسى رەسەيدەگى سەرىكتەستەرىمەن ىنتىماقتاستىعىن توقتاتتى. ول رەسەيدە كارتا شىعاراتىن جانە تولەم جاساۋ ءۇشىن ساۋدا ەكۆايرينگىن پايدالاناتىن بىرنەشە كومپانيامەن سەرىكتەس قىزمەت ەتەدى.

Nokia ترانسۇلتتىق كومپانياسى رەسەيگە ءوز ونىمدەرىن جەتكىزبەيتىنىن حابارلادى. كومپانيا متس، "تەلە2", "ۆىمپەلكوم" جانە "مەگافون" ءۇشىن جابدىقتار جىبەرىپ تۇرعان.

امەريكالىق Boeing اۆياكونتسەرنى رەسەيدەگى قىزمەتىن توقتاتقانىن جانە كيەۆتەگى كەڭسەسىن ۋاقىتشا جاپقانىن جاريالادى. رەسەيدىڭ باستى تاسىمالداۋشىسى-اەروفلوت پاركى 737 جانە 777 بوينگتەرىنەن تۇرادى. بۇرىنىراق ەو رەسەيگە Airbus ۇشاقتارىن پايدالانۋعا تىيىم سالعان. ول رەسەيدىڭ بۇكىل ازاماتتىق اۆياتسياسىنا قاۋىپ ءتوندىردى.
رەسەيمەن سەرىكتەس ءۇش زاۋىتى بار امەريكاندىق Ford اۆتوموبيل ءوندىرىسى رەسەيدەگى قىزمەتىن توقتاتتى.

الەمدەگى ەڭ ءىرى مۇناي كومپانيالارىنىڭ ءبىرى ExxonMobil دە ەندى رەسەيمەن جۇمىس ىستەمەيدى. كومپانيا "ساحالين-1" جوباسىنان شىعۋعا قادام جاساۋدا. ول رەسەيدىڭ قيىر شىعىسىنداعى ساحالين ارالىندا ءۇش ءىرى تەڭىز مۇناي-گاز كەن ورنىن باسقارىپ وتىرعان. اقپان ايىنداعى ExxonMobil-ءدىڭ جىلدىق ەسەبىندە رەسەيدەگى اكتيۆتەرى 4,055 ميلليارد دوللار ەكەنى جازىلعان.
اۆستريالىق OMV مۇناي-گاز كومپانياسى "سەۆەرنىي پوتوك - 2"گاز قۇبىرى جوباسىنا قاتىسۋدى قايتا قارايتىن بولدى. سونىمەن قاتار، جوبا وپەراتورى جانە "گازپرومنىڭ" ەنشىلەس كومپانياسى - Nord Stream 2 AG - بانكروتتىق تۋرالى ءوتىنىش بەرگەن.

"گەوساياسي جاعدايلارعا بايلانىستى جانە Nord Stream 2 AG-گە اقش سالعان سانكتسيادان كەيىن كومپانيا قىزمەتكەرلەرىمەن كەلىسىمشارتتاردى بۇزۋعا ءماجبۇر بولدى. ءماجبۇرلى قادامعا باردىق. وتە وكىنىشتى", - دەدى وپەراتور.
گاز قۇبىرىن سەرتيفيكاتتاۋدى توقتاتقان گەرمانيا قازىر جوبانى تولىق توقتاتتى.

Moody ' s حالىقارالىق رەيتينگ اگەنتتىگى رەسەيدىڭ 16 قارجى ينستيتۋتىنىڭ رەيتينگىن تومەندەتۋ جاعىن قايتا قارايدى. قايتا قاراۋ تىزىمىنە سبەربانك، گازپرومبانك، روسسەلحوزبانك، الفا-بانك، اك بارس بانك، ماسكەۋ كرەديت بانكى (احج), بۇكىلرەسەيلىك وڭىرلەردى دامىتۋ بانكى، تينكوفف بانك، "ابسوليۋت", "زەنيت", "سوليدارنوست", ۇلتتىق رەزەرۆتىك بانك، "دوم.رف" بانكى، مەملەكەتتىك كولىك ليزينگتىك كومپانيا (GTLK) جانە ونىڭ ەنشىلەس كومپانيالارى GTLK Europe DAC جانە GTLK Europe Capital DAC كىردى.
ەۋروپالىق وداق SWIFT-تەن رەسەيدىڭ 7 بانكى: ۆتب، "روسسيا" بانكى، "وتكرىتيە", نوۆيكومبانك، پرومسۆيازبانك، سوۆكومبانك جانە ۆەب.رف وشىرە الادى،-دەپ جازدى Bloomberg. اگەنتتىكتىڭ مالىمەتىنشە، سانكتسيا سالىنعان بانكتەردىڭ سوڭعى ءتىزىمى ەو ەلدەرى تولىق تالقىلاعاننان كەيىن شىعادى. بۇل تىزىمگە سبەربانك پەن گازپرومبانك كىرمەگەنىن ايتادى.

Universal Pictures كينوكومپانياسى رەسەيدە جوسپارلانعان فيلمدەرىنىڭ پرەمەرالارىن قويعىزبادى. كينوكومپانيا بۇل شەشىم ۋكرايناداعى جاعدايعا بايلانىستى ەكەنىن حابارلاعان.

Netflix قىزمەتى رەسەيلىك تۇپنۇسقا جوبالارمەن جۇمىسىن توقتاتتى. كومپانيا رەسەيلىك فيلمدەر، شوۋلارمەن جۇمىسىن توقتاتپاقشى. ولاردىڭ ىشىندە "اننا ك" درامالىق سەريالى، الەكساندر پەتروۆپەن سەريال، يۋري بوريسوۆ تۇسكەن "نيچەگو وسوبەننوگو" سەريالى جانە داريا جۋكتىڭ "زاتو" قىلمىستىق تريللەرى بار.

كانن فەستيۆالى 2022 جىلى رەسەيدىڭ رەسمي دەلەگاتسياسىن قابىلدامايتىن بولدى. ۇيىمداستىرۋشىلار رەسمي رەسەي دەلەگاتسياسىنىڭ جانە كرەملمەن بايلانىسى بار كەز-كەلگەن دەلەگاتتىڭ فەستيۆاليعا قاتىسۋىنا تىيىم سالدى. ولار: "رەسەي ۇكىمەتىمەن بايلانىستى كەز-كەلگەن مەكەمەنىڭ قاتىسۋىنا جول بەرمەيمىز",- دەدى. دەگەنمەن، جەكەلەگەن كينورەجيسسەرلەر ءىس-شاراعا قاتىسا الادى.

بريتاندىق BBC Studios تەلەارناسى رەسەيگە ارنالعان ليتسەنزيالاردى قايتارىپ الۋ تۋرالى ايتتى. تەلەكومپانيا 2019 جىلدان باستاپ رەسەيلىك "ياندەكس" جانە "كينوپويسك" - پەن بىرگە جۇمىس ىستەگەن. كومپانيا رەسەيدىڭ ۋكرايناداعى باسقىنشىلىعىنا قارسى وسىنداي شارا قابىلداعان.
Walt Disney جانە Warner Bros ستۋديالارى رەسەيدەگى فيلمدەرىنىڭ كورسەتىلىمىن توقتاتىپ جاتىر.

پولشا رەسەيدىڭ ەلدەگى جىلجىمايتىن مۇلىكتەرىن الىپ تاستاۋدا. پولشا سوتتارى رەسەيدىڭ ۆارشاۆاداعى ديپلوماتيالىق نە كونسۋلدىق ماقساتتا پايدالانبايتىن ەكى جىلجىمايتىن مۇلكىن مەملەكەتتىك قازىناشىلىققا بەرۋ تۋرالى شەشىم قابىلداعان. ۆەدومستۆونىڭ ايتۋىنشا، تاركىلەنەتىن ەكى جىلجىمايتىن مۇلىككە رەسەي زاڭسىز يەلىك ەتىپ وتىر.

كانادا رەسەيگە قارسى جاڭا سانكتسيالار جاريالادى. "مەن بارلىق كانادالىقتارعا جانە رەسەيگە مالىمدەيمىن، ءبىز قوسىمشا شارالار دايىنداپ جاتىرمىز»،- دەدى كانادانىڭ قارجى ءمينيسترى كريستا فرەلاند. بۇل تۋرالى الداعى ۋاقىتتا جاريالايتىن بولادى. مينيستر سانكتسيالار رەسەي وليگارحتارى مەن كانادا اۋماعىندا ورنالاسقان رەسەيلىك كومپانيالاردىڭ اكتيۆتەرىنە قاتىستى بولۋى مۇمكىن ەكەنىن مالىمدەدى. كانادا رەسەيدەن كەلەتىن شيكى مۇناي يمپورتىنا تىيىم سالدى.
جاپونيا پرەمەر-ءمينيسترى فۋميو كيسيدا بيلىكتىڭ اۋە جولىن جابۋ تۋرالى ويلانۋى كەرەكتىگىن ايتتى

"رەسەيلىك ۇشاقتار ءۇشىن اۋە كەڭىستىگىن جابۋعا كەلەتىن بولساق، قازىرگى ۋاقىتتا بىرقاتار ەلدەر وسىنداي قادامعا باردى. ءبىز ءوز تاراپىمىزدان جاعدايدىڭ باقىلاي وتىرىپ حالىقارالىق قوعامداستىقپەن، ءبىرىنشى كەزەكتە G7-مەن ىنتىماقتاسىپ ءتيىستى شارالار ازىرلەۋ تۋرالى ويلانۋىمىز كەرەك", - دەدى كيسيدا پارلامەنتتىڭ جوعارعى پالاتاسىندا سويلەگەن سوزىندە.

اقش پرەزيدەنتى دجو بايدەن ۋكرايناداعى وقيعالارعا بايلانىستى رەسەيلىك ۇشاقتارعا اۋە كەڭىستىگىن جابۋ تۋرالى شەشىم قابىلداعانىن ايتتى.
قازىرگى ۋاقىتتا رەسەيلىك بورتتارعا 36 ەلدىڭ اۋماعى ارقىلى ۇشۋعا تىيىم سالىندى.

Abai.kz