بۇل تۋرالى قالا اكىمدىگى مالىمدەدى. 11 ناۋرىزدا جەدەل شتابتىڭ وتىرىسى ءوتىپ، جەرگىلىكتى اۋماقتا تابيعي سيپاتتاعى توتەنشە جاعدايدى جاريالاۋ تۋرالى شەشىم قابىلدانعان.

ورال قالاسى اكىمىنىڭ توتەنشە جاعداي جاريالاۋ تۋرالى شەشىمى بۇگىنگى كۇنمەن شىقتى.

تابيعي جانە تەحنوگەندىك سيپاتتاعى توتەنشە جاعدايدىڭ بولۋىن نەگىزدەيتىن ماتەريالدار، ونى وقشاۋلاۋ جانە جويۋ جونىندەگى ءىس-شارالار، ماتەريالدىق-تەحنيكالىق، قارجىلىق جانە ادامي رەسۋرستاردىڭ ءتيىستى نەگىزدەمەلەرى مەن ەسەپتەرى قر توتەنشە جاعدايلار ءمينيسترىنىڭ 2021 جىلعى 14 ساۋىردەگى №170 بۇيرىعىنا سايكەس ۇسىنىلادى.

قالا اكىمدىگىنىڭ مالىمەتى بويىنشا اۋا رايىنىڭ كۇرت جىلىنۋى، قاردىڭ كۇرت ەرۋىنە جانە جەردەگى توڭنىڭ قالىڭ بولۋىنا بايلانىستى كەشە ىسقىرىق تاۋ (سۆيستۋن گورا), سارىتاۋ شاعىناۋدانى، ساراتوۆ تاسجولى بويىنداعى كانالدار مەن قۇس فابريكاسىنداعى وتكەلدە اعىن سۋ پايدا بولدى.

سۋ كوپ مولشەردە كەلگەندىكتەن، قۇبىرلاردان وتكىزۋگە مۇمكىندىك بولمادى.

سالدارىنان ساراتوۆ تاس جولى بويىندا ورنالاسقان مۇرات موڭكەۇلى كوشەسى بويىنداعى 8 كوپقاباتتى ءۇيدىڭ جەرتولەسىن سۋ باستى.

قازىرگى ۋاقىتتا وسى ۇيلەردىڭ جەرتولەلەرىنەن سۋ سورۋ جۇمىستارى جۇرگىزىلۋدە.

سۋدى وتكىزۋ ءۇشىن س.ايتقۇلوۆ كوشەسى بويىنداعى جول كەسىلدى. سونداي-اق ساراتوۆ تاس جولىنىڭ بويىنداعى «التىندار» گيپەرماركەتى مەن «اۆتودوكتور» تبس-نا قاراما-قارسى سۋ وتكىزۋ كانالىنىڭ 2 ۋچاسكەسىندە كات («جايىق تازا قالا» جشس) تەحنيكاسىمەن توپىراق توگىلىپ، موتوپومپالار ورناتىلدى.

ەلەكتر سىمدارىنىڭ تۇيىقتالۋىنا جول بەرمەۋ ماقساتىندا ەلەكتر جارىعىن بەرۋ توقتاتىلدى (990 ابونەنت). سونىمەن قاتار جىلىتۋ جۇيەلەرى (جوعارعى قاباتتار) ءوشىرىلدى.

كەشە كارىز جۇيەلەرىنىڭ ەرىگەن سۋلارمەن تولىپ كەتۋىنە بايلانىستى زاچاگان كەنتىندە سۋ بەرۋ قىسىمى تومەندەدى (70 مىڭ ابونەنت). قازىرگى ۋاقىتتا سۋ بەرۋ قالپىنا كەلدى.

«جۇمىستارعا 150-دەن استام ادام، 4 كات، 8 كاماز، سونداي-اق، تجد تەحنيكاسى، اتاپ ايتقاندا 1 پنس-110 (زيل بازاسىنداعى موتوپومپالار), 6 ءموبيلدى (تىركەمەلى) موتوپومپالار جانە باسقا 6 ارنايى تەحنيكا جۇمىلدىرىلدى. كۇنى بۇگىن زاچاگاندا جاعداي تۇراقتى. قالا بويىنشا باسقا دا ءىس-شارالار اتقارىلۋدا» دەپ حابارلادى ۆەدومستۆودان.

Abai.kz