«ناۆالنىي» ءفيلمى «ۇزدىك دەرەكتى فيلم» نوميناتسياسى بويىنشا «وسكار» سىيلىعىن جەڭىپ الدى.

«مەن بۇل سىيلىقتى الەكسەي ناۆالنىيعا جانە الەمدەگى بارلىق ساياسي تۇتقىندارعا ارناعىم كەلەدى. الەكسەي، الەم ءسىزدى ۇمىتقان جوق. ءبىز ءبارىمىز ديكتاتورلار مەن اۆتوريتاريزمگە قارسى تۇرۋدان قورىقپاۋىمىز كەرەك»، - دەدى ءفيلمنىڭ رەجيسسەرى دەنيەل روەر.

«مەنىڭ كۇيەۋىم تەك شىندىقتى ايتقانى ءۇشىن تۇرمەدە وتىر. مەنىڭ كۇيەۋىم تەك دەموكراتيانى قورعاعانى ءۇشىن تۇرمەدە وتىر. الەكسەي، مەن سەنىڭ جانە ەلىمىزدىڭ ازاتتىق العان كۇنىن ارماندايمىن. بەرىك بول، جانىم»،-دەدى الەكسەي ناۆالنىيدىڭ جۇبايى يۋليا ناۆالنايا «وسكار» سىيلىعىن تابىستاۋ راسىمىندە.

كانادالىق رەجيسسەر دانيەل روەر رەسەيلىك وپپوزيتسيالىق ساياساتكەر الەكسەي ناۆالنىيدىڭ رەسەيگە ورالۋى، ونىڭ ۋلانۋى تۋرالى كارتيناسىن العاش رەت 2022 جىلدىڭ قاڭتارىندا Sundance تاۋەلسىز كينوفەستيۆالىندە كورسەتتى. سول كەزدە تۋىندى كورەرمەندەر ىقىلاسىنا بولەنگەن، سونداي-اق بريتاندىق «بافتا» سىيلىعىنىڭ دا لاۋرەاتى بولدى.

Abai.kz