كوتەرگەن تاعدىردىڭ اۋىرىن
نە كۇيدە ۋكراين باۋىرىم؟!
ءتاستۇيىن بەكىنگەن شىعار-اۋ
پيعىلىن بىلگەن سوڭ جاۋىنىڭ.

جەندەتكە اينالسا تاسباۋىر،
ابىرجىپ قالسا دا دوس قاۋىم،
ايەدەر قارۋ اپ قولىنا،
دۇشپانعا بولدى عوي توسقاۋىل.

تاپ بەرسە قالىڭ جاۋ ساۋىتتى،
توندىرسە زۇلماتتى قاۋىپتى.
جول جاۋىپ ۇلكەن دە، كىشى دە،
قۇر قولمەن توقتاتتى تانكتى.

قوس كوزىن الارتقان قازاققا
پۋتين دە اينالدى مازاققا.
وزبىرلار حالىققا وق اتقان
قۇتىلماس تۇبىندە توزاقتان.

بۇزىلماي دوس ەلدىڭ ىرگەسى،
توقتاماي تۋىستاس ەل كوشى.
ساتقىندار قامالسىن قاپاسقا،
قيراسىن ازاتتىق تۇرمەسى.

اقىندار جازاتىن داستان قىپ،
بار ەلدىڭ تىلەگى – بوستاندىق.
ەركىندىك كەڭەيتسىن ءورىسىن،
قاسكويدەن كەلمەسىن قاستاندىق.

قارابەت

قورلىق كورگەن اقتاردان دا،
زورلىق كورگەن قىزىلدان،
دەپ جۇرسە دە: «ساقتار اللا!»
قازاق قانى بۇزىلعان.

ادامزاتتىڭ قورى ەمەس پە،
وزبىرلىعىن تىيماسا،
بۇزىلعانى سول ەمەس پە،
ءوز پەرزەنتىن قيناسا.

جازىقسىزعا جالا جاۋىپ،
قىل ارقانمەن ماتايدى،
جاتقانداردى قازا تيۋىپ
بۇلىكشى دەپ اتايدى.

ارقاسىنا وتەك باسىپ،
ينە سۇعىپ كوبەگە،
مەيماناسى اسىپ-تاسىپ،
باس شۇلعيدى تورەگە.

نە بولسا دا سوعان جاعىپ،
وتىرىكتى ساپىردى.
قويانجۇرەك ۇرىپ-سوعىپ
جاتىر ناعىز باتىردى.

دەپ تۇرعانداي كورگەن كىسى:
«وزگە جۇرتقا بول مازاق!»
باسا الماعان ەلدىڭ مىسىن،
وق اتقىزعان سول قازاق

بويىنا دا سىنگەن جىلدام،
قايدان جۇققان سول ادەت؟!
ءوز قازاعىن قويداي قىرعان
قاندى قولدار قارابەت.

جاڭا كۇن

ءبىرازدان بەرى جاڭا كيىمدى كيمەپ ەم،
دۇكەنگە كىرسەم، تولىپ تۇر جاڭا جەيدەلەر.
بىرەۋىن الدىم، جاراسىپ تۇرسا بويىڭا،
ايناعا قاراپ، جاعاڭدى تۇزەپ كي دە، كور!

ءبىر اپتا كيدىم، تەز توزىپ كەتتى جاعاسى،
قىرقىلىپ كەتكەن جەڭىنە تاعى قاراشى!
بايقاسام كەيىن، وسىنداي كيىم كيىپ ءجۇر
كوشەگە شىققۆن كوپتەگەن قازاق بالاسى.

كوپ جىدار بويى قولدانباي جاتقان ساندىقتا،
توزىعى جەتكەن ماتادان تىككەن قالدىق پا؟
قالامىن اڭ-تاڭ قوجايىنىنا دۇكەننىڭ،
تابام دەپ پايدا، ۇسىنىپ جۇرگەن بار جۇرتقا.

قازاقتىڭ ەلى جاڭاردى دەيدى بىرەۋلەر،
ەسكىنى قۇرتپاي، ءۇي سالام دەسە، كىم ەلەر؟!
قاڭىلتىر جاپقان شاتىرى جاڭا بولعانمەن،
قاتتى جەل سوقسا، قۇلاعالى تۇر تىرەۋلەر.

بىتەلەر اۋزى قانسىراپ تۇرعان جارانىڭ،
ماقساتىم ايقىن، سوقپاسا تاسقا تالابىم،
ماتادان بەرىك تىگىلگەن كيىم كيەرمىز،
سەنەمىن، بىزگە كەلەدى ءالى جاڭا كۇن.

كەرەگىڭ نە؟

كەمشىلىكتى كورمەي كوزىڭ
تۇرسا، كوزدىڭ كەرەگى نە؟
ەستىمەسەڭ كوپتىڭ ءسوزىن،
قۇلاقتىڭ دا كەرەگى نە؟
توعىشاردى تويتارماساڭ،
سوزىڭە جۇرت سەنەدى مە؟!
ەلدىڭ مۇڭىن ايتا الماساڭ،
ءتىلدىڭ ساعان كەرەگى نە؟
دۇرىس جاۋاپ بەرە الماساڭ
ءتىپتى مەنىڭ سالەمىمە،
دوس-جاراندى ءجيى الداساڭ،
سەنىڭ ماعان كەرەگىڭ نە؟!

اقىلبەك شاياحمەت

Abai.kz