قازاقستان پرەزيدەنتى قاسىم-جومارت توقاەۆ وزبەكستاندا رەسمي ساپارمەن ءجۇر. ەكى ەل اراسىندا بىرقاتار ماڭىزدى قۇجاتتارعا قول قويىلدى. 

قازاقستان مەن وزبەكستاندى تاريحي جانە باۋىرلاستىق بايلانىس بىرىكتىرەدى. ورتاق شەكارا مەن ءوزارا ءتيىمدى ەكونوميكالىق جوبالار ەكى ەل اراسىنداعى قاتىناستى تەرەڭ ەتۋگە ىقپالداسۋدا. وزبەكستاننىڭ باستى ەكونوميكالىق سەرىكتەسى رەسەي سانالادى. رەسەيمەن ساۋدا-ساتتىقتى دامىتۋ ءۇشىن تاشكەنت قازاقستان ارقىلى وتەدى، سول سەبەپتى دە ترانزيت-لوگيستيكالىق بايلانىستاردى دامىتۋ جوبالارىنا وزبەكستان ۇنەمى قىزىعۋشىلىق تانىتىپ كەلەدى.

مەملەكەت باسشىلارى بىرقاتار مادەني شارالارعا قاتىستى. قاسىم-جومارت توقاەۆ وزبەكستان رەسپۋبليكاسىنا مەملەكەتتىك ساپارىنىڭ بارىسىندا شاۆكات ميرزيوەۆپەن بىرگە تولە بي كەسەنەسىنە زيارات ەتتى. تاشكەنت قالاسىنىڭ تەرريتورياسىندا ورنالاسقان كەسەنە XV عاسىردىڭ ءبىرىنشى جارتىسىندا سالىنعان.

ساپاردىڭ ءبىرىنشى كۇنى پرەزيدەنت قاسىم-جومارت توقاەۆ تاشكەنت قالاسىنداعى تاۋەلسىزدىك مونۋمەنتىنە گۇل شوعىن قويۋ راسىمىنە قاتىستى. "يانگي ۋزبەكيستون" ساياباعىندا ورنالاسقان مونۋمەنت بىلتىر وسى ەل تاۋەلسىزدىگىنىڭ 30 جىلدىعىنا وراي ورناتىلعان. ەسكەرتكىشتە وزبەك حالقىنىڭ تاريحىنداعى ەڭ ماڭىزدى وقيعالار مەن بەلگىلى مەملەكەت قايراتكەرلەرىنىڭ، قولباسشىلارى مەن عالىمدارىنىڭ بەينەلەرى كەسكىندەلگەن ەدى. بۇل ەسكەرتكىشكە گۇل شوعىن قويا وزبەكستانعا دەگەن قۇرمەت پەن دوستىق پەيىلدى بىلدىرەدى.

رەسمي كەزدەسۋلەر بۇگىن وتەدى. سوعان قاراماستان ەكى ەل اراسىندا بىرقاتار كەلىسىمدەردىڭ ءمان-جايى بەلگىلى بولا باستادى. قازاقستان مەن وزبەكستان كاسىپكەرلەرى قاتىسقان بيزنەس فورۋمدا قۇنى 2.5 ملرد دوللار بولاتىن 40 قۇجاتقا قول قويىلدى. ول ساۋدا-ساتتىق، بىرلەسكەن كاسىپورىندار اشۋ، قىزمەت كورسەتۋ جانە باسقا سالاعا بايلانىستى.

ءدال وسى كۇندەرى قازاقستان، وزبەكستان جانە ازەربايجان ءاۆتووندىرىس سالاسىندا بىرلەسە جۇمىس جاسايتىنى دا بەلگىلى بولۋدا. UzAuto Motors, "ازەرماش" جانە  "سارىارقااۆتوپروم" بىرلەسە جۇمىس ىستەۋگە نيەت ءبىلدىردى. بۇل ءۇش ەلدە قۇراستىرىلاتىن كولىكتەر سانى ارتادى دەگەن ءسوز.

كا مىرزا

Abai.kz