«ۆرۋبلەۆسكي ۆەرنو سكازال!»
قازاقستاننىڭ سىرتقى ىستەر مينيسترلىگى ۋكراينا ەلشىسى پەتر ۆرۋبلەۆسكيدى شاقىرىپ، ونىڭ ۋكرايناداعى سوعىس جانە رەسەيلىكتەر جايلى ايتقان پىكىرىنە قارسىلىق ءبىلدىردى، دەپ حابارلادى «ازاتتىق» راديوسى.
توتەنشە جانە وكىلەتتى ەلشى دەگەن اتاعى بار، ءوز ەلىنىڭ مۇددەسىن مۇرات قىلعان ديپلومات قازاقستاندىق بلوگەر دياس قۇزايىرعا بەرگەن ۆيدەو-سۇحباتىندا نە دەپ ەدى (قاز-قالپىندا – فراگمەنت):
«ستاراەمسيا ۋبيت كاك موجنو يح بولشە. چەم بولشە مى ۋبەم رۋسسكيح سەيچاس، تەم مەنشە پريدەتسيا يم ۋبيۆات ناشيح دەتەي. ۆوت ي ۆسە!» – دەگەن ەدى ەلشى.
«قازاقستان حالقىنىڭ اسسامبلەياسى» دەپ اتالاتىن قوسامجارلانعان قۇرىلىم ەلشىنىڭ وسى سوزىنە نارازىلىق ءبىلدىرىپ، قازاقستاننىڭ سىرتقى ىستەر مينيسترلىگىنەن رەاكتسيا جاساۋدى سۇراعان ەكەن. ال ءبىزدىڭ ءسىم «مۇنداي مالىمدەمە شەتەل ەلشىسىنىڭ قىزمەتىنە لايىقسىز جانە ورىنسىز دەپ ەسەپتەيدى» دەپ، ەلپەڭ قاققان ەكەن.
ءيا، دۇرىس! «مۇنداي ءىس-ارەكەت مەملەكەتتەر اراسىنداعى دوستىق مامىلەگە كەدەرگىسىن تيگىزبەۋى ءتيىس» ء(سىم-ءنىڭ مالىمدەمەسىنەن). ديپلوماتيالىق قىزمەتتىڭ ەرەجەسى مەن ەتيكاسى سولاي بولسا كەرەك. داۋ جوق!
بىراق داۋ باسقادا. ءراشيزمنىڭ وككۋپانت اسكەرى بەيبىت حالقى مەن سوعىسقا قاتىسى جوق الەۋمەتتىك-تۇرمىستىق عيماراتتارىنا راكەتا مەن سنارياد جاۋدىرىپ جاتقاندا، ەلشى نە دەۋى كەرەك ەدى؟! دۇنيە ءجۇزى ايىپتاعان الاپات سوعىستا ورىستىڭ وعىنان قىرىلىپ جاتقان ۋكراينالىقتاردىڭ ولگەنى دۇرىس بولدى دەۋى كەرەك پە؟
راس، «ۋبەم رۋسسكيح» دەگەنى دوعالداۋ بولدى... قانىشەر بيلىگىنە «زالوجنيك» بولعان تۇتاس حالىقتى عايباتتاۋ – ديپلومات تۇگىلى، دەنى دۇرىس ادامعا ارتىقتاۋ ءسوز. بۇل ەندى ەلشىدەن گورى، ءوز ەلىنىڭ پاتريوتى، جانكەشتى ازاماتى ەرىكسىز ەموتسياعا بەرىلىپ ايتقان ءسوز بولسا كەرەك.
بۇل ورايداعى وي-جورالعىنىڭ ءجونى بولەك. ماسەلەنكي، بيىلعى قاندى قاڭتاردا قازاقتار قىرىلىپ جاتقاندا، اسسامبلەيا اي باعىپ ءجۇردى مە؟! «ۋبيتى بەزۆيننىە كازاحي» دەۋگە ءداتى بارماعان، كەشىرەرسىز وقىرمان، قازاقتار «قىرىقسىدىك» دەيتىن سوزگە سىقپىتى ساي قۇرىلىم قاندى قىرعىنعا قاتىستى ءبىر اۋىز ءسوز ايتپاپ ەدى عوي!
ەندى ەلشىنىڭ اۋزىنان اشۋعا بۋلىعىپ شىققان سوزگە شورشىپ تۇسەرلىكتەي نە بولدى؟! الدە بۇل اسسامبلەيا ورىس پەن رەسەيدىڭ عانا جالعىز جوقشىسى ما ەدى؟ ورىستىڭ وزبىرلىعىمەن گرۋزيندەر ابحازيادان ايىرىلىپ جاتقاندا، كرەملدىڭ كەساپاتىنان مولدوۆاندار دنەستردىڭ ەكى جاعىنا قاق جارىلعاندا، رەسەيلىك اۆياتسيا سيريانىڭ حالقىن قىرىپ تاستاعاندا قىڭق ەتپەگەن اسسامبلەيا ەلى ءۇشىن ەڭىرەگەن ەلشىنىڭ ءبىر اۋىز سوزىنە بولا بۇلقان-تالقان بولعانى قالاي؟
مىنە، ەلشىنى ءبىز وسى جەردە قورعايمىز! اسسامبلەيادا وتىرعاندار اسىلىپ قالسا دا، ورىسشالاپ وسقىرىنساق: «كاك يستيننىي پاتريوت سۆوەي سترانى ۆرۋبلەۆسكي ۆەرنو سكازال!» – دەيمىز. ەل اراسىنداعى اۋىزەكى سوزبەن انايىلاپ ايتار بولسام، «ال مەنى قىلىپ الىڭدارشى!».
ەرمۇرات باپي،
DAT
Abai.kz
