ءار بالانىڭ شوتىنا ۇلتتىق قوردان اقشا بولىنەدى
ەلىمىزدە 18 جاسقا دەيىنگى ءار بالانىڭ شوتىنا قاراجات اۋدارىلادى. بۇل تۋرالى پرەزيدەنت قاسىم-جومارت توقاەۆ قازاقستان حالقىنا جولداۋىندا ايتتى.
«ءاربىر وتباسى ەلدىڭ ۇلتتىق بايلىعىن پايدالانعانى ءۇشىن ناقتى تابىس الۋى كەرەك. سوندىقتان مەن جاريالاعان بالالار جىلى اياسىندا جاڭا «بالالارعا ارنالعان ۇلتتىق قور» باعدارلاماسىن ىسكە قوسۋدى اسا ماڭىزدى دەپ سانايمىن. ۇلتتىق قوردىڭ جىلدىق ينۆەستيتسيالىق كىرىسىنىڭ 50 پايىزىن بالالار 18 جاسقا تولعانعا دەيىن مەرزىمىنەن بۇرىن الۋ قۇقىعىنسىز ارنايى جيناق شوتتارىنا ءبولۋدى ۇسىنامىن»، - دەدى مەملەكەت باسشىسى.
توقاەۆ كامەلەتتىك جاسقا تولعاننان سوڭ، قازاقستان ازاماتى جينالعان قارجىنى جەكە ءۇي ساتىپ الۋ مەن وقۋعا جۇمسايتىنىن ايتتى.
«قور شىنىمەن دە ۇلتتىق مارتەبەگە يە بولىپ، حالىق يگىلىگىنە قىزمەت ەتەتىن بولادى. وسى اۋقىمدى ءىستى جان-جاقتى زەردەلەۋ قاجەتتىلىگىن ەسكەرە وتىرىپ، جوبانى 2024 جىلدىڭ 1 قاڭتارىنان باستاپ ىسكە قوسۋدى تاپسىرامىن»، - دەدى ول.
Abai.kz
