ەكىباستۇز جۇرتىن 30 گرادۋستىق ساقىلداعان سارى ايازدا جىلۋسىز قالدىرعان باس كىنالى انىقتالدى. ەكىباستۇزدىڭ جىلۋ جەلىسىندەگى اقاۋعا «ستانتسيا قىزمەتكەرىنىڭ قاتەلىگى» سەبەپ بولعان. وتكەن 1 جەلتوقسان كۇنى كەشكىسىن ۇيىمداستىرىلعان بريفينگ كەزىندە پرەمەر-ءمينيستردىڭ ءبىرىنشى ورىنباسارى رومان سكليار وسىلاي دەپ مالىمدەدى.

مەملەكەتتىك ەنەرگيا قاداعالاۋ كوميتەتى زەرتتەۋىنىڭ الدىن الا قورىتىندىسى بويىنشا، جىلۋ جەلىلەرىنىڭ بۇزىلۋىنا «ستانتسيا قىزمەتكەرىنىڭ قاتەلىگى سەبەپ بولعان». سونىڭ سالدارىنان جەلىدەگى قىسىم كۇرت كوبەيىپ، «جىلۋ جەلىسىندەگى كوپ قۇبىر جارىلعان»، - دەيدى سكليار.

«27 قاراشادا ءبىر مەزەتتە 43 قۇبىر جارىلدى، 28 قاراشادا سونداي 30 وقيعا بولدى. ەكىباستۇزدا مۇنداي سيپاتتاعى اپات العاش رەت بولىپ وتىر. اپات جىلۋ ەلەكتر ورتالىعىندا ەمەس، جەلىلەردە بولعان. كوپ قۇبىر جارىلىپ، جۇيەدەن سۋ كوپ كەتكەننەن كەيىن جىلۋ ەلەكتر ورتالىعىنداعى قازاندىقتار اۆتوماتتى تۇردە ءوشىپ قالعان»، - دەپ تولىقتىردى ورىنباسار مينيستر.

رومان سكلياردىڭ بەرگەن مالىمەتى بويىنشا، قازىر ەكىباستۇزدا كەمىندە 17 كوپ قاباتتى ءۇي جىلۋسىز قالىپ وتىر. تاعى 41 تۇرعىن ۇيگە بيلىك كۇن سوڭىنا دەيىن جىلۋ جىبەرۋگە ۋادە بەرگەن. 1 جەلتوقساندا تاڭەرتەڭ 5 «ا» ىقشاماۋدانىنداعى جىلۋ ماگيسترالىندەگى سوڭعى ءىرى اقاۋ جويىلعانمەن جىلۋمەن قامتاماسىز ەتۋ جەلىسىندەگى تەپە-تەڭسىزدىكتەر مەن جەلىدەن سۋدىڭ شىعارىلۋى اتالعان ىقشاماۋدانداعى ۇيلەردى جىلۋ جەلىسىنە قوسۋعا مۇمكىندىك بەرمەي وتىر. 5 «ۆ» مەن 6-ىقشاماۋداندارداعى ۇيلەردى كەزەڭ-كەزەڭ بويىنشا جىلۋعا قوسۋ جۇمىستارى ءجۇرىپ جاتىر.

كەشە تۇستەن بۇرىن پرەزيدەنت قاسىم-جومارت پاۆلودار وبلىسىنىڭ اكىمى ابىلقايىر ىسقاقوۆتى قىزمەتىنەن بوساتىپ، وبلىس اكىمى مىندەتىن ۋاقىتشا ولەگ كرۋك اتقاراتىن بۇيرىققا قول قويعان. وعان دەيىن وبلىس اكىمىنىڭ ءبىرىنشى ورىنباسارى بولعان ولەگ كرۋگتىڭ قازاقستاننىڭ ەڭ باي 50 ادامىنىڭ ءبىرى سانالاتىن وليگارح، ەكىباستۇز جەو-نىڭ قوجايىنى الەكساندر كلەبانوۆتىڭ قول استىندا جۇمىس جاساعانى قىزۋ تالقىعا تۇسكەن. ولەگ كرۋگ ءار جىلدارى «پاۆلودارەنەرگو» اق-دا ديرەكتور جانە «پاۆلودار جىلۋ جەلىلەرى» اق-دا پرەزيدەنت قىزمەتتەرىن اتقارعان. ال بۇل ەكى كومپانيانى دا وليگارح كلەبانوۆ يەلىك ەتەتىن «تساتەك» اق باسقارىپ كەلگەن.

ولەگ كرۋگ پاۆلودار وبلىسى اكىمى ورىنباسارى قىزمەتىن اتقارعان جىلدارى وڭىردەگى جىلىتۋ ماۋسىمىنا دايارلىق جۇمىستارىنا جاۋاپتى بولعان. ياعني، ەكىباستۇز جەو-نىڭ قىستىق جىلىتۋ ماۋسىمىنا دايارلىعىن ءدال وسى ولەگ كرۋگ قاداعالاپ وتىرعان. دەمەك جىلۋ ورتالىعى ماماندارىنىڭ تەحنيكالىق دايىندىعىنا دا جاۋاپتى وسى تۇلعا دەگەن ءسوز.

اكىمدەردى اۋىستىرۋمەن، كەزىندە سوقىر تيىنعا جەكە مەنشىككە ءوتىپ كەتكەن جىلۋ ورتالىقتارىن مەملەكەت مەنشىگىنە قايتارۋمەن ماسەلە شەشىلەدى دەگەنگە جالپاق جۇرت يلانباي وتىر. ەكىباستۇزداعى توتەنشە جاعدايعا كىنالى دەپ بيلىك ايىپتاپ وتىرعان ستانتسيا قىزمەتكەرلەرىنىڭ الداعى تاعدىرى كوپتىڭ نازارىندا بولاتىنى ايداي اقيقات.

Abai.kz