ەۋروپا دامۋ جانە قايتا قۇرۋ بانكى "قازاقستان تەمىر جولى" ۇلتتىق كومپانياسىنا "ەۋروپا مەن ازيا اراسىنداعى جۇك تاسۋ جولدارىن جەتىلدىرۋگە" 50 ميلليارد تەڭگە ينۆەستيتسيا سالادى.

بانكتىڭ مالىمدەۋىنشە، ينۆەستيتسيا قازاقستانعا داعدارىسقا قارسى بىرقاتار شارا قابىلداۋعا، جۇك ءترانزيتى وپەراتسيالارىن قايتا ۇيىمداستىرۋعا، پاندەميا سالدارىن جويۋعا جانە گەوساياسي وزگەرىستەرگە بەيىمدەلۋگە كومەكتەسەدى.

بۇل - ەدقب-ءنىڭ قازاقستان ۇلتتىق ۆاليۋتاسىنداعى وبليگاتسيالار تۇرىندەگى العاشقى ينۆەستيتسياسى.

مالىمەتتەرگە قاراعاندا، قتج جاڭا كاپيتالدى ترانسكاسپي حالىقارادىق كولىك جولىنداعى ماڭىزدى ينفراقۇرىلىمداردى جەتىلدىرۋگە جۇمساۋى ءتيىس. رەسەيدى اينالىپ وتەتىن بۇل جول ەۋروپا مەن ازيا اراسىن جالعايدى.

بۇعان دەيىن قىتاي مەن ەۋروپا وداعى اراسىنداعى جۇكتىڭ 95 پايىزى سولتۇستىك ءدالىز ارقىلى ءوتىپ كەلگەن. ول قازاقستان، رەسەي جانە بەلارۋس ارقىلى وتەدى. ەندى ەۋروپا ورتاڭعى ءدالىز ارقىلى جۇك تاسۋعا مۇددەلى بولىپ وتىر. ول قازاقستان، ازەربايجان، گرۋزيا جانە تۇركيا ارقىلى وتەدى.

"قازاقستان تەمىر جولى" ۇلتتىق كومپانياسى 16 مىڭ شاقىرىمعا سوزىلعان تەمىر جول جەلىسىنە يەلىك ەتەدى جانە ونى باسقارادى.

Abai.kz