جۇما, 29 ناۋرىز 2024
دەپ جاتىر 2528 24 پىكىر 5 قىركۇيەك, 2022 ساعات 14:35

سايلاۋ: وپپوزيتسيا كواليتسياسى نە دەيدى؟

الماتىدا دەموكراتيالىق كۇشتەر كواليتسياسى قۇرىلدى. كواليتسيا قازاقستان حالقىنا جانە پرەزيدەنت توقاەۆقا ۇندەۋ جاريالادى. 


دەموكراتيالىق كۇشتەر كواليتسياسىن قۇرۋشى ازاماتتاردىڭ مەملەكەت باسشىسىنىڭ 2022 جىلعى قىركۇيەكتەگى جولداۋىندا ايتىلعان كەزەكتەن تىس پرەزيدەنت سايلاۋىنا قاتىستى

ۇندەۋى

ءبىز وتانىمىزدىڭ، حالقىمىزدىڭ الداعى تاعدىرىنا الاڭدايمىز. تاۋەلسىزدىكتەن، مەملەكەتتىلىكتەن ايىرىلىپ قالۋ قاۋپى ۇدەپ بارادى. شىنايى دەموكراتيالىق باعىتتان اۋىتقۋ ودان ءارى جالعاستى. سۋپەر پرەزيدەنتتىك جۇيەنى قايتا جانداندىرۋ ارەكەتتەرى جىمىسقىلىقپەن ىسكە اسىپ جاتىر. بۇل پرەزيدەنتتىڭ تاياۋداعى، قىركۇيەكتەگى جولداۋىنان دا ايقىن بايقالدى.
كەزەكتەن تىس پرەزيدەنت سايلاۋىن وتكىزۋ، پرەزيدەنتتىك مەرزىمدى جەتى جىلعا دەيىن ۇزارتۋ، الداعى ۋاقىتتا دا بيلىك باسىندا وتىرا بەرۋ، قازاق ءتىلىن قوساقتالعان دەڭگەيدە قالدىرۋ جونىندەگى توقاەۆتىڭ ۇستانىمدارىن قولدامايمىز! ءبىز مۇنىڭ ءبارىن قوعامدا قارسىلىق تۋدىراتىن دەموكراتيالىق قۇندىلىقتاردان باستارتۋ، نازارباەۆتىق جەكە باستىق، اۆتوريتارلىق، توتاريتارلىق جۇيەنى جاڭعىرتۋ دەپ ەسەپتەيمىز! جانە بۇعان جول بەرىلمەيتىندىگىن مالىمدەيمىز!

مەملەكەت، حالىق الدىنداعى جاۋاپكەرشىلىكتى سەزىنە، ونى ءوز موينىمىزعا الا وتىرىپ، ءبىز بارشا دەموكراتيالىق كۇشتەردى – وپپوزيتسياداعى ساياساتكەرلەردى، تىركەلگەن، تىركەلمەگەن ۇيىمدار مەن بىرلەستىكتەردىڭ جەتەكشىلەرىن، بەلسەندى مۇشەلەرىن، ساياساتتانۋشىلاردى، ازاماتتار قۇقىعىن قورعاۋشىلاردى، كۇرەسكە ءازىر بارلىق ادامداردى قاتارىمىزعا قوسىلۋعا شاقىرامىز.

ءبىزدىڭ بيلىك باسىنداعىلارعا قوياتىن تالاپتارىمىز:

- كەزەكتەن تىس پرەزيدەنتتىك سايلاۋ كۇن تارتىبىنەن الىنىپ تاستالسىن! ونداي سايلاۋ وتكىزۋگە ەشقانداي قاجەتتىلىك تۋعان جوق.

«ادىلەتتى قازاقستاندى قۇرۋعا باعىتتالعان تۇبەگەيلى جانە جان-جاقتى رەفورمالاردى ساتىمەن ىسكە اسىرۋ ءۇشىن حالىقتىڭ جاڭا سەنىم مانداتى كەرەك» دەگەن توقاەۆتىڭ سىلتاۋى – كوزبوياۋشىلىق. ادىلەتتى قازاقستان قۇرۋ ءۇشىن ناقتىلى ساياسي رەفورمالار قاجەت. ال ول رەفورمانى ىسكە اسىرۋ ءۇشىن حالىقتان جاڭادان سەنىم مانداتىن سۇراپ، كەزەكتەن تىس سايلاۋ وتكىزبەي-اق قويسىن. تەك قوعاممەن ساناسىپ، «سايلاۋ تۋرالى»، ساياسي پارتيالار تۋرالى، جيىن بوستاندىعى تۋرالى زاڭداردى حالىقارالىق نورمالارعا سايكەستەندىرسە، ازاماتتاردىڭ كونستيتۋتسيالىق قۇقىقتارىن شەكتەيتىن، ەركىن، تازا سايلاۋ وتكىزۋگە كەدەرگى كەلتىرەتىن، نازارباەۆتىق تاسىلمەن جاسالعان باپتاردى الىپ تاستاسا بولعانى. سايلاۋ كوميسسيالارىن قۇرۋدى وزگەرتۋ، ونىڭ قۇرامىن تۇبەگەيلى وزگەرتۋ تالاپتارىن ورىنداسىن. باقىلاۋشىلاردىڭ، جۋرناليستەردىڭ سايلاۋ بارىسىنداعى قىزمەتتەرى شەكتەلمەسىن، اشىقتىققا، جاريالىلىققا جول اشىلسىن. وسىنداي العىشارتتار جاسالعان سوڭ تازا، ءادىل سايلاۋ وتكىزسىن. حالىق سوندا ءوز تاڭداۋىن جاسايدى. دەمەك، ادىلەتتى قازاقستان قۇرۋ ءۇشىن پرەزيدەنت توقاەۆتان كەرەگى – ساياسي ەرىك-جىگەر، ادالدىق، باتىلدىق، سوزدە تۇرۋشىلىق!

- پرەزيدەنتتىك مەرزىمدى جەتى جىلعا سوزۋ جونىندەگى پرەزيدەنت ۇسىنىسى قابىلدانباسىن! كونستيتۋتسيانى «جاساندى رەفەرەندۋمنان» كەيىن تاعى دا جۇلمالاۋ، تۇستەن شوشىپ ويانعانداي بولۋ پرەزيدەنتكە جاراسپايدى. بۇرىنعى كەزەڭدە وزگەرتىلىپ، قايتا قالپىنا كەلتىرىلگەن مەرزىمدى تاعى دا قايتالاۋ – جەكە باستىق مۇددەنىڭ قامى.

- پرەزيدەنت سايلاۋى ءوز كەزەگىمەن 2024 جىلى وتكىزىلسىن!
وعان دەيىن پرەزيدەنت قىزمەتىندە وتىرعان، لەگيتيمدى ەمەس پرەزيدەنت سانالعان ق.ج.توقاەۆ ءوزى ۋادە ەتكەن ساياسي رەفورمانى شىنايىلىقپەن، ناقتىلى قولعا السىن.

- ساياسي پارتيالاردى تىركەۋگە قويىلعان كەدەرگىلەر الىنىپ تاستالسىن!
زاڭداعى جونسىزدىكتەر دەرەۋ ارادا تۇزەتىلمەيىنشە، ادىلەت مينيسترلىگى ارقىلى تىركەۋ ءتارتىبىن الىپ تاستامايىنشا، ازاماتتاردىڭ ۇيىمدارعا بىرلەسۋ، مەملەكەتتى باسقارۋ ىسىنە ارالاسۋ قۇقىعى شەكتەلە بەرەتىن بولادى.

- 2022 جىلعى قاڭتارداعى قىرعىن قاسىرەتى بويىنشا جاۋاپكەرشىلىكتى موينىنا السىن!

جاپپاي ءتارتىپ بۇزۋشىلىققا قاتىستى دەلىنگەن ءارتۇرلى ايىپتارمەن قوزعالعان قىلمىستىق ىستەر قىسقارتىلسىن! دالەلسىز، ايعاقسىز، ازاپتاۋ، قيناۋ ارقىلى «مويىنداتىلعان» كىنالارى ءۇشىن سوتتالعانداردىڭ ىستەرى قايتا قارالسىن. ساياسي قۋدالاۋداعى بارلىق ساياساتكەرلەرگە، بەلسەندىلەرگە بوستاندىق بەرىلسىن.

- جوعارىداعى تالاپتار ورىندالماعان جاعدايدا، قاسىم جومارت توقاەۆتىڭ قازاقستان ازاماتى رەتىندە الداعى سايلاۋلاردا پرەزيدەنتتىككە ۇمىتكەر بولىپ تۇسۋىنە، تىركەلۋىنە مورالدىق، ساياسي قۇقىعى جوق دەپ ەسەپتەلسىن!
حالىق سەنىمىنەن ايىرىلعان ادامعا حالىق ەشقاشان دا جاڭا سەنىم مانداتىن بەرمەيتىندىگىن جاريا تۇردە ەسكەرتەمىز. ءبىز نازارباەۆتىق بيلىك جۇيەسىن ءوز ىڭعايىنا ورايلاستىراتىن، جەمقور، ساتقىن، جاعىمپاز، بىلىكسىز توبىرلاردىڭ مەملەكەتتى باسقارۋىنا قارسىمىز.

- حالىق ۇسىنعان ازاماتتار اراسىنان پرەزيدەنت بولۋعا لايىقتى تۇلعالاردى قازىردەن ىرىكتەپ، تالقىعا سالىپ، سايلاۋعا دايىن تۇرۋىمىز كەرەك. ورتاق ۇمىتكەردى قولدايىق!

بۇل كەزەكتەن تىس سايلاۋدى قولداعاندىق ەمەس. بيلىك باسىنداعىلاردىڭ «زاڭداستىرىپ» العان ويىن ەرەجەسىن وزگەرتپەيىنشە، سايلاۋ ناتيجەسىنىڭ باياعىداعىداي بولارى انىق. سوندىقتان ءبىز كۇللى قازاقستاندىقتاردى مىناعان شاقىرامىز:

- پرەزيدەنتتەن، قوس پالاتانىڭ توراعالارىنان جانە بارلىق دەپۋتاتتاردان ساياسي رەفورما جاساۋ جونىندەگى جوعارىداعى تالاپتاردى ورىنداتقىزۋدى الاڭدارعا، كوشەلەرگە شىعىپ تالاپ ەتەيىك!

بۇل كۇرەستە ءبىر بولاتىندىعىمىزدى، كوزقاراستار مەن ۇستانىمدارداعى وزگەشەلىكتەردى، كەلىسپەۋشىلىكتەردى ىسىرىپ تاستاپ، دەموكراتيالىق كۇشتەر كواليتسياسى توڭىرەگىنە توپتاساتىنىمىزدى تاعى دا مالىمدەيمىز جانە بارشاڭىزدى بىلەك تۇيىستىرۋگە شاقىرامىز!

Abai.kz

24 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2276
عيبىرات

قايسار رۋحتى عازيز جان

مۇحتار قۇل-مۇحاممەد 3594