سوعىسۋشى ەلدەرگە ەڭ الدىمەن كەرەك كومەك – ەكونوميالىق كومەك. بۇعان كسرو-نىڭ ەكىنشى دۇنيەجۇزىلىك سوعىس كەزىندەگى جاعدايى ايقىن كورسەتكىش بولا الادى. ەلگە قارۋ-جاراقتان گورى وتىن، ازىق-تۇلىك جانە ستراتەگيالىق ماتەريالدار قاجەت بولدى. قازىر ۋكراينا بۇل جاعىنان قامتاماسىز ەتىلگەن دەسەك بولادى. لوگيستيكا قۇرىلدى، ازىق-تۇلىك، جانار-جاعارماي، ءدارى-دارمەكپەن قامتاماسىز ەتۋ جولعا قويىلعان.

ۋكراينانىڭ اسكەري-ونەركاسىپتىك كەشەنىنىڭ جۇمىس ىستەۋىنە مۇمكىندىك بەرەتىن ەنەرگەتيكالىق رەسۋرستارعا، سونداي-اق ونەركاسىپ ءۇشىن ستراتەگيالىق ماڭىزدى ماتەريالدارعا: قارۋ-جاراق پەن ولارعا ارنالعان قۇرامداس بولىكتەردى ءوندىرۋدى جالعاستىرۋ، جابدىقتى قايتا ىسكە قوسۋ جانە ونى جوندەۋ كىرەدى.

اقش، ەو جانە ناتو كيەۆكە ءوز ازاماتتارىن ەڭ تومەنگى كۇنكورىسپەن قامتاماسىز ەتۋگە كومەكتەسەدى، مەملەكەتتىك ينستيتۋتتاردىڭ جۇمىس ىستەۋىن جانە ۋكراينانىڭ اسكەري وپەراتسيالار جۇرگىزۋ مۇمكىندىگىن قولدايدى. بۇل بىرنەشە ەسكادريليا ۇشاقتار، ءجۇز-ەكى تانكتى جىبەرۋدەن الدەقايدا ماڭىزدى.

دەگەنمەن بۇل ۋكراينادا قارۋ-جاراق جەتكىلىكسىز دەگەندى بىلدىرمەيدى. باتىس مەملەكەتتەرى ءوز جابدىقتارىن جىبەرۋ اقىلى ۋكرايناداعى سوعىستىڭ بارلىق باعىتىن وزگەرتىپ ۇلگەردى. جاياۋ اسكەرلەردىڭ تانكىگە قارسى جۇيەلى قۇرالدارى رەسەيلىك اسكەرلەردىڭ برونەترانسپورتەرلەرمەن مانەۆرلىك سوعىس جۇرگىزەتىن كەز-كەلگەن ارەكەتىنە توسقاۋىل قويدى. اۋە شابۋىلىنا قارسى قورعانىس جۇيەلەرى ارقىلى رەسەيلىك اۆياتسيانىڭ ءىس-ارەكەتىنە ستراتەگيالىق شەكتەۋلەر قويدى. باتىستان ۋكرايناعا سوعىس كەمەسىنە قارسى زىمىرانداردىڭ جەتكىزىلۋى رەسەيدىڭ قارا تەڭىز فلوتىن قارا تەڭىزدىڭ سولتۇستىك-باتىسىنان قۋىپ شىعۋعا مۇمكىندىك بەردى، ودەسسا ايماعىندا كىرۋ وپەراتسياسىنا توقتاۋ سالدى. ۋكرايناعا تاعى دا بەرىلگەن ۇلكەن كومەكتىڭ ءبىرى: ۇشقىشسىز ۇشۋ اپپاراتتارى، بايلانىس جۇيەلەرى، رادارلار مەن ارتيللەريا. سونداي-اق ۋكراينا اسكەريلەرى بارلاۋ دەرەكتەرىن باتىستان الىپ وتىر. بۇل ولارعا سوعىستاعى اسكەري وپەراتسيالاردىڭ تولىق بەينەسىن كورۋگە مۇمكىندىك بەرەدى.

شىندىعىندا، ۇرىستىڭ العاشقى ەڭ قيىن كەزەڭىندە ۋكراينا قارۋلى كۇشتەرىنىڭ تاباندىلىعىمەن، باتىستىڭ كومەگىمەن ۋكراينا سوعىس قيمىلدارىنىڭ تولقىنىن وزگەرتە الدى، ءساتتى شابۋىل ءۇشىن العىشارتتاردى قالىپتاستىرا الدى.

الدىمىزداعا كۇزدە ۋكراينا ارمياسىن اليانس ستاندارتتارىنا سايكەس قايتا دايارلاۋ، سونداي-اق زاماناۋي قارۋ-جاراقتاردى، سونىڭ ىشىندە اۋىر بروندى ماشينالاردى، ارتيللەريالىق جۇيەلەردى، اۋە قورعانىسى جۇيەلەرىن جانە قارۋ-جاراقتاردى جاپپاي جەتكىزۋ جوسپارلانىپ وتىر.

«باتىستىڭ ۋكراينانى جەتكىلىكتى مولشەردە زاماناۋي قارۋ-جاراقپەن قامتاماسىز ەتۋگە دايىن ەمەس» دەيتىندەر ەڭ الدىمەن ۇرىس قيمىلدارىن جۇرگىزۋ ءۇشىن قارۋدىڭ ەڭ وڭتايلى تۇرلەرىن تاڭداۋ، ولاردىڭ سانىن ەسەپتەۋ، لوگيستيكا قاجەت ەكەنىن ەستەن شىعارىپ الىپ جاتادى. تەك قانا قارۋ-جاراق جەتكىزۋ ماسەلەنى شەشپەيدى. ۋكراينا اسكەرلەرىنە اكەلىنگەن قارۋ-جاراقتى ساۋاتتى پايدالانۋعا ۇيرەتۋ كەرەك بولادى.

مۇنداي ماسەلەلەردى شەشۋ ءبىر ايدان استام ۋاقىتتى الادى. قازىرگى كۇنى اقش ۇكىمەتى  ۋكرايناعا قارۋ-جاراق جىبەرۋگە نيەت بىلدىرگەن 800 قارۋ-جاراق ءوندىرۋشى كومپانيانىڭ 1 300-دەن استام ءوتىنىشىن قاراستىرىپ، ەڭ ءتيىمدى شارتتاردى تاڭداپ جاتىر.

ۇلىبريتانيا مەن ناتو-عا مۇشە كەيبىر ەلدەر ءۇش اي سايىن اسكەري ماماندىقتى الىپ شىعاتىن 12 000 ۋكراينالىق اسكەريلەردى وقىتاتىن نۇسقاۋشىلار توبىن دايىنداپ جاتىر. سوندىقتان باستالماعان لەند-ءليزتى سىناۋ ءالى ەرتە. اۋقىمدى جۇمىس ەندى عانا قارقىن الا باستادى.

كەرىمسال جۇباتقانوۆ

Abai.kz