كوك بايراعىمىزدى كوكتە جەلبىرەتۋگە ءتيىس حوككەيشىلەرىمىز قازاقستاننىڭ كوك قۇجاتىنان باس تارتتى. ولار ەندى ۇلتتىق قۇراما ساپىندا قازاقستاننىڭ نامىسىن جىرتپايدى. ولار رەسەيدى تاڭدادى.

...بيىل حوككەيدەن الەم چەمپيوناتى فينليانديا مەن لاتۆيادا وتەدى. «ۆ» توبىنا تۇسكەن قازاقستان قۇراماسى توپتىق كەزەڭدەگى ويىندارىن ريگادا وتكىزەدى. ال فينندەر مەن لاتىشتار دا ءوز شەكاراسىنان رەسەي مەن بەلارۋس ازاماتتارىنا ۆيزا بەرمەيتىنى الاقانعا سالعانداي انىق. ياعني، قازاقستان قۇراماسىنداعى «قوسمەكەندىلەرگە» دە قوساق اراسىندا «قامشى تيگەلى» تۇر.

سول سەبەپتى بۇگىن ءبىزدىڭ ۇلتتىق قۇراما الەم چەمپيوناتىنا باراتىن ۇلتتىق قۇراما باپكەرلەرىن جاساقتادى. بەلارۋسيادان كەلگەن اندرەي سكابەلكا ۇلتتىق قۇرامانى بۇكىلالەمدىك فورۋمعا باستاپ بارا المايدى. سوندىقتان حوككەيشىلەرىمىزدى ريگاعا عالىم مامبەتاليەۆ باستاپ باراتىن بولدى. وعان ەرلان ساعىمباەۆ، الەكساندر شيمين، ۆ.ۆىسوتسكي جانە ا.بەرەزەنسكي كومەكتەسەدى ەكەن.

بۇعان ەرتوقىمىن باۋىنا الىپ تۋلاعان كەيبىر «حوككەيشىلەرىمىز» قازاقستاننىڭ نامىسىن قورعاۋدان، ءتىپتى، قازاقستاننىڭ وزىنەن باس تارتىپ جاتىر. الەكسەي ماكليۋكوۆ مەن ەگور پەتۋحوۆ، دميتري شەۆچەنكو مەن پاۆەل اكولزين جانە انتون ساگادەەۆ كوك ءتۇستى تولقۇجاتتان باس تارتىپ، رەسەي ازاماتتىعىن تاڭداپتى.

قازاقستان حوككەي فەدەراتسياسىنىڭ پرەزيدەنتى بۇرىنعى پرەمەر-مينيستر اسقار ءماميننىڭ «بەلبالالارى» بۇل شەشىمدەرىن وتباسىلىق جاعدايمەن بايلانىستىرىپتى. ال مامين ءوزى بۇعان دەيىن قانشا قارجى تولەپ قۇرامادا ۇستاعان بەسەۋىنىڭ سوڭىنان ءموليىپ قاراپ تۇرا ما، الدە كوك قۇجاتتى تارك ەتىپ، ول دا كەتە مە؟ ءۇنسىز قالعانىنا قاراعاندا، ءبىزدىڭ دولبارىمىز شىندىققا جاناساتىن سەكىلدى...

اسىلان قۋانىشۇلى

Abai.kz