ءساۋىردىڭ 4-ءى مەن 7-ءى ارالىعىندا قىتايدا ساپاردا بولعان فرانتسيا پرەزيدەنتى ماكرون: «ەۋروپا تايۋان ماسەلەسىن كوكپارعا اينالدىرعان اقش پەن قىتايدىڭ ويىنىنا ارالاسپاۋ كەرەك»، - دەگەن ويىن ءبىلدىرىپ، ەل ءىشى مەن سىرتىندا قاتاڭ سىنعا ۇشىراپ ەدى.

ۋكراينا مەن رەسەي سوعىسى باستالعاندا ءبىر جاققا شىقپاي، ەكى تاراپقا تەڭ قاراۋعا تىرىسقان. سويتكەن ماكرون ۋكراينا ەلىنىڭ الدىنداعى ايىبىن جۋعىسى كەلگەندەي، زەلەنسكيدىڭ پاريج ساپارى الدىندا قازىرگى گەوساياسي جاعدايعا بايلانىستى جەرگىلىكتى باسىلىمعا قاتاڭ ۇستانىممەن سۇحبات بەرگەن.

اتاپ ايتقاندا ءپۋتيننىڭ 15 ايعا سوزىلعان سوعىستا وڭباي جەڭىلگەنىن كەسىپ ايتقان.

«ءپۋتيننىڭ شابۋىلىن «ارناۋلى وپەراتسيا» دەۋگە كەلمەيدى. سەبەبى ول ارتىنان مەملەكەت كولەمىندە موبليزاتسيا جاريالادى. سول ءۇشىن ماسەلەنىڭ اراجىگىن اشىپ الۋىمىز كەرەك»، - دەگەن ول: «پۋتين گەوساياسي ويىندا وڭباي ۇتىلدى. ەسەسىنە قىتايدىڭ قولجاۋلىعىنا اينالدى. فينليانديا ناتو-عا مۇشە بولدى. شۆەتسيا كەزەكتە تۇر. ەكى جىلدىڭ الدىندا مۇنى كوزگە ەلەستەتۋ ءوزى قيىن ەدى. ءپۋتيننىڭ ەجەلدەن قولداۋشىسى بولعان ەلدەردە قازىر ونىڭ اسكەرىنىڭ الەۋەتىنە كۇمان كەلتىرۋدە. پۋتين بالتىق تەڭىزىنە كىرەتىن جولدى ءوز قولىمەن جاپتى»، - دەدى.

فرانتسيا باسشىسى: «ەندى ءبىز كوپ وتپەي-اق ۋكراينانىڭ قارىمتا شابۋىلى مەن ءپۋتيننىڭ جەڭىلىپ، كەلىسسوز ستولىنا وتىراتىنىنا كۋا بولامىز. ەۋروپانىڭ قاۋىپسىزدىگى ۋكراينانىڭ قاۋىپسىزدىگىنە تىكەلەي بايلانىستى. بولاشاقتا ورىسپەن قاقتىعىسپايتىن جول ىزدەيمىز»، - دەپ ءسوزىن تۇيىندەگەن.

اپتا سوڭىندا زەلەنسكي يتاليا، گەرمانيادا جىلدام ساپاردا بولدى. ونان سوڭ فرانتسيا بولاتىن. زەلەنسكيدىڭ بۇل ساپارىن سىرت كوزدەر «قايتارما شابۋىلعا سوڭعى كومەك جيناۋ» دەپ سيپاتتاعان. جەكسەنبى كۇنى پاريجدە ماكرون مەن زەلەنسكي ورتاق مالىمدەمە تاراتتى. بەلگىلى بولعانداي فرانتسيا تارابى ۋكراينا جاساقتارىنان توپ قۇرىپ بروندالعان تەحنيكا مەن شاعىن تانكلەرمەن جاساقتاپ، سوعىسقا دايىندايتىن بولدى. ودان سىرت رادارلارمەن دە قامتاماسىز ەتپەك. مۇنىڭ الدىندا گەرمانيا باسشىسى دا 2,7 ميلليارد ەۋرو كولەمىندە اسكەري كومەك بەرەتىنىن مالىمدەگەن ەدى. گەرمانيانىڭ ۋكرايناعا بەرگەن كومەگى 17 ميلليارد ەۋروعا جەتكەن.

ەسبول ۇسەنۇلى

Abai.kz