جەكسەنبى, 5 اقپان 2023
انە، كوردىڭ بە؟ 1612 19 پىكىر 24 قاراشا, 2022 ساعات 12:42

پەسكوۆ: «داۋشىل ساياساتشىلار قازاقستاندا دا جەتىپ جاتىر»

كەشە عانا رەسەيلىك ساراپشىنىڭ «قازاقستان ۋكراينادان كەيىنگى كەزەكتە تۇرعان – پروبلەما» دەگەنى ەستەرىڭىزدە بولار. رەسەيدىڭ «روسسيا-1» تەلەارناسىنىڭ «ۆەچەر س ۆلاديميروم سولوۆيوۆىم» توك-شوۋىندا باعدارلاما سپيكەرلەرىنىڭ ءبىرى: 

«وندا دا ۋكرايناداعىداي ۇلتشىلدىق پروتسەسستەر باستالۋى مۇمكىن. قازاقستاندا رەسەيلىكتەر كوپ، شەكارامىز ەڭ ۇزىن جانە ءبىزدىڭ «روساتوم» ءۇشىن يادرولىق وتىن دا سوندا»، - دەدى.

رەسەي تاراپىنان جاسالعان تاعى ءبىر ارازدىق پىكىرىنە رەسەي بيلىگى جاۋاپ بەردى. ۆلاديمير ءپۋتيننىڭ ءباسپاسوز حاتشىسى دميتري پەسكوۆ قازاقستاندىق جۋرناليست ءادىل بالتاباەۆتىڭ سۇراعىنا جاۋاپ بەردى.

“بۇل ساياساتتانۋشىلاردىڭ پىكىرى. ول پىكىر ۇكىمەتتىڭ، كرەملدىڭ ساياسي ۇستانىمىن بىلدىرمەيدى. ولاردى تىڭداپ، كورۋدىڭ قاجەتى جوق. مەن ونداي ساياساتتانۋشىنى تانىمايدى ەكەنمىن. باعدارلامادا ايتقانىن دا كورگەن جوقپىن. ونداي ساياساتتانۋشىلار سىزدەردە دە جەتىپ جاتىر. ءبىزدىڭ رەسەيگە قارسى سويلەپ جۇرگەن...»، - دەدى پەسكوۆ.

پەسكوۆتىڭ سوزىنشە، كوزقاراسى دا ءارتۇرلى ادامدار بار، الايدا ولاردىڭ رەسمي بيلىككە ەشقانداي قاتىسى جوق.

ال قازاقستاننىڭ ءماجىلىس توراعاسى بۇل ماسەلەگە بايلانىستى:

«ءبىز رەسەيگە تاۋەلدى ەمەسپىز. ءبىز رەسەيدەن قورىقپايمىز. قازاقستانعا قارسى ايتىلعان سوزدەرگە پرەزيدەنت تە، دەپۋتاتتار دا، ءسىم دە ءوز جاۋابىن بەرىپ ءجۇر»، - دەدى.

بۇعان دەيىن قر سىرتقى ىستەر ءمينيسترىنىڭ ورىنباسارى رومان ۆاسيلەنكو رەسەي تەلەەفيرىندەگى قازاقستانعا قارسى مالىمدەمەلەر تۋراسىندا پىكىرىن بىلدىرگەن بولاتىن.

«مۇنداي مالىمدەمەلەرگە كەلەتىن بولساق، مەملەكەت باسشىسى دا، ءسىم باسشىلىعى دا، باسقا دا باسشىلار، سونىڭ ىشىندە پارلامەنت پالاتالارىنىڭ سپيكەرلەرى دە «اۋزىم بار دەپ سويلەي بەرەتىندەردىڭ» وسىنداي پىكىرلەرى مەن مالىمدەمەلەرىنە قاتىستى بىرنەشە رەت ءوز جاۋاپتارىن بەرگەن بولاتىن. ءبىزدىڭ ويىمىزشا، ولار، بىرىنشىدەن، رەسەي فەدەراتسياسىنىڭ رەسمي ۇستانىمىن بىلدىرمەيدى. ەكىنشىدەن، قازاقستان مەن رەسەي فەدەراتسياسى اراسىنداعى ءداستۇرلى تىعىز قارىم-قاتىناسقا نۇقسان كەلتىرەدى، ۇشىنشىدەن، ولار رف بيلىگى تاراپىنان ءتيىستى جاۋاپتارىن الۋى كەرەك»، - دەدى رومان ۆاسيلەنكو.

ايجان تەمىرحان

Abai.kz

19 پىكىر