بۇگىن اقپارات جانە قوعامدىق دامۋ ءمينيسترى دارحان قىدىرالى  استانادا ءبىر توپ ۆولونتەرمەن كەزدەستى. مينيستر جاستارمەن 20-21 ماۋسىمدا استانا قالاسىندا وتەتىن حالىقارالىق ۆولونتەرلەر فورۋمىنىڭ جاي-جاپسارىن تالقىلادى.

«وزدەرىڭىزگە بەلگىلى، مەملەكەت باسشىسى بۇۇ باس اسسامبلەياسىنىڭ 75-ءشى سەسسياسىندا ۆولونتەرلەردى جۇمىلدىرۋدىڭ حالىقارالىق جىلىن جاريالاۋ تۋرالى باستاما كوتەرگەن ەدى. وسىعان وراي جىلدا ەلوردادا ۆولونتەرلەر باس قوسادى.

جالپى اعايىن بوپ اسارلاتىپ، ۇلت بولىپ ۇمە جاساۋ، جۇرت بولىپ جۇمىلۋ قانىمىزدا بار قاسيەت. سوندىقتان وسى جولعى جيىننىڭ باس ءسوزى #تەكتەگى_ىزگىلىكتى_ويات دەپ الىنۋىنىڭ ءوزى تەگىن ەمەس.

جيىنعا قاتىسۋعا قىزىعۋشىلىق تانىتقانداردىڭ كوپتىگىنە جانە ۆولونتەرلەردىڭ ۇسىنىسىنا وراي، وڭىرلىك قاتىسۋشى-ۆولونتەرلەردى ىرىكتەۋ كونكۋرسى ءوتتى. ونىڭ قورىتىندىسىنا سايكەس 80 ۆولونتەر وڭىرلىك دەلەگاتتار رەتىندە تاڭدالدى. سونداي-اق ارنايى اكتسيالار ۇيىمداستىرۋ جوسپاردا بار. الداعى ۋاقىتتا استانادا حالىقارالىق ۆولونتەرلىك ورتالىق اشىلاتىنىن دا اتاپ وتكىمىز كەلەدى.

فورۋمنىڭ دايىندىق جۇمىستارىنا قازاقستانداعى بۇۇ-نىڭ ەرىكتىلەر باعدارلاماسىنىڭ وكىلدىگى، ازياداعى ءوزارا ءىس-قيمىل جانە سەنىم شارالارى جونىندەگى كەڭەس حاتشىلىعى، «ۇلتتىق ۆولونتەرلىك جەلىسى» جانە باسقا دا ۆولونتەرلىك جانە حالىقارالىق ۇيىمدارمەن ارىپتەستىك قارىم-قاتىناستا اتسالىسۋدا. الىس-جاقىن شەت ەلدەردەن، ەلىمىزدىڭ بارلىق وڭىرلەرىنەن دەلەگاتتار قاتىسپاقشى.

فورۋمنىڭ رەسمي سايتىمەن دە تانىسا وتىرىڭىزدار - http://ivfkz.org/kz»،-دەپ جازدى دارحان قىدىرالى ءوزىنىڭ Facebook پاراقشاسىندا.