رەسپۋبليكا كۇنى قايتا ورالدى. پارلامەنت دەپۋتاتتارى «قر كەيبىر زاڭنامالىق اكتىلەرىنە كينەماتوگرافيا جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى. ەندى 25 قازان – رەسپۋبليكا كۇنى ۇلتتىق مەرەكە رەتىندە اتاپ وتىلەدى، ال16 جەلتوقسان – تاۋەلسىزدىك كۇنى بولىپ قالا بەرەدى.

"بۇل وتە ماڭىزدى تاريحي شەشىم. ەلىمىزدىڭ تاۋەلسىزدىگى شىن مانىندە وسى كۇننەن باستالادى. سوندىقتان بۇل كۇندى ۇلتتىق مەرەكە رەتىندە بەكىتۋ - مەملەكەتتىلىك پەن ەگەمەندىك تۇرعىسىنان العاندا ماڭىزدى قادام", - دەدى سەنات توراعاسى ماۋلەن اشىمباەۆ.

سونداي-اق 1 جەلتوقسان-تۇڭعىش پرەزيدەنت كۇنى مەملەكەتتىك مەرەكەلەر تىزىمىنەن شىعارىلدى.زاڭ پرەزيدەنتكە قول قويۋعا جىبەرىلدى.

1990 جىلدىڭ 25 قازانى كۇنى قازاق كسر جوعارعى كەڭەسىنىڭ شەشىمىمەن «قاز سسر-ءنىڭ مەملەكەتتىك ەگەمەندىگى تۋرالى» دەكلاراتسيا قابىلداندى.

سول كەزدەن باستاپ قازاقستان ەگەمەندى ەلگە اينالۋىنىڭ العىشارتىن باستاپ كەتتى. ەلىمىزدىڭ جەكە تەرريتورياسى، ازاماتتىعى، مەملەكەتتىك بيۋدجەتى، حالىقارالىق قاتىناستارداعى دەربەستىگى، مەملەكەتتىك رامىزدەرى بەكىتىلدى.

1992 جىلدان باستاپ تويلانىپ، 2001 جىلى مەملەكەتتىك مەرەكەلەر قاتارىنا ەنگىزىلگەن رەسپۋبليكا كۇنى، 2009 جىلى بۇرىنعى پرەزيدەنت نۇرسۇلتان نازارباەۆتىڭ بۇيرىعىمەن مەملەكەتتىك مەرەكەلەر قاتارىنان الىنىپ تاستالدى.

بيىل ۇلتتىق قۇرىلتاي جيىنىندا مەملەكەت باسشىسى قاسىم-جومارت توقاەۆ وسى مەرەكەنى قايتا اتاپ ءوتۋدى ۇسىنعان بولاتىن.

«ۇلتتىق مەرەكەلەر مەن اتاۋلى كۇندەر تىزبەسىنە بىرقاتار وزگەرىس ەنگىزگەن ءجون. مەن رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىنامىن. سوندىقتان قازاننىڭ جيىرما بەسى كۇنى جىل سايىن ەگەمەندىك كۇنىن ەلىمىزدىڭ باستى مەرەكەسى رەتىندە اتاپ ءوتۋىمىز كەرەك. 1990 جىلى 25 قازاندا قازاقستاننىڭ ەگەمەندىگى تۋرالى دەكلاراتسيا قابىلداندى. بۇل ەلىمىزدىڭ تاۋەلسىزدىك جولىنداعى تۇڭعىش قادامى بولاتىن. وسى قۇجاتتى قابىلداعان كەزدە تۇڭعىش پرەزيدەنت نۇرسۇلتان نازارباەۆ اسا ماڭىزدى، ءتىپتى شەشۋشى ءرول اتقاردى، - دەدى ول.

ونىڭ سوزىنشە، رەسپۋبليكا كۇنىن قايتارۋدىڭ ماڭىزى زور.

«رەسپۋبليكا كۇنى ەلدىڭ مەملەكەت قۇرۋ جولىنداعى تاريحي قادامىنىڭ سيمۆولى بولۋى كەرەك. ارينە، تاۋەلسىزدىك كۇنىنىڭ باستاپقى ءمانى ساقتالادى. بۇل كۇن مەملەكەتتىك مەرەكە بولىپ قالا بەرەدى. بىراق تاۋەلسىزدىك الۋعا زور ۇلەس قوسقان ۇلتتىق باتىرلارىمىزعا تاعزىم كۇنى رەتىندە اتاپ ءوتىلۋى كەرەك، - دەدى مەملەكەت باسشىسى.

1990 جىلعى دەكلاراتسيادا قازاق كسر-ءىنىڭ مەملەكەتتىك ەگەمەندىگى جاريالانىپ، ەلدىڭ ساياسي-قۇقىقتىق تاۋەلسىزدىگىنىڭ باعدارلاماسى باياندالدى. ەل اۋماعىنىڭ تۇتاستىعى، وعان قول سۇعىلمايتىندىعى، قازاق حالقىنىڭ جانە قازاقستانداعى  باسقا دا ەتنوس وكىلدەرىنىڭ ءتول مادەنيەتىن، ءداستۇرىن، ءتىلىن قايتا تۇلەتۋ مەن دامىتۋ، ۇلتتىق قادىر-قاسيەتتى نىعايتۋ مەملەكەتتىڭ اسا ماڭىزدى مىندەتتەرىنىڭ ءبىرى رەتىندە ايتىلدى.

كونستيتۋتسيالىق قۇرىلىسقا قارسى جاسالاتىن كەز كەلگەن كۇشتەۋ ارەكەتتەرى، ونىڭ اۋماعىنىڭ تۇتاستىعىن بۇزۋعا شاقىراتىن، ۇلت ارازدىعىن قوزدىراتىن جاريا-ۇرانداردىڭ زاڭ بويىنشا جازالاناتىنى ەسكەرتىلدى. رەسپۋبليكانىڭ ساياسي، ەكونوميكالىق، الەۋمەتتىك، ۇلتتىق-مادەني قۇرىلىسىنا، ونىڭ اكىمشىلىك-اۋماقتىق قۇرىلىسىنا بايلانىستى ماسەلەلەر ەشكىمنىڭ ارالاسۋىنسىز دەربەس شەشىلەتىنى جاريالانعان بولاتىن.

Abai.kz