كەلەر جىلدىڭ باسىندا وتەتىن پارلامەنت پالاتالارىنىڭ بىرلەسكەن وتىرىسىندا ەلباسى تۋرالى زاڭنىڭ كۇشiن جويۋعا قاتىستى قۇجات قارالادى. بۇل تۋرالى ءماجىلىس توراعاسى ەرلان قوشانوۆ ايتتى.

ە. قوشانوۆ اتالعان زاڭنىڭ كۇشىن جويۋ ماسەلەسى پارلامەنتتە 2023 جىلدىڭ باسىندا قارالاتىنىن ايتتى.

«بۇل كونستيتۋتسيالىق زاڭ بولعاندىقتان، بۇل قۇجات پارلامەنت پالاتالارىنىڭ بىرلەسكەن وتىرىسىندا قارالادى. سوندىقتان قاڭتار ايىندا بىرلەسكەن وتىرىسى ءوتىپ، بۇل ماسەلە قارالادى. اتالعان زاڭ تولىق كۇشىن جويادى»، - دەدى ەرلان قوشانوۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، بۇل قۇجات بويىنشا شەشىم قابىلدانسا، زاڭداعى نورمالاردىڭ بارلىعىنىنىڭ كۇشى جويىلادى.

«سول زاڭدا كورسەتىلگەن ارتىقشىلىقتاردىڭ بارلىعى كۇشىن جويادى. ءبىرىنشى پرەزيدەنتكە دە، بولاشاق پرەزيدەنتتەرگە دە ەكس-پرەزيدەنتكە قاتىستى نورمالار بىردەي قولدانىلادى. ەگەر زاڭ كۇشىن جوسا، وندا قاراستىرىلعان يممۋنيتەتتىڭ زاڭدى كۇشى بولمايدى»، - دەدى ءماجىلىس توراعاسى.

Abai.kz