قازاقستان ۋكرايناعا 3 جەدەل جاردەم كولىگىن جانە 20 توننا ءدارى-دارمەك جونەلتتى. مەديتسينالىق كومەك قازىر سوعىس قيمىلدارى ءجۇرىپ جاتقان ەلدىڭ شىعىسى مەن وڭتۇستىگىندەگى ازاماتتارعا جەتكىزىلمەك. بۇل تۋرالى ۋكراينانىڭ دەنساۋلىق ساقتاۋ مينيسترلىگى ءباسپاسوز قىزمەتى حابارلادى.  

"قازاق حالقى مەن ءبىزدىڭ حالقىمىزدىڭ تاريحى ۇقساس",-دەيدى قازاقستان رەسپۋبليكاسىنداعى توتەنشە جانە وكىلەتتى ەلشى پەتر ۆرۋبلەۆسكيدىڭ جۇبايى وكسانا ۆرۋبلەۆسكايا.

– قازاقتار دا رەسەيلىكتەردىڭ يمپەريالىق ۇستەمدىگىن باسىنان وتكىزگەن حالىق. ءيا، قازىرگى ورىنبور قازاق قالاسى بولعان. سونىمەن قاتار، 1930 جىلدارى قازاقتار دا ۋكرايندار سياقتى اشارشىلىق قاسىرەتىن باسىنان وتكەردى. سول كەزدە حالىقتىڭ تەڭ جارتىسى – ءبىر جارىم ميلليوننان استام ادام وپات بولدى. ولار دا ۋكرايناداعىداي اۋىلدىق جەردىڭ تۇرعىندارى ەدى. سوندىقتان ولار ءبىزدىڭ قايعى-قاسىرەتىمىز مەن كۇرەسىمىزدى تۇسىنەدى.

قازاقستاندىق بيزنەسپەن ىنتىماقتاستىقتىقتىڭ ناتيجەسىندە ۋكراينالىق دارىگەرلەرگە جەدەل جاردەم كولىكتەرى جەتكىزىلدى. ءبىز ۋكراينداردىڭ ءومىرىن قۇتقارۋدا بىرگە ءىس-قيمىل جاساي الاتىنىمىز ءۇشىن سەرىكتەستەرىمىزگە ۇلكەن العىس ايتامىز",- دەپ جازىلعان حابارلامادا.

سونداي-اق، ۋكراينا مينيسترلىگى قازاقستاننان كەلگەن كومەك ءبىرىنشى حانىم ەلەنا زەلەنسكايانىڭ جانە قازاقستانداعى ۋكراينا ەلشىلىگىنىڭ قازاقستاندىق بيزنەسپەن كووپەراتسياسىنىڭ ارقاسىندا مۇمكىن بولعانىن ايتادى.

Abai.kz