بۇگىن پرەزيدەنتتىڭ جارلىعىمەن وڭىرلەردەگى ءبىراز اكىمدەر اۋىستى. كەيبىرى ورنىندا قالسا، كەيبىرى كرەسلوسىن جاڭا باسشىعا بوساتىپ بەردى.

الماتى وبلىسىنىڭ اكىمى مارات ەلەۋسىزۇلى سۇلتانعازيەۆ لاۋازىمدى قىزمەتىنە قايتا تاعايىندالدى.

ونىڭ جاسى – 46-دا. ماماندىعى — ەكونوميست-قارجىگەر، زاڭگەر، ىسكەرلىك اكىمشىلەندىرۋ ماگيسترى. 2018 - 2022 جىلدارى قر قارجى مينيسترلىگى مەملەكەتتىك كىرىستەر كوميتەتىنىڭ توراعاسى بولعان. الماتى وبلىسىنىڭ اكىمى قىزمەتىنە 2022 جىلى 11 ماۋسىمدا تاعايىندالعان.

اقتوبە وبلىسىنىڭ اكىمى ەرالى لۇقپانۇلى توعجانوۆ تا ءوز ورنىندا قالدى. 59 جاستاعى وبلىس باسشىسى ءار جىلدارى ماڭىزدى قىزمەت ورىندارىندا ىستەدى. ماماندىعى بويىنشا بىلىكتىلىگى — زاڭگەر. 2017-2019 جىلدارى — ماڭعىستاۋ وبلىسىنىڭ اكىمى بولعان.  2019-2020 جىلدارى — قر كاسىپوداقتار فەدەراتسياسىنىڭ توراعاسى قىزمەتىن اتقاردى. 2020-2022 جىلدارى ءۇش رەت قاتارىنان  قر پرەمەر-ءمينيسترىنىڭ ورىنباسارى بولىپ تاعايىندالدى. ال اقتوبە وبلىسىنىڭ اكىمى بولىپ 2022 جىلى 31 تامىزدان بەرى ىستەپ كەلەدى.

قوستاناي وبلىسىنىڭ اكىمى ارحيمەد مۇحامبەتوۆتىڭ ورنىن قۇمار ىرگەبايۇلى  اقساقالوۆ اۋىستىردى. ەكونوميكا عىلىمدارىنىڭ كانديداتى اقساقالوۆ 57 جاستا. 2017 جىلعى 14 ناۋرىزدان باستاپ بۇگىنگە دەيىن سولتۇستىك قازاقستان وبلىسىنىڭ اكىمى قىزمەتىن اتقارعان.

جەتىسۋ وبلىسىنىڭ اكىمى لاۋازىمىنا بەيبىت وكسىكبايۇلى يساباەۆ قايتا تاعايىندالدى. ول التى ايدان بەرى جاڭا وبلىستى باسقارىپ كەلەدى. جاسى – 60-تا. ماماندىعى – جۋرناليست، حالىقارالىق قاتىناستار مامانى. توتەنشە جانە وكىلەتتى ەلشى ديپلوماتيالىق دارەجەسى بار، ساياسي عىلىمداردىڭ كانديداتى. ۇزاق جىلدار بويى ءار ەلدە ەلشى قىزمەتىن اتقارعان.

2003-2008 جىلداردا قازاقستان رەسپۋبليكاسىنىڭ پاكىستان يسلام رەسپۋبليكاسىنداعى، تۇركيا رەسپۋبليكاسىنداعى توتەنشە جانە وكىلەتتى ەلشىسى، قازاقستان رەسپۋبليكاسىنىڭ البانيا رەسپۋبليكاسىنداعى توتەنشە جانە وكىلەتتى ەلشىسى قىزمەتىن قوسا اتقارۋشى بولدى.

2008-2009 جىلداردا قازاقستان رەسپۋبليكاسىنىڭ مادەنيەت جانە اقپارات ۆيتسە-ءمينيسترى، قازاقستان رەسپۋبليكاسى پرەزيدەنتىنىڭ ءباسپاسوز حاتشىسى قىزمەتتەرىن اتقاردى.

2009-2019 جىلدارى – قازاقستان رەسپۋبليكاسىنىڭ قىرعىز، ازەربايجان رەسپۋبليكالارىنداعى توتەنشە جانە وكىلەتتى ەلشىسى بولدى.

اتىراۋ وبلىسى اكىمى سەرىك شاپكەنوۆ تە ءوز قىزمەتىندە قالدى. جاسى – 43-تە. ماماندىعى – ەكونوميست-ماتەماتيك. 2016 جىلى اتىراۋ قالاسىنىڭ اكىمى بولعان. 2020 جىلى ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى، 2021-2022 جىلدارى - ەڭبەك جانە حالىقتى الەۋمەتتىك قورعاۋ ءمينيسترى بولىپ قىزمەت ىستەدى. 2022 جىلدىڭ 7 ساۋىرىنەن باستاپ اتىراۋ وبلىسىنىڭ اكىمى بولىپ تاعايىندالدى.

شىمكەنت قالاسىنىڭ اكىمى لاۋازىمىنا مۇرات دۇيسەنبەكۇلى ايتەنوۆ قايتا تاعايىندالدى. جاسى – 41-دە، ماماندىعى – ينجەنەر، زاڭگەر. قازاقستان رەسپۋبليكاسىنىڭ قورعانىس مينيسترلىگىندە، قر پرەزيدەنتى ءىس باسقارماسىنىڭ رەسمي ءىس-شارالار جانە سىرتقى بايلانىستار ءبولىمىنىڭ مەڭگەرۋشىسى، اپپارات باسشىسى، قر پرەزيدەنتى ءىس باسقارۋشىسىنىڭ ورىنباسارى جانە شىمكەنت قالاسى اكىمىنىڭ ءبىرىنشى ورىنباسارى قىزمەتتەرىن اتقارعان. 2020 جىلدىڭ 21 قاڭتارىنان بەرى شىمكەنت قالاسىنىڭ اكىمى قىزمەتىندە.

سولتۇستىك قازاقستان وبلىسىنىڭ اكىمى بولىپ ايداربەك سەيپىلۇلى ساپاروۆ تاعايىندالدى. جاسى – 56-دا. ماماندىعى – زووينجەنەر جانە مەملەكەتتىك باسقارۋ بويىنشا باكالاۆردى بىتىرگەن. بۇعان دەيىن 2019 جىلدىڭ ناۋرىزىنان بەرى اۋىل شارۋاشىلىعى ءبىرىنشى ۆيتسە-ءمينيسترى قىزمەتىن اتقارعان.

پاۆلودار وبلىسىنىڭ اكىمى ابىلقايىر سقاقوۆ لاۋازىمىنان بوساتىلىپ، ورنىنا وبلىستى ۋاقىتشا باسقارۋعا ونىڭ ءبىرىنشى ورىنباسارى بولعان ولەگ پاۆەلۇلى كرۋك كەلدى. جاسى – 55-تە، ماماندىعى – ينجەنەر.

2008 جىلدان 2012 جىلعا دەيىن پاۆلودار قالاسى اكىمىنىڭ ورىنباسارى قىزمەتىن اتقارعان. بۇگىنگە دەيىن پاۆلودار وبلىسى اكىمىنىڭ ءبىرىنشى ورىنباسارى بولىپ ىستەدى.

تۇركىستان وبلىسىنىڭ اكىمى لاۋازىمىنا دارحان ساتىبالدى قايتا تاعايىندالدى. جاسى – 48-دە، ەكونوميكا عىلىمدارىنىڭ كانديداتى.2013 جىلى شىمكەنت قالاسىنىڭ اكىمى بولىپ ىستەگەن. پارلامەنت سەناتىنىڭ دەپۋتاتى بولىپ سايلانعان. 2019 جىلعى ناۋرىزدان باستاپ قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى بولدى. تۇركىستان وبلىسىن 2022 جىلعى 31 تامىزىنان باستاپ باسقارىپ كەلەدى.

Abai.kz