سەنبى, 28 قاڭتار 2023
1682 2 پىكىر 18 قاراشا, 2022 ساعات 16:03

بوررەل كەلىپ بيلىكپەن سويلەستى

بۇگىن استاناعا ەۋرووداقتىڭ سىرتقى ساياسات جونىندەگى وكىلى جوزەپ بوررەل كەلدى.

ول پرەزيدەنت قاسىم-جومارت توقاەۆپەن كەزدەسپەستەن بۇرىن، قازاقستاندىق قۇقىق قورعاۋشىلار جيىنىنا قاتىستى. جيىن قاتىسۋشىلارىنىڭ ايتۋىنشا، ەۋرووداق وكىلى قاڭتار وقيعاسىنا كوڭىل بولگەن، سونداي-اق قازاقستانداعى ادام قۇقىعىنىڭ ساقتالۋىنا قاتىستى سۇراقتار قويعان. تىركەلمەگەن دەموكراتيالىق پارتيانىڭ جەتەكشىسى جانبولات ماماي مەن ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆتىڭ ىسىنە قىزىعۋشىلىق تانىتقان.

مەملەكەتتىك ەمەس بىرلەستىكتەر وكىلدەرىمەن وتكەن وتىرىستان كەيىن بوررەل سىرتقى ىستەر ءمينيسترى مۇقتار تىلەۋبەردى مەن مەملەكەت باسشىسى قاسىم-جومارت توقاەۆپەن كەزدەستى.

پرەزيدەنت جوزەپ بوررەلدىڭ كەلگەنىنە ءىلتيپات ءبىلدىرىپ، ونىڭ ساپارى قازاقستان مەن ەۋرووداق اراسىنداعى قارىم-قاتىناستاردى نىعايتۋدا ماڭىزى زور ەكەنىن اتاپ ءوتتى.

قاسىم-جومارت توقاەۆ قازاقستان مەن ەۋروپالىق وداق اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىم بارلىق سالاداعى ىنتىماقتاستىقتى تەرەڭدەتۋدىڭ جاڭا كەزەڭىنە جول اشقانىن ايتتى.

– ءبىز قازاقستان مەن ەۋرووداق اراسىنداعى جوعارى دەڭگەيدەگى بايلانىستاردى قولدايمىز. وسىعان بايلانىستى ەۋروپالىق كەڭەستىڭ پرەزيدەنتى شارل ميشەلدىڭ وتە تابىستى بولعان ساپارىن جانە ەۋروپالىق كوميسسيانىڭ پرەزيدەنتى ۋرسۋلا فون دەر ليايەنمەن جۇرگىزگەن كەلىسسوزىمدى اتاپ وتكىم كەلەدى. ءبىز ىنتىماقتاستىعىمىزدىڭ كوپتەگەن ماسەلەسى بويىنشا ءوزارا تۇسىنىستىككە قول جەتكىزدىك دەپ ويلايمىن. سونداي-اق ەگيپەتتە قازاقستان پرەمەر-ءمينيسترى مەن ۋرسۋلا فون دەر ليايەن قول قويعان مەموراندۋمدى قۇپتايمىن. بۇل – ءوزارا ىنتىماقتاستىق تۇرعىسىنان وتە ناقتى قادام، – دەدى مەملەكەت باسشىسى.

ءوز كەزەگىندە جوزەپ بوررەل استانا مەن بريۋسسەل اراسىنداعى ءوزارا قارىم-قاتىناستاردىڭ قارقىندى دامىپ كەلە جاتقانىن اتاپ ءوتتى.

– ەۋرووداق پەن قازاقستان – جاقسى سەرىكتەستەر. ءبىز ءوزارا سەنىم مەن قۇرمەت كورسەتە وتىرىپ، ورتاق سىن-قاتەرلەر تۋرالى ايتامىز. سىزدەر قازاقستاندى اشىق، ينكليۋزيۆتى جانە دەموكراتيالىق ەل ەتۋ ءۇشىن وزگەرىستەر جاساۋعا باعىتتالعان رەفورمالار ۇدەرىسىن باستادىڭىزدار. مەنىڭ ساپارىم وسى وتە ماڭىزدى كەزەڭمەن تۇسپا-تۇس كەلىپ وتىر، – دەدى ەۋروپالىق وداقتىڭ جوعارعى وكىلى.

كەزدەسۋ بارىسىندا قازاقستان مەن ەۋروپالىق وداق اراسىنداعى ەكونوميكالىق جانە ينۆەستيتسيالىق بايلانىستاردى ودان ءارى نىعايتۋ پەرسپەكتيۆالارى تالقىلانعان.

بوررەل كەزدەسۋلەردەن كەيىن جۋرناليستەرمەن وتكەن بريفينگكە قاتىستى. ول قازاقستاننىڭ ۋكرايناعا قاتىستى بۇۇ-نىڭ مەملەكەتتىڭ اۋماقتىق تۇتاستىق قاعيداسىن قاتاڭ ۇستانىپ وتىرعانىنا العىس ايتتى. سونداي-اق «ەۋروپانىڭ رەسەيگە سالىپ وتىرعان سانكتسيالارى قازاقستانعا كەرى اسەرى بار ما؟» دەگەن سۇراققا جاۋاپ بەردى.

"رەسەيگە قارسى سالىنىپ وتىرعان سانكتسيالار رەسەيدىڭ سوعىستى قارجىلاندىرۋ الەۋەتىن السىرەتۋگە باعىتتالعان، سانكتسيالار باسقا ەلگە زيان كەلتىرۋ ماقساتىن كوزدەمەيدى. سانكتسيالار اۋىل شارۋاشىلىعىنا نەمەسە سانكتسيالارعا جاتپايتىن تىڭايتقىشتارعا سالىنبايدى. سوندىقتان ءبىزدىڭ سانكتسيالارىمىز بۇكىل الەمدى ازىق – تۇلىكپەن قامتاماسىز ەتۋگە كەدەرگى كەلتىرىپ وتىر دەگەن پىكىر شىندىققا جاناسپايدى، سونداي-اق سانكتسيالاردىڭ سالدارى مۇقيات زەرتتەلۋى ءتيىس", - دەدى بوررەل. ەۋروپالىق وداق وكىلى «ەگەر سانكتسيالار باسقا ەلدەرگە زيانىن تيگىزەتىن بولسا، ءبىز ونى وتەيمىز» دەگەندى ايتتى.

جوزەپ بوررەل استاناداعى جيىننان كەيىن وزبەكستاننىڭ سامارقان قالاسىنا اتتانادى. ول جاقتا ەۋرووداق – ورتالىق ازيا فورماتىندا مينيسترلەر كەزدەسۋى وتەدى. بوررەل سونىمەن بىرگە ەو مەن ورتالىق ازيا اراسىنداعى ءوزارا قارىم-قاتىناس ماسەلەلەرىنە ارنالعان كونفەرەنتسياعا قاتىسادى.

Abai.kz

2 پىكىر

ۇزدىك ماتەريالدار

انىق-قانىعى

جاقيانوۆ: ماعان اشىق جالا جابۋعا كىرىستى...

عالىمجان جاقيانوۆ 3122
ايقاي

ەلدە ۇلتتىق يدەولوگيا وتە ءالسىز...

بەيسەنعازى ۇلىقبەك 1907