بيىل اقپاندا، 72 جاسىندا ومىردەن وزعان ساياساتتانۋشى گلەب پاۆلوۆسكي ءوزىنىڭ سوڭعى سۇحباتىندا رەسەي پرەزيدەنتى ءپۋتيننىڭ «تاعىنا» جانە رەسەيدەگى بيلىكتىڭ «اسكەري وپەراتسيا» ارقىلى وتەتىن ترانزيتىنە قاتىستى پىكىرىن ايتىپ كەتىپتى.

پاۆلوۆسكي 2000 جىلى ۆلاديمير ءپۋتيننىڭ سايلاۋالدى ناۋقانىنىڭ اۆتورى بولدى. ول ءپۋتيندى رەسەي پرەزيدەنتى ەتىپ بەردى. 2011 جىلعا دەيىن پاۆلوۆسكي كرەملمەن جۇمىس ىستەدى. ال پۋتين بيلىككە قايتا كەلەمىن دەگەندە، پاۆلوۆسكي بۇل شەشىمگە قارسى شىعىپ، كرەملمەن بايلانىسىن ءۇزدى. وسىدان كەيىن پاۆلوۆسكي وپپوزيتسياعا ءوتىپ، ءپۋتيندى سىناپ جۇرگەن. وتكەن جىلى ول رەسەيدىڭ باسقىنشىلىق سوعىسى تۋرالى، ونىڭ رەسەيدىڭ بولاشاعىنا اسەرى جانە رەسەي پرەزيدەنتىنىڭ بويىنداعى وزگەرىستەر تۋرالى كوپ پىكىر ءبىلدىرىپ ءجۇردى.

«ول ستاليننەن دە قاتتى وقشاۋلانعان. ءومىرىنىڭ سوڭعى جىلدارىندا ستالين كرەملگە كەلمەي، ساياجايىندا تۇرسا دا، وعان ساياسي بيۋرو مۇشەلەرى كەلىپ، اڭگىمە-دۇكەن قۇرىپ، بىرگە ىشىمدىك ىشكەن. ال پۋتيندە ول دا جوق. ول مۇمكىندىگىنشە وقشاۋلانعان »، - دەيدى.

بىلتىر ساۋىردە ول ءپۋتيننىڭ بيلىگىنە، اسىرەسە، ونىڭ جاقىن ورتاسىنان ەشقانداي قاۋىپ جوق ەكەنىن ايتقان.

«ولار يدەاليستەر ەمەس، ولاردىڭ بۇل تاققا قاتىستى ءوز جوسپارلارى بار. ولاردىڭ بارلىعى وتپەلى ءساتتى كۇتۋدە. ءوزى وتىرعان «تاقتا» اينالاسىنداعىلاردىڭ قول سۇعۋشىلىقتارى ءپۋتيندى شىن مانىندە قاتتى الاڭداتتى. اسىرەسە، بۇگىندە ول عانا ەمەس، ولار ەل باسقارىپ وتىرعانىن ەسكەرۋ كەرەك»، - دەيدى پاۆلوۆسكي.

وسىعان دەيىن پاۆلوۆسكي رەسەيدەگى بيلىك سوعىس ناتيجەسىندە وزگەرەدى دەپ بولجاعان.

«مەن بولاشاقتا ۇلكەن سوعىسپەن اياقتالمايتىن بىردە-ءبىر ستسەناري كورىپ تۇرعان جوقپىن. ماعان ءۇشىنشى دۇنيەجۇزىلىك سوعىس تۋرالى ايتپاڭىز - ەشقاشان ءۇشىنشى دۇنيەجۇزىلىك سوعىس بولمايدى. وعان مىندەتتى تۇردە باتىس ەلدەرى قاتىسادى. وسىدان كەيىن ءسىزدىڭ ميللياردەرلەرىڭىز، ەستەلىك قانا بولىپ قالادى.

ءبىز سوعىس باستايمىز جانە بۇل سوعىس رەسەيدەگى جاڭا پرەزيدەنت سايلاۋىنا دەيىن بولادى. رەسەي بيلەۋشى ​​توپتىڭ كوزقاراسى بويىنشا الەمدىك تارتىپكە كىرىكتىرىلمەگەن. ونىڭ الەمدىك تارتىپتە لايىقتى ورنى جوق. پۋتين ءوزىن بايدەنمەن بىرگە «شەشىم قابىلداۋشىلاردىڭ» توبىنا قوسۋ كەرەك دەپ سانايدى.

پۋتين نە ىستەي الادى، ال امەريكا نە ىستەي الادى دەگەن قاعاز بولۋى كەرەك»، - دەدى ول ۋكرايناداعى سوعىس باستالاردان التى اي بۇرىن.

سوعىستان كەيىن پاۆلوۆسكيدىڭ ايتۋىنشا، رەسەيدىڭ سوڭعى 30 جىلدىق تاريحى اياقتالادى.

كەرىمسال جۇباتقانوۆ

Abai.kz