جەكسەنبى, 4 جەلتوقسان 2022
بۇ نە مازاق؟ 1471 6 پىكىر 4 قازان, 2022 ساعات 12:31

انا ءتىلىمىزدى «قوستانايشا ارداقتاۋ»

ەلىمىزدىڭ تەرىستىك ولكەسىندەگى انا ءتىلىمىزدىڭ اسا مۇشكىل ءحالى جايلى ءباسپاسوز بەتىندە از جازىلعان جوق. ەستىر قۇلاق، تۇسىنەر نيەت بولسا، بۇل جاعداي الدەقاشان وزگەرەر مە ەدى، كىم ءبىلسىن؟..

الايدا بۇعان كوڭىل بولەتىن، ءسويتىپ قاسيەتتى ءتىلمىزدىڭ مۇڭ-مۇقتاجىنا جاناشىرلىق تانىتاتىن بيلىك تە، زيالى قاۋىم وكىلدەرى دە بايقالمايدى. بايقالمايدى دەپ، ءوزىمىزدى-ءوزىمىز جۇباتامىز-اۋ... شىندىعىندا، مۇنداعى انا ءتىلىمىزدىڭ جاعدايى دابىل قاعارلىق. وزگەسىن بىلاي قويعاندا، ەڭ بولماعاندا كوشە اتتارىن قاتەسىز، ساۋاتتى جازۋعا دەگەن نيەت بايقالمايتىندىعى تاڭ قالدىرادى.

ماسەلەن، الىسقا بارماي-اق، قوستاناي قالاسىنىڭ كوشەلەرىنە كوز سالعان ادام، قازاق ەلىندە ەمەس، رەسەيدىڭ ءبىر قالاسىن ارالاپ جۇرگەندەي كۇي كەشەدى. وسىنداعى ورىس تىلىندە جازىلعان كوشە اتتارىن كورگەندە مۇنداعىلاردىڭ اسا مۇقياتتىلىعىنا، قاتەسىز جازۋعا دەگەن ىنتاسىنا ەرەكشە ريزا بولاسىڭ. ال قازاقشاسىنا كەلگەندەگى نەمكەتتىلىگى مەن نەمقۇرايلىعىنا قايران قالماسقا امال جوق. سەنبەسەڭىز، مىنا سۋرەتتەرگە نازار سالىڭىز.

انا تىلىمىزگە دەگەن مۇنداي ەنجارلىق پەن سەلقوستىقتى ەش جەردە كەزدەستىرە المايتىنىڭىزعا سەنىمدىمىن. قوستانايلىقتار ورىس اقىنى پۋشكيندى توبەسىنە كوتەرە قادىرلەگەندىگى سونشالىقتى، ءوزى تۇگىلى ايەلىنىڭ اتىنا دا كوشە بەرگەن. اقىننىڭ وتانى - رەسەيدە دە مۇنداي قۇرمەت كورسەتىلمەس. ال ەندى ۇلت-ازاتتىق كوتەرىلىستىڭ باسشىسى امانگەلدى يمانوۆتىڭ اتىن، ياعني، جالعىز اۋىز ءسوزدى قازاقشا جازا الماۋى - ساۋاتسىزدىقتىڭ شىڭى دەسە دە بولادى. بۇدان ارى جۇرسەك، مۇنداعىلاردىڭ كەز-كەلگەن كوشەسىنىڭ باسىنا «كوشەسى» دەگەن ءسوز جازىلسا، تازا قازاقشا بولادى دەپ ويلاعاندىعىنىڭ كۋاسى بولامىز. جالپى، قوستانايلىقتاردىڭ وسى ءبىر «ايرىقشا جاڭالىعىن» رەسپۋبليكا كولەمىندە قولدانۋعا ابدەن لايىق سەكىلدى. سوندا قازاقشا جازامىن دەپ اۋرەگە تۇسەتىندەردىڭ جۇمىسىن الدەقايدا جەڭىلدەتەر ەدىك.

ءبىر وكىنىشىتىسى، وسى كوشەلەردىڭ بارلىعى دا قالانىڭ ءدال ورتاسىندا. ال ەندى شاھاردىڭ شەتىنە بارساڭىز، قانداي قىزىققا تاپ بولاتىندىعىڭىزدى ويلاۋدىڭ ءوزى قورقىنىشتى. ال ەگەر مۇندا كوشەلەردىڭ جالعىز اۋىز ءسوزىن دۇرىس جازا الماسا، وندا اتاعى دارداي تىلدەردى دامىتۋ باسقارماسى نەمەسە قوعامدىق دامۋ باسقارماسى دەگەن مەكەمەلەردىڭ قانداي قاجەتتىلىگى بار؟ «كورمەس، تۇيەنى دە كورمەس» دەگەندەي، تاناۋىنىڭ استىنداعى قاتەلەردى بايقامايتىن مۇنداي باسقارمالاردىڭ بارىنان جوعى.

جايبەرگەن بولاتوۆ

Abai.kz

6 پىكىر

ۇزدىك ماتەريالدار

قۇيىلسىن كوشىڭ

قانداستار قازاققا، قازاقستانعا نە بەردى؟

رايىس ءارىپجانۇلى 2206
الاشوردا

تۇركىلىك تەك جانە تۇركى-موعول بىرلىگى

ءجادي شاكەنۇلى 1034
قاۋىپ ەتكەننەن ايتامىن

گازدىڭ گەوساياسي «گەموررويى»

ءامىرجان قوسان 1225