از جىل بۇرىن استانادا «ازيا قالامگەرلەرىنىڭ فورۋمى» وتكەن-ءدى. ازيا قۇرلىعىنىڭ ايتۋلى اقىن-جازۋشىلارى جينالىپ، ادەبيەت توڭىرىگىندە ادەمى اڭگىمەلەر ءوربىدى، تەرەڭ تالقىلاۋلار بولدى. سول جيىندا «قوردايدىڭ قوڭىر قۇلجاسى» نەسىپبەك ءداۋتايۇلى اعام مەن كوركەم ءسوز بەن كوسەمسوزدىڭ شەبەرى مارحابات كوكەم قوس قاناتتان قاتار كەلە قاپ، سۋرەتكە تۇسكەن ەدىك.

– كورەيادان كەلگەن جازۋشى جاقسى سويلەدى، – دەدى نەسىپبەك اعام ماڭعاز قالپىمەن.

– الگى شلياپا كيگەن بە؟ – دەپ سوزگە ارالاستى ماقامى بولەك مارحابات اعام. سوسىن ماعان قاراپ كوزىن قىسىپ:

– جالپى، شلياپا كيگەندەر مىقتى عوي، – دەدى كۇلىمسىرەپ.

– ءا، باياعىدان وسىلاي مويىنداۋىڭ كەرەك ەدى، – دەپ نەس-اعام ريزا كەيىپ تانىتتى.

وسى ءبىر اقجارقىن اڭگىمەنىڭ كوركىن قىزدىرىپ، جارىقتىق ەسەنعالي اعامىز دا ارامىزعا قوسىلعان-دى.

اسىل اعالاردىڭ قالجىڭى دا جاراسىمدى ەدى عوي. قازىر قاراپ وتىرساق، سولاردىڭ ءبارى دە جارىق دۇنيەمەن قوشتاسىپ، كەلمەستىڭ كەمەسىنە ءمىنىپ كەتە بارىپتى…

قاراتاۋدىڭ قازىناسىنداي، قوڭىر اۋەنىمەن قوڭىر كۇي كەشكەن نەساعاڭ ارامىزدا بولسا، 75 جاسقا تولار ەدى. جاقىندا عانا «ايعىركىسى» شىعارماسىنىڭ جەلىسىندە جاڭا باعىتتاعى «قاراتوبەل» ميستيكالىق – ۆەرباتيمى ساحنالاندى. تۋعان جەرىندە ەسكە الۋ شارالارى ۇيىمداستىرىلدى.

الىپ الاتاۋ مەن قارت قاراتاۋ تۇيىسكەن جەردە تۋىپ، قازاق ادەبيەتىندە ءوز ورنەگىمەن تانىلعان، سوقپاعى سونى، سونارى ولجالى، بەكزات جازۋشى مارحابات اعامىزدىڭ ومىردەن وتكەنىنە دە كوپ ۋاقىت وتكەن جوق. كوكتەمدە عانا ءوزى ەلگە شاقىرىپ، كەشكى الاۋدىڭ جانىندا اسەرلى اڭگىمە ايتقانىمىز ءالى ەسىمىزدە.

قازاق ادەبيەتىنە ولجا سالعان، ۇلكەن ۇلەس قوسقان ارداقتى اعالارىمىز ەندى ساعىنىشقا اينالدى، الدى جارىق بولسىن…

ومىردەن كوشپەستەي، كوڭىلدەن وشپەستەي كورىنگەن ابزال اعالارىمىزدىڭ قاتارى سيرەپ بارادى. ۇلت رۋحانياتى جولىندا ايانباي ەڭبەك ەتىپ جۇرگەن ءبىرتۋار تۇلعالارىمىزدىڭ لايىقتى باعاسىن بەرۋ، تاعىلىمدى تۋىندىلارىنا تەرەڭ بويلاۋ – ەرتەڭنىڭ عانا ەمەس، بۇگىننىڭ دە مىندەتى. ۋاقىتىندا ايتىلماعان ءسوزدىڭ وكىنىشى اۋىر بولماق. لايىم قازىنالى قالامگەرلەرىمىزدىڭ قادىرى ارتا بەرسىن!

دارحان قىدىرالى

Abai.kz