قازاقستان پرەزيدەنتتىگىنە ۇمىتكەر جيگۋلي دايراباەۆ جەر كوميسسياسى بويىنشا بۇرىنعى ارىپتەسى مۇحتار تايجاندى «پوپۋليست» دەپ اتاپ، سىنعا الدى.

«مۇحتار اينالايىن-اي، سەندە ۇيات بار ما؟ سەن مەنى اعا دەپ جۇرگەن ادامسىڭ عوي. ەندى سەن مەنىڭ پرەزيدەنتتىككە كانديداتقا تۇسكەنىمە ءىشىڭ جارىلىپ بارا جاتىر ما؟ پىسىق بولساڭ، اقىلدى بولساڭ، ءوزىڭ نەعىپ تۇسپەدىڭ؟

ەلدىڭ ءبارىن بۇزىپ، ىرىتكى سالدىڭ. سەنىڭ جۇرگەن جەرىڭە ءشوپ شىعا ما؟ سەنىڭ مەندە نەڭ بار؟ ادامگەرشىلىك بولۋ كەرەك قوي. مۇحتار تايجان ءبىر جەردى وڭدىرىپ كەتتى دەگەندى ەستىمەپپىن. سەن نازارباەۆتىڭ اق ۇيىندە دە جۇمىس ىستەدىڭ عوي. ودان كەتتىڭ توقاەۆتىڭ قاسىندا دا جۇمىس ىستەدىڭ. باس پايداڭدى ويلاپ، ۇلتتىق كەڭەسكە ءوزىڭ سۇرانىپ كىردىڭ. ول جەردەن تۇك شىقپاعان سوڭ، بەزىپ جوعالدىڭ. سەنىڭ ىستەپ جۇرگەن تىرلىگىڭنىڭ ءبارىن بىلەمىز عوي. بىلتىر جەر ماسەلەسى بويىنشا رەسپۋبليكالىق كوميسسياعا ءوزىڭ كىردىڭ سۇرانىپ. ول كوميسسيادا سەن مەننەن ۇتىلدىڭ. نامىسىڭ بار بولسا، نەڭ بار؟ قايتا قۋانبايسىڭ با؟ قاراپايىم اۋىلدان شىققان ازامات پرەزيدەنتتىككە تالاسىپ جاتقانىنا…»، - دەدى ول الەۋمەتتىك جەلىدەگى بەينەجازبادا.

جيگۋلي دايراباەۆ مۇحتار تايجاننىڭ اۋىلدا ءبىر كۇن دە جۇمىس ىستەپ كورمەگەنىن، ونداعى ادامداردىڭ جاي-كۇيىن بىلمەيتىنىن، ونىڭ اۋىلدا ەڭبەك ەتىپ جۇرگەن حالىقتى الداپ جۇرگەنىن ايتتتى.

«اۋىز مەنىكى دەپ وتتاي بەرەسىڭ بە؟ دەموكراتيا دەگەن وتتاۋ ما؟ سۇراعىڭ بولسا كەل وزىمە!»، - دەدى اشۋعا مىنگەن دايراباەۆ.

ال مۇحتار تايجان ءوزىنىڭ Facebook پاراقشاسىندا كانديداتپەن دەباتقا شىعۋعا دايىن ەكەنىن جازدى.

«پرەزيدەنت لاۋازىنا ءتۇسىپ جاتقان ۇمىتكەر جيگۋلي دايراباەۆ مىرزا ماعان قاتتى رەنجىپ ۇندەۋ جاريالاپتى. نامىس، ۇيات تۋرالى ءسوز قوزعاپ ماعان «شىق» دەپ شاقىرىپ جاتىر ەكەن.

شىقساق شىعايىق، جيگۋلي مىرزا. كەز كەلگەن تەلەارنا بولسىن، YouTube ارنا بولسىن مەن سىزبەن تىكەلەي ەفيردە اشىق پىكىرتالاسقا دايىنمىن.

كىمدىكى دۇرىس، كىمدىكى بۇرىس - تورەشى حالىقتىڭ ءوزى بولسىن»، - دەپ جازدى.

Abai.kz